1Mose e kimo‐ticne Jetoro, Midiaŋ ŋic jaŋere taha bapa, ere lamafâc soŋaŋ‐jopahuc juwec. Eme lamafâcne mâreŋ burocne ocniŋucnao jowac‐jopa raku Anuture tike Horebe ira fisiwec.
2Eme Wofuŋte aŋelozi ʒocbârun hawari fuacnewec, ʒoc i jâc dutu maŋkonec bâruŋkehuc domawec. Eme fime rame honewec, jâc dutu i bâruŋkehuc sifu mi ʒâtâcnewec.
3Eme Mose e manasuwec: “No ipec rarâ wiac ʒâŋe furu fuakac i honepe, jâc dutu i wemocte mi ʒâtâcnekac?”
4Iŋuc murâ wiac i hone taraocte ipec rame Wofuŋ Anutuzi honerâ jâc dutu maŋkonec wiracne muwec: “Mose, Mose!” Eme muwec: “No ʒi.”
5Eme eki muwec: “Bembeŋko mi warec, kikehuhuge hetarac, mâreŋ domakic i furu.”
6Erâ muwec: “No apafâcge Abraham, Isaka â Jakobo jaŋere Anutu.” Eme Mose e Anutu honezacte hâwickeme ʒâŋe maine bâsoŋkewec.
7Eme Wofuŋzi muwec: “Ŋicfâc‐nane Aigita mâreŋko fific guguriŋ ejarepie honekopac; â jopa tuŋtuŋ ejarepie kio owa eŋgopieŋ i manakopac, ʒâic manaŋgopieŋ i kâuc mi bakopac.
8Erâ ʒi Aigita ŋic jaŋere meonec batarac‐jopapemurâ wahakopac hâcne. Erâ mâreŋ irecnec jowac‐jopa rarâ mâreŋ biaŋne â qaratiekicne sâko moc ira râec‐jopapemu. Mâreŋ ira susu â baŋac fusucmarâ qâmbâriŋkeekac, Kanaaŋ ŋic, Hitiŋic, Amori ŋic, Periʒi ŋic Hiwiŋic â Jebusi ŋic jaŋere mâreŋ.
9Eme manakic, ʒi ine Israe ŋicguru jaŋere ki owa bâfuacnujec, â Aigita ŋic jaŋe bomac‐jopaŋgopieŋ i honekopac.
10Irec fahare rac, no Faraorao sorecgukopac, go Israe ŋicfâc‐nane Aigita mâreŋkonec jowac‐jopa razemec.”
11Mosezi Anutu âzâcnewec: “No iŋucnezi wemocko Faraorao rarâ Israe ŋic Aigita mâreŋkonec jowac‐jopa rapemu?”
12Eme muwec: “No gohec jupemu. Noni sorecgukopac irec ma ine kecʒiŋuc fuame honezemec: Israe ŋic Aigita mâreŋkonec jowac‐jopatecne tiki kecʒira Anutu no kiŋaŋ qanareniŋmu.”
13Eme Mosezi Anutu âzâcnewec: “No Israe ŋic jaŋerao ra fisirâ ʒiŋuc jazapemu, ‘Mimiŋnefâc‐nâŋec jaŋere Anutuzi ŋoŋerao sorecnukac,’ eme jaŋe, ‘Anutu ʒâŋene mo?’ iŋuc muhuc wio‐narepie weniŋuc jazapemu?”
14Eme Anutuzi Mose âzâcnewec: “NO JUKOPACZI JUKOPAC.” Erâ muwec: “Go Israe ŋic ʒiŋuc jazazemec, ‘NO JUKOPAC eki ŋoŋerao sorecnukac.’”
15Erâ Mose ʒuhuckerâ âzâcnewec: “Israe ŋic ʒiŋuc jazazemec, ‘Wofuŋ, mimiŋnefâc‐ŋeŋic Abraham, Isaka â Jakobo jaŋere Anutu, eki ŋoŋerao sorecnukac.’ Izi ʒâŋe‐nane fofo sanaŋ ekac, mimiŋzi ɋâric ʒâŋe‐nane iŋuc hâcne muhuc junʒepieŋ.
16Go rarâ Israe ŋic micnefâc‐jeŋic hetumaŋ‐joparâ jazazemec, ‘Wofuŋ, mimiŋnefâc‐ŋeŋic Abraham, Isaka â Jakobo jaŋere Anutu, eki fua‐narerâ ʒiŋuc nazawec: “No ŋoŋe honec‐ŋopakopac erâ Aigita ŋic jaŋe wiac eŋareŋgopieŋ i wâc mâmâc hone manac ekopac.
17Ehuc ʒiŋuc mupaŋkekopac, ‘No Aigita mâreŋte fific guguriŋkonec batarac‐ŋoparâ jowac‐ŋopa raku Kanaaŋ ŋic, Hitiŋic, Amori ŋic, Periʒi ŋic Hiwiŋic â Jebusi ŋic jaŋere mâreŋko râec‐ŋopapemu. Mâreŋ ira susu â baŋac fusucmarâ qâmbâriŋkeekac.’” ’
18Eme jaŋe dâŋge manapie fârine eha go Israe ŋic micne jaŋehec Aigita ŋicwofuŋ erao rarâ âzâcnenʒepieŋ, ‘Wofuŋ, Hebiraio ŋic nâŋere Anutu e fua‐nârewec, irec mana‐nâretec nâŋe ʒoaŋ jahec â moc ra juku mâreŋ tuhuo Wofuŋ Anutu‐nâŋec taha bâzi rikecnenʒepeneŋ.’
19No ine ʒiŋuc manakopac wâc, Aigita ŋicwofuŋ e mesanaŋ izi me izi ʒoɋac mi ecneha raniŋte mi mana‐ŋareocmu.
20Irec no menane sicnerâ jaŋere ŋondeŋko fuŋne qaqa mâsi bâfuahuc Aigita mâreŋ ima bapemu. Eme irec faicnao sâcne râec‐ŋopame raniŋmu.
21Eme no Aigita ŋic ejarepe ŋoŋe âgo eŋareniŋmu, eme ŋoŋe behec‐joparâ raniŋmu i metariŋ jâmbâŋ mi raniŋmu.
22Irec ŋokac sasawa jaŋe Aigita ŋokac âgofâc‐jeŋic erâ ficjeŋicko mâmâc jueŋgopieŋ jaŋe eri wiac, siliwa â golzi bakicne irec mecne, â ŋaqi wiac irec mâmâc numu‐jarepie jarenʒepieŋ. Eme wiac i naru motecfâc‐jeŋic hejarepie huzejec; ŋoŋe iŋuc ehuc Aigita ŋic wâc wiac‐jeŋic jowac ronʒepieŋ hâcne.”
