Waha Rara 27

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

¹“Go alata jâmiŋjâczi bazemec, ʒoricne‐ticnere sâc 5 kubi otecne‐ticnere sâc 5 kubi jaha, sâckoa fozejec hâcne, erâ hâŋne‐ticnere sâc kubi 3.

²Faic gurucne 4 ira ʒuŋene 4 fasaerâ râezemec, eme ʒuŋenezi alatahec qâfâsâezejec. Eme alata aeŋ bâbâroŋzi foŋkezemec.

³Wokemaŋ wiac alatao bohotame ʒure bataniŋ ezo â ʒafe‐ticne hezuzo irec kuʒi pake wiac barâ sapac â titie râqâc â sarac â ʒocrâqâc wiac mâmâc bazemec, erâ wiac sasawa i aeŋ bâbâroŋzi bafârezemec.

⁴Erâ go sapa‐ticne moc aeŋ bâbâroŋzia bazemec â sapare gurucne 4 ira aeŋ bâbâroŋzi reŋ raraʒi 4 jaha barâ basanaŋkezemec.

⁵Eme sapa i alatare qaŋeŋne rurumaŋnao âke hotahuc alata ombâŋnao wefu mickezejec.

⁶Erâ alatare reŋ i jâmiŋzia fasaerâ aeŋ bâbâroŋzi ɋorockezemec.

⁷Eme reŋ i reŋ raraʒinao esoriepie raʒizejec, eme reŋ i alata ŋifec â ŋifec fohame reŋke ranʒepieŋ.

⁸Eme go alata hâcbuc mâcne, tikio gaza gowatuc ekicne irec sâcko katapazi maŋnehec bazemec.

⁹“Go tiri boze hae ʒoŋa‐ticne bazemec wâc. Juwic mâreŋkopec ira qoruc fâfâsâc ɋetickepie waha domazejec, ŋifec ʒoric‐ticnere sâc kubi 100.

¹⁰Wâtuŋ‐ticne 20 â wâtuŋte râqâc 20 jaha aeŋ bâbâroŋzi bazo, erâ heheawic â qârârâc‐ticne i siliwazi bazo.

¹¹Faic mâreŋkopec iŋuc jaha qoruc ʒoricne jaha domazejec, ʒoricne‐ticnere sâc kubi 100 jaha; erâ wâtuŋ 20 â râqâc‐ticne 20 jaha aeŋ bâbâroŋzi bazo, qârârâc‐ticne ine siliwazi bazo.

¹²Â otecne‐ticne ʒoaŋ huhunaopec ira ine qoruc moc ʒoricne‐ticnere sâc kubi 50 izi waha domazejec, wâtuŋ‐ticne ine 10, erâ wâtuŋte râqâc 10 jaha wâc râezo.

¹³Hae ʒoŋare otecne ʒoaŋ wewefunaopec izi kubi 50 jaha ezejec.

¹⁴Motâc ŋifecnere qoruc i kubi 15 â wâtuŋ‐ticne 3 â wâtuŋte râqâc 3 jaha wâc, iŋuc hâcne fuazejec.

¹⁵Â motâc ŋifecnere qoruc i kubi 15 jaha, erâ wâtuŋ‐ticne 3 â wâtuŋte râqâc 3 jaha wâc ŋezejec.

¹⁶Sacmotâc sâko irec qoruc kubi 20 irec sâc, erâ qoruc i qoruc fâfâsâc keŋkeŋne, âmuc âmucne â bâbâroŋ erâ eri qâreŋ‐ticnehec bazo. Wâtuŋ‐ticne 4 â wâtuŋte râqâc 4 jaha râezo.

¹⁷Wâtuŋ sasawa sac râreckehuc domaniŋmu jaŋe siliwazi ɋoroc‐jopazo, â heheawic‐jeŋic i siliwazia â râqâc‐jeŋic ine aeŋ bâbâroŋzi bazo.

¹⁸Hae ʒoŋa ʒoricne‐ticnere sâc kubi 100 â otecne‐ticnere sâc kubi 50 â hâŋne‐ticne ine kubi 5, iŋuc fuazejec. Erâ qoruc fâfâsâc barâ ɋetickepie waha domazejec â wâtuŋ râqâc‐jeŋic ine aeŋ bâbâroŋzi bazo.

¹⁹Tiri bozere wâcwiac sasawa taha giere bajuniŋmu i mecne erâ hae ʒoŋare wâtuŋte fâzâ mecne i iŋuc jaha aeŋ bâbâroŋzia bafârezo.

²⁰“Eme go Israe ŋicguru mujaretec tatamacte wokemaŋ ɋaɋacne baware‐garenʒepieŋ, i lambe qazepie sâcne ʒaocte iŋuc enʒepieŋ.

²¹Eme tutumaŋ qoruc bozeo, ââketâc sahacnao hâcne, ira Aroŋ â ŋokâfâcne jaŋe hae ŋafeme fuŋkerâ lambe i Wofuŋte maio soŋaŋkehuc juhapie hae furezejec. Mâsi i Israe ŋicguru mimiŋzi ɋâric basanaŋkerâ bajupie hata sanaŋ‐jeŋic ezejec.