1Eme Anutu e dâŋ kecʒiŋuc sasawa mufuahuc muwec:
2“Noni Wofuŋ gore Anutu, no hâcne Aigita mâreŋ, kâpâcwâru fic hâcne, irecnec bataracgupo.
3“Go nore maio nemu burec wiac moc mi bajuzemec.
4“Go ɋâŋ qâqâtâc moc barâ mi bajuzemec, sambâŋko mecne mâreŋko mecne opâo mecne, mâreŋmaŋko mecne wiac forakac irec qâqâtâc moc mi bazemec.
5Go wiac i araŋ bacnehuc kiŋaŋ moc mi qacnezemec; no Wofuŋ gore Anutu hâcne, no ʒoɋac‐nanehec. No qaisocnueŋgopieŋ jaŋe kiŋjeŋicte okacne naru motec ŋosafâc‐jeŋic bazu‐jare raekopac.
6Â ŋic tauseŋ gurune gurune maŋzi ʒâficnuhuc dâŋnane reŋkeeŋgopieŋ jaŋe ine ehâmo‐jarehuc juekopac.
7“Wofuŋge Anutu ere ʒâŋe mi sipirickezemec, ʒâŋe‐ticne sipirickeocmu ŋic e Wofuŋzi mi akickeocmu.
8“Sonda e tiri foocte manasuzemec.
9Go ʒoaŋ gie bapa 6 giege baku bafârezemec.
10Ʒoaŋ namba 7 izi ine Wofuŋge Anutu ere hombaŋ ekac, irec ʒoaŋ ira gie moc mi bazemec, go mecne, ŋokâge mecne, otâge mecne, kiŋaŋ qaqafâcge ŋic me ŋokac jaŋe mecne, bulimakaofâcge mecne erâ ŋic furunezi ficgao jukac e mecne.
11Wofuŋ e gie bapa 6 gie bahuc sambâŋ â mâreŋ â hâwec erâ maŋnao wiac forakac sasawa i bâfua‐fârewec hâcne, ʒoaŋ namba 7 ira ine ŋemanawec. Irec Wofuŋ e sabata jambuŋkehuc furu muwec.
12“Go neŋgoc mamac jahecge sâsec‐jofazemec, Anutuzi mâreŋ râecguocmu ira dameŋ ʒora juhâc qâhâmocmurâ iŋuc hâcne ezemec.
13“Go ʒika mi qazemec.
14“Ŋowe ŋonâŋ ŋohe bebehec mi ezepirec.
15“Go fiuc mi rozemec.
16“Go ŋic âgoge micko âkec mi ecnezemec.
17“Go ŋic jaŋere huhure wiac irec andac mi ezemec. Go ŋic âgofâcge jaŋere ŋokac me kiŋaŋ qaqafâc‐jeŋic ŋic me ŋokac me bec bulimakao me doŋgifâc‐jeŋic me wiac‐jeŋic i me i fojareekac irec andac mi ezemec.”
18Ŋic ŋokac jaŋe sasawa ɋuŋ parandaŋ â bâbâric â qeŋfânâŋ â tikizi hosâc qawec, wiac i sasawa hone manac erâ hâwic‐jopame ɋarac ɋarac qambiŋ, ehuc taicko domambiŋ.
19Erâ Mose âzâcnembiŋ: “Goki dâŋ nâzâtec mananʒepeneŋ. Anutuzi ine dâŋ moc mi nâzâzejec, nâzâme hâmonʒipeŋ.”
20Iŋuc mupie Mosezi ŋic ŋokac ʒiŋuc jazawec: “Mi hâwic‐ŋopaoc, Anutu e ŋoŋerao fisijec i fuŋne‐ŋeŋic bataniŋkeocte, erâ ere hâhâwiczi mai foŋareha sâqocne mi baniŋte.”
21Eme ŋic ŋokac jaŋe taicko domahapie Mose e Anutuzi karorac ɋâfoŋne maŋnao ŋewec karorac i ra bâqiŋkewec.
22Ehame Wofuŋzi Mose âzâcnerâ muwec: “Go Israe ŋicguru kecʒiŋuc jazac: ‘No sambâŋkonec dâŋ mupe hufâjec i ŋoŋe ŋaŋac hone manac embieŋ.
23Irec nemu moc norao ʒuhuckehuc qâqâtâc‐ticne siliwazi me golzi bapa i mi enʒepieŋ.
24Mâreŋzi alata banarenʒepieŋ, erâ fainao qowi bâzi â wama bazi lama bulimakaofâc‐ŋeŋic rike‐narenʒepieŋ. Noni mupe hae mâreŋ moc ira me ira araŋ banareniŋmuo ine maic‐ŋopahuc jambuŋ‐ŋopapemu.
25Irec go qânâzi alata moc banarezo murâ ine qânâ fasaekicnezi mi bazemec, go aeŋ wiaczi qânâ he fasaec etecne omane eocmu hâcne.
26Go ririo fehuc alata‐nane mi maickezemec, iŋuc etecne alata maŋfuŋnao mimige jaŋgeŋkezacte.’
