1“Lohiabada ese Besalele bona Oholiaba bona taunimanima momo dekenai aonega ia henidia, gaukara idauidau do idia karaia totona, bona idia ese Dirava ena Palai Dubu ena gaukara ibounai idia karaia diba. Unai dainai inai taudia sibodia ese Lohiabada ia oda, bona ia hadibaia hegeregerena, unai gaukara do idia karaia.”
2Mose ese Besalele, Aholiaba, bona Lohiabada ese aonega ia henidia taudia ibounai ia boiria mai. Vadaeni unai taudia, unai gaukara idia ura karaia taudia, be Mose dekenai idia haboua mai, Dirava ena Palai Dubu karaia totona.
3Unai neganai Israela taudia ese Dirava ena Palai Dubu karaia totona idia henia gaudia ibounai be Mose ese unai gaukara taudia dekenai ia henia. To daba ibounai Israela taudia ese edia harihari gaudia ma idia mailaia, bona idia henia noho.
4Vadaeni unai gaukara diba momo taudia ese inai kara idia itaia neganai, edia gaukara idia rakatania.
5Bona Mose dekenai idia lao, idia gwau, “Taunimanima ese edia harihari gaudia momo herea idia mailaia noho. Idia mailaia gaudia be momo herea, hegeregere momokani, bona idia hanaia danu.”
6Vadaeni Mose ese hereva ia siaia lao kamepa ena kahana ibounai dekenai, inai bamona, “Tau ta o hahine ta ese harihari gauna ta do idia mailaia lou lasi Palai Dubu totona.” Unai hereva dainai taunimanima ese harihari gaudia idia hadokoa.
7Badina be idia henia gaudia be hegeregere momokani, unai gaukara ibounai karaia totona, bona gau haida idia noho kava.
8Vadaeni gaukara taudia edia huanai, gaukara diba herea taudia ese Dirava ena Palai Dubu idia karaia. Palai Dubu be dabua badadia 10, dabua namo herea bona goada dekena amo idia karaia. Dabua idia hatua, bona edia kala be bulu bona kakakaka sisina, bona kakakaka momokani. Bona turia diba momo taudia ese unai dabua dekenai kerubi aneru edia laulau idia turia kau.
9Inai dabua ta ta edia lata be 12 mita bona edia lababa be mita rua, bona dabua ibounai edia lata be hegeregere, bona edia lababa danu hegeregere.
10Dabua ibounai 5 idia turia hebou, vadaeni dabua tamona, latana, ia lao. Ma dabua 5 idia turia hebou, vadaeni dabua tamona, gunana hegeregere, ma ia lao.
11Dabua, edia kala bulu dekena amo rini momo idia karaia, inai dabua latadia ruaosi idia hakapua totona. Rini ibounai be inai dabua latadia edia isena dekenai idia kwatua kau.
12Inai dabua rini 50 be dabua ginigunana ena isena dekenai idia kwatua, ma inai bamona danu dabua rini 50 be dabua iharuana ena isena dekenai idia kwatua.
13Ma kimai 50 be golo dekena amo idia karaia. Unai kimai 50 be inai dabua badadia ruaosi edia dabua rini idia vareai. Unai dekena amo unai dabua badadia ruaosi be idia hakapua tamona, vadaeni Dubu tamona ia lao.
14Unai murinai dabua badana ta idia karaia, Palai Dubu do idia koua totona. Inai dabua badana be nanigosi edia huina dekena amo karaia dabua ibounai 11 dekena amo idia karaia.
15Inai dabua 11 edia bada be tamona, edia lata be 13 mita, bona edia lababa be mita rua.
16Inai dabua 5 idia turia hebou, dabua latana ta ia lao. Ma dabua 6 danu idia turia hebou, dabua latana ta ia lao.
17Inai dabua latana ginigunana ena isena dekenai dabua rini ibounai 50 idia kwatua, bona dabua latana iharuana ena isena dekenai danu unai bamona rini 50 idia kwatua.
18Kimai ibounai 50, be auri laboralabora dekena amo idia karaia, bona unai dabua latadia ruaosi be kimai 50 dekena amo idia hakapua, vadaeni dabua tamona ia lao.
19Bona idia ese Palai Dubu ena guhi rua idia karaia, ta be mamoe tau edia kopina, edia kala kakakaka, bona ta be davara edia boromakau, rui, edia kopina dekena amo. Inai be ataiai momokani ena guhi.
20Palai Dubu ena haba turia ta ta be akasia audia stadi rua dekena amo idia karaia, mai edia padana audia, vadavada ena toana bamona.
21Inai akasia audia stadi edia lata be 4 mita, bona inai stadi edia padadia dekenai idia noho audia edia lata be 66 sentamita.
22Inai akasia au stadi ta ta ibounai be idia lata sisina, vadaeni idia ta ta be siliva maua lalonai idia gini, haba turia hagoadaia, bona do idia marere lasi totona. Inai akasia au stadi idia utua neganai, ibounai edia lata be hegeregere.
23Inai haba turia, vadavada bamona gaudia, ibounai 20 be Palai Dubu ena diho kahana habana dekenai idia haginia.
24Siliva dekena amo maua 40, mai edia matudia idia karaia. Inai matudia ta ta lalonai stadi ta ta idia haginia. Inai maua rua be haba turia ta ta henunai idia atoa, stadi hagoadaia bona dogoatao totona, do idia marere lasi totona.
25Palai Dubu ena mirigini kahana haba dekenai danu be haba turia ibounai 20 idia haginia.
26Inai haba turia ta ta ibounai henunai be siliva maua rua idia atoa.
27Palai Dubu ena dina diho kahana habana dekenai haba turia ibounai 6 idia karaia,
28bona kona ruaosi dekenai haba turia rua idia haginia.
29Inai kona haba turia ruaosi be henuna kahanai idia kwatua auka. Bona ataiai momokani kahanai be rini dekena amo idia kwatua hebou auka. Kona ruaosi be unai bamona idia haginia.
30Unai dainai Palai Dubu ena murina kahanai haba turia ibounai be 8, bona siliva maua ibounai be 16, maua rua be haba turia ta ta henunai idia noho.
31Reirei latadia danu akasia audia dekena amo idia karaia, ibounai 5 be Palai Dubu habana ena mirigini kahana dekenai,
32Ma ibounai 5 be Dubu habana ena diho kahana dekenai, bona ibounai 5 be Dubu habana ena dina diho kahana dekenai.
33Inai reirei latadia, haba ena huanai idia kwatua gaudia, be idia lata, edia lata be haba ena lata hegeregere momokani.
34Haba turia ibounai be golo dekenai idia koua, bona golo rini idia kwatua kau, inai reirei latadia do idia dogoatao totona. Unai reirei latadia danu be golo dekenai idia koua.
35Koua dabua helagana danu idia karaia, Palai Dubu ena lalonai gauna. Inai dabua be mamoe huina dekenai idia karaia, iena kala be bulu, kakakaka momokani, bona kakakaka sisina. Bona kerubi aneru edia laulau be dabua ena latanai idia turia namonamo.
36Du ibounai 4 be akasia audia dekena amo idia karaia, koua dabua taua dae totona. Inai du be golo dekenai idia koua. Siliva maua 4 edia matudia lalonai du idia haginia. Kimai haida be golo dekenai idia karaia, bona du edia latanai kimai idia kwatua kau.
37Palai Dubu ena iduara dekenai koua dabua idia karaia. Inai koua dabua ena latanai, toana namona herahera idia turia namonamo.
38Koua dabua dogoatao totona idia ese akasia au du ibounai 5 idia haginia, mai edia golo kimai. Du edia kwarana be golo dekenai idia koua, du idia dogoatao ba danu be golo dekenai idia koua. Bona idia lalonai du do idia gini totona maua 5, be auri laboralabora dekena amo idia karaia.
