1Eme Wofuŋzi Mose âzâcnewec: “Manakic, no Faraore maio Anutu tinac âkendâŋguhape Aroŋzi porofetege juzejec.
2Erâ dâŋ sasawa mutâcne‐garekopac i hahacge mufuacnetec eki Farao âzâcneme Israe ŋic râec‐jopame mâreŋ‐ticne beherâ ranʒepieŋ.
3Â no nahac ine Farao maŋticne bâzickehuc Aigita mâreŋko wiac ʒâŋe furu â fuŋne qaqa mâsi bocjaha bapemu.
4Eme Farao e ine sifu dâŋŋekic mi manaocmu. Irec no Aigita ŋic bomac‐jopahuc okacne ŋemâcne jarehuc Israe ŋic guru sâko Aigita mâreŋkonec jowac‐ŋopa rapemu.
5Eme no tâpiri‐nanere fuŋne Aigita ŋic jaŋerao bataniŋkehuc ŋondeŋ‐jeŋickonec Israe ŋic jowac‐ŋopapemu dameŋ ira, no hâcne Wofuŋ jukopac, irec fuŋne mana taranʒepieŋ.”
6Eme Mose â Aroŋ jahe Wofuŋzi dâŋ jasa mutâc ewec irec sâcko wiac epic hâcne.
7Jahe Faraorao rarâ dâŋgie bapic dameŋ ira Mose e jara‐ticne 80, â Aroŋ eki ine 83 iŋuc bazupic.
8Eme Wofuŋzi Mose â Aroŋ ʒiŋuc jasawec:
9“Farao e, ‘Dâŋŋekic dopeckehuc mâsi moc banic,’ iŋuc ŋasame Aroŋ âzâcnezemec, ‘Gunuge rorâ Faraore maio mâreŋko behetec homa ezejec!’”
10Eme Mose â Aroŋ jahe Faraorao ferâ Wofuŋzi muwec sâc epic. Aroŋ e gunu‐ticne Farao â kiŋaŋ qaqafâc‐ticne jaŋere maio beheme homa ewec.
11Eme Farao e mamana ŋic â qaŋgec bapa hefârec‐jopawec. Eme Aigita qaŋgec bapa jaŋe iŋuc jaha mâsi soŋne bapie ijaha fuawec.
12Jaŋe ru sâc gunu‐jeŋic behepie homa efârembiŋ hâcne. Aroŋte gunuzi ine jaŋere gunu ɋâcjopa‐fârewec.
13Faraore maŋzi ine râŋgeŋkeme mi mana‐jactewec, Wofuŋzi muwec iŋuc hâcne fuawec.
14Eme Wofuŋzi Mose ʒiŋuc âzâcnewec: “Farao e maŋsanaŋ erâ ŋic jaŋe raniŋte qatara‐jarekac.
15Irec go tomâcko furicte Faraozi opâo raocte rahame gunuzi homa ewec i hâcne meo barâ Nilu opâ moŋgeŋnao bâfuacmurâ razemec.
16Erâ âzâcnezemec, ‘Wofuŋ, Hebiraio ŋic nâŋere Anutu hâcne, e ʒiŋuc gazapemurâ gorao sorecnuwec: “Ŋicfâc‐nane mâreŋ tuhuo kiŋaŋ qanareniŋte râec‐jopatec ranʒepieŋ. Go ine dâŋ i moc mi reŋkehuc juekic.”
17Irec Wofuŋzi ʒiŋuc mukac: “Manakic, no gunu menaneo bakopac izi Nilu opâ qape soc eocmu.
18Ehame Nilu opâo qowi hâmo‐fârepie Nilu opâ âsu fime Aigita ŋic jaŋe opâ nâzore mamakâc‐jopaocmu. Iŋuc fuame, no hâcne Wofuŋ jukopac, irec fuŋne mana tarazemec.” ’”
19Erâ Wofuŋzi Mose ʒiŋuc âzâcnewec: “Aroŋ ʒiŋuc âzâcnec, ‘Go gunuge rorâ Aigita mâreŋte opâ sasawa, opâ sâko mecne, opâwâc mecne, opâ ʒâkâŋ mecne, â opâ nombâŋ mecne irapec mege sicnetec opâzi soc efârezejec, ehuc Aigita mâreŋ sâko sâcke‐fârehuc opâ râqâc jâczi me qânâzi bakicne ira mâmâc fozejec.’”
20Mose â Aroŋ jahe Wofuŋzi dâŋ mutâcne‐jactewec irec sâcko wiac epic. Ehuc Aroŋ e Farao â ŋicfâcne jaŋere maio gunu‐ticne bâfeŋnerâ Nilu opâ qame soc efârewec hâcne.
21Eme Nilu opâo qowi jumbiŋ jaŋe hâmo‐fârepie opâ âsu fime Aigita ŋic jaŋe wemocko moc sâcne nanʒapiŋ. Ehame soczi Aigita mâreŋ sâckerâ fowec.
22Aigita qaŋgec bapa jaŋe ine mâsi soŋne bahuc ijaha embiŋ. Irec Farao e maŋsanaŋ erâ Wofuŋzi qanaŋ muwec irec sâcko ehuc mi mana‐jactewec.
23Ehuc râpec‐jofarâ ficticnao rawec, erâ wiac fuawec irec maname fârine mi ewec.
24Aigita ŋic sasawa jaŋe ine opâ nâniŋte Nilu opâ heririŋnao opâ nombâŋ rombiŋ. Nilu opâonec nâniŋte mamakâc‐jopawec irec.
25Wofuŋ e Nilu opâ qame wiac i fuarâ foha ʒoaŋ 7 tarawec.
