1“Jaŋe taha bapa junareniŋte mufiriec‐jopahuc kecʒiŋuc ezemec: Bulimakao ŋicne motec ɋâric moc erâ lama ŋicne sahac fâsâc jajahec rocjopazemec.
2Erâ poroŋ goreŋ tâmiric â poroŋ aŋacne goreŋ tâmiric jaha erâ poroŋ wokemaŋ ruacnekicne erâ poroŋ waizeŋ uucnezi bakicne i mâmâc rozemec.
3Rorâ kâdoc mocko râetec hume kâdoc mecne bulimakao ŋicne mecne â lama ŋicne jajahec mecne i mâmâc bafisizemec.
4Ehuc Aroŋ â ŋokâfâcne ejaretec tutumaŋ qoruc bozere motâcko ware domapie opâ rua‐jarezemec.
5Erâ tiri ŋaqi rorâ ŋaqi maŋne â sahacne â qoqonaŋ ŋaqi erâ amecte qâ i Aroŋ hecnetec huzejec â qoqonaŋ umbika jomacnezemec.
6Â duticne hecnetec hume du fainao tiri hendiŋ wâc hetec huzejec.
7Eme rurua wokemaŋ rorâ qizecnao hesierâ wokemaŋ ruacnezemec.
8Izi ŋokâfâcne jowac‐jopa warerâ ŋaqi maŋne hejaretec hume
9umbika joma‐jarezemec â dujeŋic basanaŋke‐jarezemec. Iŋuc ejarehaŋtec taha bapa gie i sâcmutâc dâŋ fofo sanaŋ irec sâcko mejeŋicko fezejec. Go iŋuc hâcne ehuctecne Aroŋ â ŋokâfâcne giere mufiriec‐jopazemec.
10“Eme bulimakao ŋicne tutumaŋ qoruc bozere motâcko jowa warezemec. Eme Aroŋ â ŋokâfâcne jaŋe mejeŋiczi bulimakao qizecne bânduŋkehapie
11motâc fuŋnao Wofuŋte maio qazemec.
12Qarâ bulimakao soc gâcne rorâ memotecgezi alata ʒuŋene ruacnezemec â soc gâcne ine alata fuŋnao hesiezemec.
13Erâ wokemaŋ sasawa hobu wiac foŋkerâ fokac i mecne â bugâpâc mecne erâ râpe hândâŋ jajahec wokemaŋnehec mecne mâmâc rorâ alata faio rikezemec.
14Biucne â sahacne â howiac‐ticne i ine sâqocne muhuc toma râpenao riketec ʒafârezejec.
15“Tarame lama ŋicne moc rotecne Aroŋ â ŋokâfâcne jaŋe mejeŋiczi qizecne bânduŋkehapie qazemec,
16erâ socticne rorâ alata rârec rârec tie razemec.
17Erâ lama ŋicne hezurâ hone â kikene ʒurerâ qizecne â dâkâne alata faio rike‐fârezemec,
18izi hâcne Wofuŋte qowi bâzi, âsu mumundoŋ fârine, Wofuŋte maio ʒoczi bâzi ririke hâcne.
19“Iŋuc erâ lama ŋicne moc i rorâ Aroŋ â ŋokâfâcne jaŋe mejeŋiczi qizecne bânduŋkehapie
20goki qâhâmorâ socticne gâcne izi Aroŋ â ŋokâfâcne hazec tofa‐jeŋic fâreopec â meneŋgoc fâreopec â kike neŋgoc fâreopec rua‐jarezemec; â soc gâcne ine alata rârec rârec tie razemec.
21Erâ ine soc alata faio fokac irecnec gâcne â rurua wokemaŋ i mâmâc rorâ Aroŋ mecne ŋokâfâcne mecne erâ wâc ŋaqi wiac‐jeŋic mâmâc tie‐jarezemec; iŋuc ejaretecne e jahacne â ŋaqi‐ticne erâ ŋokâfâcne â ŋaqi wiac‐jeŋic mâmâc tirine efâreniŋmu.
22“Eme wiac ʒiŋuc ro bâmoc ezemec: Lama fârinere wokemaŋ, gecne wokemaŋnehec, hobunere wokemaŋ erâ bugâpâc â râpe hândâŋ jahecne wokemaŋnehec erâ ŋefacne fâreopec (lama ŋicne i mumufiriere lama hâcne).
23Erâ nânâ poroŋ moc hâcbuc â poroŋ moc wokemaŋ opânehec bâsifuckerâ bakicne, erâ Wofuŋte maio poroŋ goreŋ tâmiric kâdochec ŋekac irecnec poroŋ moc.
24Wiac i sasawa Aroŋ â ŋokâfâcne mejeŋicko râetec foha Wofuŋte maio fenʒoŋkenʒepieŋ.
25Epie tarame mejeŋickonec rorâ Wofuŋte maio bâzi âsu mumundoŋhec eocte qowi bâzi rikerâ ijaha ʒuhuckerâ alata faio rikezemec wâc. Izi Wofuŋte maio ʒoczi ririke bâzi hâcne.
26“Eme Aroŋte mumufirie lama ŋicne irec amecne rorâ Wofuŋte maio fefenʒoŋkere bâzi eocte fenʒoŋketec gore biŋe ezejec.
27Eme go Aroŋ â ŋokâfâcne jaŋere mumufirie lama irec amecne â ŋefacne fenʒoŋkekicne i fefenʒoŋkere taha bâzi muhuc mutirizemec.
28Israe ŋicguru jaŋe Aroŋ â ŋokâfâcne jaŋere furi sanaŋ iŋuc hâcne râehuc junʒepieŋ. Israe ŋicguru jaŋe wama bâzi‐jeŋic rikeeŋgopieŋ irec tofane wiac izi hâcne taha bapa jaŋere biŋe ezejec. Jaŋe iŋuc epie Wofuŋ taha râcneŋgopieŋ eocmu.
29“Aroŋte tiri ŋaqi i eki hâmome ŋokâfâcne jaŋere biŋe ezejec. Eme jaŋe rojuhapie wokemaŋ opâ rua‐jarehuc taha giere mufiriec‐jopazo.
30Ŋokâfâcne jaŋeraonec moczi moc âkehoc‐ticne erâ taha bapa juhuc tutumaŋ qoruc bozeo raʒirâ taha gie baocmu eki hâcne ŋaqi i rojuhame ʒoaŋ gie bapa 7 tarazejec.
31“Mumufirie lama biucne ine rorâ tiri tomao rikezemec.
32Eme Aroŋ â ŋokâfâcne jaŋe lama biucne rikekicne i mecne erâ poroŋ kâdocko fokac i mecne mâmâc tutumaŋ qoruc bozere motâcko nânʒepieŋ.
33Jambuŋ‐jopahuc mufiriec‐jopazore wiac kiwiric‐jeŋic rokicne i hâcne nânʒepieŋ, wiac izi tiri fokacte ŋic omane moczi moc mi nâzejec.
34Biuc mecne poroŋ mecne jambuŋkekicne i tiwâne foha hae fureocmuo ine tiwâne hâcne ʒocko râetec ʒafârezejec, i tiri fokacte mi nâzo.
35“No dâŋ gaza qâmoc egarepo irec sâcko hâcne Aroŋ â ŋokâfâcne ejarezemec. Eme jambuŋ â mumufirie gie bahuc juhaŋtec ʒoaŋ gie bapa 7 tarazejec.
36Go ʒoaŋne ʒoaŋne bulimakao ŋicne rorâ Aroŋ â ŋokâfâcne jaŋere kiwiric rohuc sâqocne tâtâmire bâzi rikezemec. Erâ alatare kiwiric rohuc sâqocne tâtâmire bâzi rikezemec wâc, erâ jambuŋkezore wokemaŋ ruacnezemec.
37Alatare kiwiric roro gie i ʒoaŋ gie bapa 7 iŋuc bahuc jambuŋkezemec. Iŋuc etecne alatazi tiri jâmbâŋ ŋeocmu, â moczi moc alata bâuaocmu e tirificte biŋe eocmu.
38“Alata faio ine wiac kecʒiŋuc rike râec ezemec: Ʒoaŋne ʒoaŋne lama jajahec jara‐jekic wâŋ ekicne.
39Ine lama moc furicte â moc owâcne iŋuc rikec‐jofazemec.
40Lama bâbâni rikecmu ira poroŋ uucne oto moc irec teŋkonec wâŋ oliwa wokemaŋ tase mocjahahec bâsifuckekicne i erâ taha bapare waiŋ opâ sâc ijaha ʒuhuckezemec.
41Erâ lama moc ine owâcne bâzi rikezemec, ehuc poroŋ â waiŋ furicte taha râecmu sâc ijaha jâmbâŋ râetecne ʒoczi ʒâsi siŋkeme Wofuŋte âsu mumundoŋ fuazejec.
42Tiwâ bâzi i ʒoaŋ sâc mimiŋzi ɋâric tutumaŋ qoruc bozere motâcko Wofuŋte maio rikehuc junʒepieŋ. Ehame no dâŋ gazapemurâ ira gohec bâbâfuac ehuc juzeperec.
43Eme ijaha Israe ŋicguru jaŋehec bâbâfuac ehapene eri tatamac‐nanezi tiri bacjopazejec.
44Eme no iŋuc ehuc tutumaŋ qoruc boze mecne, alata mecne jambuŋkehuc Aroŋ â ŋokâfâcne mâmâc jambuŋ‐jopapemu, eme jaŋe nore taha bapafâc juhuc kiŋaŋ qanarenʒepieŋ.
45Ehame no Israe ŋicguru ŋondeŋ‐jeŋicko ŋec juc ehuc Anutu‐jeŋic erâ juzepac.
46Iŋuc epe jaŋe, no Wofuŋ Anutu‐jeŋic, noni hâcne ŋondeŋ‐jeŋicko ŋec juc epemurâ Aigita mâreŋkonec batarac‐jopapo i hone mana tarac enʒepieŋ. Wofuŋ Anutu‐jeŋic no hâcne.
