1“Tiri boze i qoruc sanaŋ 10 izi bazemec, ine qoruc fâfâsâc â âmuc âmucne â bâbâroŋ furi sâko â keŋkeŋne izi bazemec, ehuc qoruc i mutec qâreŋnehec fupie kerubim hawari fuazejec.
2Qoruc sanaŋ moc ʒoricne‐ticnere sâc i kubi 28 â otecne‐ticne kubi 4 iŋuc efârezejec. Qoruc sanaŋ 10 i sasawa sâc ijaha bafârezo.
3Ŋifec qoruc 5 ʒuʒuhuc ezo â ŋifec qoruc 5 iŋuc jaha ʒuʒuhuc ezo.
4Erâ qoruc sanaŋ mocte qaŋeŋnao jâmbâŋ qoruc keŋkeŋnezi ʒâʒâfickere muc barâ râezemec, erâ qoruc sanaŋ mocte qaŋeŋnao jâmbâŋ ijaha ezemec.
5Qoruc moc ʒâʒâfickere muc 50 â qoruc moc ʒâʒâfickere muc 50 jaha qoruc qaŋeŋnao basanaŋkezemec, ʒâʒâfickere muc i qoruc ŋifec â ŋifec sâckoa forazejec.
6Eme go heheawic‐ticne 50 golzi bazemec, erâ heheawic izi qoruc ʒâficketec tiri boze mocjaha fuazejec.
7“Erâ noniŋ kanʒaŋnezi qoruc moc barâ tiri boze fainao râetec forazejec, qoruc iŋucne 11 bazemec.
8Qoruc buc buc i ʒoricne‐ticnere sâc kubi 30 â otecnere sâc kubi 4 ezejec, qoruc 11 jaŋere sâc mocjaha fuazejec.
9Eme qoruc 5 jaŋe moc buc ʒâfic‐jopazemec, erâ qoruc 6 jaŋe iŋuc jaha moc buc ʒâfic‐jopazemec, erâ qoruc namba 6 i ine qazurâ qoruc boze mamai râetec faio fefec fozejec.
10Ʒâʒâfickere muc 50 i qoruc qaŋeŋnao fokac irec mecnao râe razemec â ʒâʒâfickere muc 50 jaha i qoruc ʒuhucke itic ekicne irec qaŋeŋnao râe razemec.
11Erâ go heheawic‐ticne 50 aeŋ bâbâroŋzi barâ ʒâʒâfic‐ticnao esoriezemec, iŋuc ehuctecne qoruc ʒâficketec mocjaha ezejec.
12Eme qoruc bozere qoruc tofane foocmu, qoruc nâfocne hâcne, i tiri boze râpenao behepie waha domazejec.
13Erâ qoruc ʒoricnere tofane i ŋifec kubi mocjaha â ŋifec kubi mocjaha jaha waha domahuc tiri boze sâockezejec.
14Wiac i batec tarame qoruc boze bupunere qofac moc noniŋ kanʒaŋne peŋ bâbâroŋzi rikekicne izi barâ râezemec, erâ fainao sâsâoc moc lama ŋicnere sahaczi barâ qârufacnetec fozejec.
15“Tarame tiri bozere katapa fasaezemec, ine jâmiŋzi fasaerâ hâŋ âecketec safatariŋ iŋucne domazejec.
16Katapa ʒoricnere sâc kubi 10 â otecnere sâc kubi moc â nâfocne.
17Katapa sasawa bareŋ‐jeŋic jajahec jajahec iŋuc bazo, i ʒuʒuhuc eniŋte tiri boze katapa‐ticnere iŋuc hâcne efârezo.
18Katapa ʒare‐ticne ine ʒiŋuc fuazejec: Sâpe juwic mâreŋkopec ira katapa 20 âeckezo;
19erâ rurumaŋnao râqâc siliwazi bakicne 40 hetec ŋezejec, katapa mocte râqâc jajahec, katapa mocte jajahec, iŋuc hetec sâcke‐fârezejec.
20Eme sâpe faic mâreŋkopec iŋuc jaha katapa 20 âeckezemec;
21ehuc râqâc‐ticne 40 i siliwazia bazo, katapa mocte râqâc jajahec, katapa mocte jajahec jaha.
22Sâpe ʒoaŋ huhunaopec, fic râpenao hâcne, ira ine katapa 6 fasaerâ âeckezemec.
23Erâ fic râpenere gurucko katapa jajahec âeckezemec.
24Eme katapa i juwic rârâwiŋ domahuc feku faic hoŋeŋeŋ micne foocmuo iitic ezepirec. Ŋifec â ŋifec iŋuc hâcne domapire gurucne fuazejec.
25Katapa 8 jaŋe hâcne râqâc‐jeŋic siliwazi bakicne iŋuc doma ranʒepieŋ, katapa mocte râqâc jajahec, mocte jajahec, iŋuc ŋerapie râqâc 16 ezejec.
26“Erâ go babasanaŋ‐ticne jâmiŋjâczi bazemec.
27Babasanaŋ 5 tiri boze neŋgoc ŋifecte biŋe â 5 izi tiri boze neŋgoc ŋifecte biŋe, â babasanaŋ 5 izi ine tiri bozere sâpe râpene, ʒoaŋ huhunaopec fokac irec biŋe.
28Babasanaŋ ʒâʒâŋiŋko fokac izi katapa ombâŋnao ŋifeckonec ware raku ŋifecko tarazejec.
29Katapa sasawa ine golzi ɋorockezemec, erâ babasanaŋte raraʒi i golzia bazemec, â babasanaŋ i wâc iŋuc jaha golzi ɋorockezemec.
30Go iŋuc ehuctecne tiri bozere hawari tikio gowatukicne irec sâcko âkendâŋnezemec.
31“Erâ ʒuhuckerâ qoruc furi sâko keŋkeŋne â âmuc âmucne â bâbâroŋ fâfâsâc izi ââketâc moc bazemec, ehuc mutec qoruc i qâreŋnehec fupie kerubim hawari fuazejec.
32Erâ qoruc ââketâc i jâmiŋ wâtuŋ 4 golzi ɋorockekicne â heheawic‐ticne golzia bakicne ira ɋetickezemec, jâmiŋ wâtuŋzi ine râqâc siliwazi bakicne irec faio domazejec.
33Erâ qoruc ââketâc i heheawic juwicnao fifitaczi basanaŋketec waha domazejec, ehame qoruc ââketâc râpenao qorac tapa katapa hetec ŋezejec; eme qoruc ââketâczi hâcne furufic â furu dindiŋ irec aka domazejec.
34Go mumutaniŋ katapa furu dindiŋko ŋekac irec fainao tapane hetec ŋezejec.
35Erâ tebo i ââketâc sahacnao hetec ŋeha lambe wâtuŋne tiri boze juwic mâreŋkopec tebo ŋifecnao domazejec, tebozi ine faic mâreŋkopec hetec ŋezejec.
36“Qoruc bozeo raraʒire motâc moc i qoruc furi sâko keŋkeŋne â bâbâroŋ, qoruc fâfâsâc izi bazemec, qoruc geroŋkeeŋgopieŋ irec sâc hâcne.
37Ââketâcte qoruc irec jâmiŋ wâtuŋ 5 fasaerâ golzi ɋorockezemec, â ɋeɋetic‐ticne i golzia bazo erâ wâtuŋte râqâc 5 jaha i aeŋ bâbâroŋzi ba akic ehuc bazemec.
