1Eme Wofuŋzi Aigita mâreŋko Mose â Aroŋ ʒiŋuc mupaŋke‐jactewec:
2“Ŋoŋe mosa kecʒirec manapie fufuŋke mosa ezejec. Jara sâc mosa ʒizi gâcne sasawa bânie‐jarezejec.
3Erâ Israe kikefuŋ mâmâc sâko sâcmutâc ʒiŋuc ejarenic: Mosa kecʒirec gie bapa namba 10 ira ŋicne ŋicne jaŋe ŋokac naru motecfâc‐jeŋic jaŋere lama motec wâŋ wâŋ ronʒepieŋ, moc e garikiŋfâc‐ticne jaŋere lama wâŋ, moc e wâŋ, iŋuczi iŋuc.
4Â fic mocko ŋic ŋokac naru motec afecne juniŋmu, lama motecne mi nânâ‐fârene, ine fic jajahec, didigurac ŋekopireczi lama motec mocjahare turezepirec. Ŋic ŋokac naru motec hobu‐jeŋicte sâc manahuc fic wezimuc lama mocte biŋe musanaŋkezo.
5Erâ lama motec ŋicne sahac furu, jara‐jeŋic wâŋ, iŋucne sawa rocjopazo, lama motec me noniŋ motec.
6Baʒawiec‐joparâ bacjopa juhapie mosare gie bapa namba 14 ehame hae owâeme Israe kikefuŋ guru mâmâc sâko lama motec serec jaha hezuc‐jopanʒepieŋ.
7Erâ socjeŋic gâcne rorâ izi, fic maŋnao ŋehuc nâniŋmu, fic irec motâcte wâtuŋ ŋifec â ŋifec erâ jâc otecne faic rikenʒepieŋ.
8A biucne ŋafe ijaha ʒegoc ʒame nânʒepieŋ. Poroŋ goreŋ tâmiric erâ wâc rehac hâtâne ihec nânʒepieŋ.
9Qowi i ɋâricne me opâ sicko ʒakicne mâcne, ʒegoc sasawa rikerâ nânʒepieŋ, ine qizecne â me kikene â fâri ombâŋne furu foha ʒame nâzo.
10Â tiwâne ine moc mi ŋeha hae furezejec; moc ŋeha hae fureocmuo ine ʒocko râepie ʒâtâmirezejec.
11Erâ kecʒiŋuc ehuc nânʒepieŋ: Umbika‐ŋeŋic jomarâ, kikehuhu‐ŋeŋic hepie huha, gunu‐ŋeŋic baŋehuc fârohec nânʒepieŋ. Fuŋne ʒiŋucte: Wofuŋzi akic‐ŋopahuc ŋowaruocmu.
12No ŋafe ijaha Aigita mâreŋ fotâcnehuc mârâc fufuafâc‐jeŋic, ŋic mecne qowi mecne, jopa‐fârepemu, â Aigita nemufâc‐jeŋic jaŋerao okac babazu gie bapemu, Wofuŋ noni hâcne.
13Soczi fic juŋgopieŋko maŋeŋic ezejec, soc i honerâ ŋowarupemu, eme Aigita mâreŋko ima sâko bâfuahape ŋoŋerao wiac hâhâwicne moc mi fuahuc sipiric‐ŋopazejec.
14“Eme ʒoaŋ izi hombaŋ‐ŋeŋic ezejec, i jara sâc ŋehuctecne Wofuŋzi wiac ewec irec manasuhuc junʒepieŋ; mimiŋzi ɋâric mâsi i basanaŋkerâ bajupie hata sanaŋ foŋarezejec.
15Ŋoŋe poroŋ goreŋ tâmiric nâhuc juhapie ʒoaŋ gie bapa 7 tarazejec. Gie bapa namba wâŋ ira goreŋ ficŋeŋickonec bârârienʒepieŋ. Eme moc e poroŋ goreŋhec nâocmu e Israe guruonec tuŋkepie huzejec. Dâŋ izi gie bapa wâŋkonec sâcmutâc‐ŋeŋic foraku 7‐ko tarazejec.
16Ʒoaŋ gie bapa wâŋ ira tutumaŋ tirine moc enʒepieŋ, erâ ʒoaŋ namba 7 ira tutumaŋ iŋucnea mocwâc fuazejec. Gie bapa jajahec mukicne ira gie moc mi banʒepieŋ, mâc ŋiczi nânâ nâniŋmu sâc i sawa rike bâmoc enʒepieŋ.
17Erâ goreŋ sowa jujure sâcmutâc i mana rereŋ enʒepieŋ. No ʒoaŋ ira hâcne ŋic ŋokac naru motecfâc‐ŋeŋic Aigita mâreŋkonec batarac‐ŋopapo. Irec ŋoŋe mimiŋzi ɋâric gie bapa irec manasurâ mâsi i basanaŋkerâ bajupie hata sanaŋ foŋarezejec.
18Fufuŋke mosa irec ʒoaŋ gie bapa namba 14 owâcne fuŋkerâ goreŋ sowa jufeku ʒoaŋ namba 21 owâcnea behenʒepieŋ.
19Ficŋeŋicko goreŋ moc mi ŋeha ʒoaŋ gie bapa 7 tarazejec, irec jaba me mâreŋ rune moc e poroŋ goreŋhec nâocmu, e tuŋkepie Israe kikefuŋ râpenao huzejec.
20Wiac goreŋnehec moc mi nânâ ficŋeŋic sâc goreŋ sowa jufârenʒepieŋ.”
21Eme Mose e Israe ŋic micnefâc‐jeŋic hetumaŋ‐jopa‐fârerâ ʒiŋuc jazawec: “Ŋoŋe ra garikiŋfâc‐ŋeŋic jaŋere sâc manahuc lama bâwosâec‐joparâ aakic lama qa hezuc enʒepieŋ.
22Erâ soroqec rehacne rorâ soc otoo fokac ira âke uruckerâ izi motâcte wâtuŋ ŋifec â ŋifec â otecne faic rikenʒepieŋ. Erâ ŋoŋeraonec moczi moc hae mi fureha fickonec mi wahazejec.
23Wofuŋ e Aigita ŋic jopaocte mâreŋ fotâcne raocmu hâcne. Ehuc jâc otecne faic â motâcte wâtuŋ jajahec ira soc honerâ motâc jâuruhuc ima bapa aŋelo aka hecneme ŋopaocte ficŋeŋicko mi feocmu.
24Ŋaŋacne â ɋâricfâc‐ŋeŋic ŋoŋe mâsi i basanaŋkerâ bajupie hata sanaŋ foŋarezejec.
25Eme Wofuŋzi mâreŋ biŋe qaŋarewec i ŋareme raʒirâ hata i hâcne âtehuc junʒepieŋ.
26Eme naru motecfâc‐ŋeŋic jaŋe, ‘I fuŋne weniŋucte eeŋgopieŋ?’ iŋuc wio‐ŋarepie
27ʒiŋuc jazanʒepieŋ: ‘I Wofuŋte aakic tiwâ bâzi. Eki hâcne Aigita ŋic jopahuc Israe ŋic Aigita mâreŋko jumbiŋ, jaŋere fic jowaruhuc akic‐jopawec.’” Iŋuc mume ŋic ŋokac jaŋe manarâ fodapehuc numumbiŋ.
28Erâ Israe ŋicguru jaŋe ra iŋuc embiŋ; Wofuŋzi Mose â Aroŋ mujactewec irec sâcko embiŋ hâcne.
29Eme ŋafe ʒâŋiŋko Wofuŋzi Aigita mâreŋko mârâc fufua sasawa jopa‐fârewec. Faraore mârâc ŋokâ, juku tucticne qaocte mukicne, erao hâcne fuŋkerâ jopa raku kâpâcwâru ŋic jaŋere mârâc ŋokâfâc jaŋerao jopa tarawec, erâ qowi sasawa jaŋerao sâc ijaha ewec.
30Iŋuc eme Farao â kiŋaŋŋicfâcne erâ Aigita ŋic sasawa jaŋe ŋafeo faharerâ kio owa sâko epie Aigita mâreŋ sâcke‐fârewec. I fic sasawa ira qâŋɋâŋ fua‐fârewecte iŋuc fuawec.
31Eme Faraozi ŋafeoa Mose â Aroŋ hefârec‐jofarâ muwec: “Ajoc, ŋohe mecne Israe ŋicguru mecne, ŋoŋe fahare ŋicfâc‐nane behec‐joparâ raniŋ; ehuc mumbiŋ irec sâcko ra Wofuŋ kiŋaŋ qacneniŋ.
32Erâ lama bulimakaofâc‐ŋeŋic mâmâc amec‐jopa raniŋ; eme nunumu‐ŋeŋicte fârine i norao fotâcnezejec wâc!”
33Eme Aigita ŋic jaŋe Israe ŋicguru ʒiŋuc muhuctecne mâreŋ‐jeŋic beheniŋte fâro boc ejarembiŋ: “Nâŋe hâmocte biŋe efâreŋgopeneŋ.”
34Eme Israe ŋicguru jaŋe poroŋ goreŋ tâmiric mi ʒakicne, ɋâricne foha otohec rorâ ŋaqi‐jeŋiczi foŋkerâ ɋawe‐jeŋicko herâ rambiŋ.
35Erâ Mosezi moc mutâcne‐jarewec i wâc iŋuc jaha embiŋ: Eri wiac siliwa â golzi bakicne â ŋaqi wiac irec Aigita ŋic numu‐jarembiŋ hâcne.
36Eme Wofuŋzi Aigita ŋic ejareme jaŋe Israe ŋicguru âgo ejarehuc mana urue‐jarerâ wiac numu‐jarembiŋ sâc jare‐fârembiŋ. Iŋuc ehuc Aigita ŋic jaŋere wiac jowac rombiŋ hâcne.
37Eme Israe ŋicguru jaŋe Ramasesi hae beherâ Sukoti haeo rambiŋ. Kikezi rambiŋ ŋic i jaŋere ʒare 600 tauseŋ qâririŋ, ŋokac naru motec ine mi wosec‐jopakicne.
38Erâ ŋic jaba bocjahazi jaŋehec mâmâc rambiŋ, erâ lama bulimakao guru sâko jaha.
39Eme Aigita mâreŋkonec poroŋ ɋâricne barambiŋ i goreŋ tâmiric rike nâc embiŋ. Jaŋe Aigita mâreŋ beheniŋte fâro ejarehuc bâsuec‐jopambiŋte dameŋ basahuc poroŋ goreŋhec mi bâsifuckembiŋ hâcne. Ehuc hatare nâsiŋ gâcne wâc mi barambiŋ.
40Israe ŋicguru jaŋe Aigita mâreŋko juwefukuhapie jara 430 tarawec.
41Eme jara 430 tarawec ʒoaŋ ira jâmbâŋ Wofuŋte ŋicfâc guru sâko jaŋe Aigita mâreŋ beherâ rambiŋ hâcne.
42Wofuŋzi Israe ŋic Aigita mâreŋkonec jowac‐jopa rawec, ŋafe i guŋɋâri juju ŋafe hâcne. Eme Israe ŋicguru jaŋe mimiŋzi ɋâric ŋafe i hâcne Wofuŋte erâ guŋɋâri jaha jumbiŋzi jueŋgopieŋ.
43Eme Wofuŋzi Mose â Aroŋ ʒiŋuc jasawec: “Aakic hombaŋte hata sanaŋ ʒiŋuc fozejec: Jabazi aakic lama moc mi nâjâmbâŋkezejec.
44Kiŋaŋ qaqa moneŋzi furi bacjopakicne jaŋe ine sahac‐jeŋicko ma bajarepie sâcne nâniŋmu.
45Kiŋaŋ qaqa omane me mâc qâtec‐ŋoparâ juocmu, iŋucnezi ine aakic lama moc mi nâzejec.
46Aakic lama i fic mocjahao turerâ nânʒepieŋ, ehuc fickonec tiwâne mac moc mi bawahanʒepieŋ, â aakic lamare siec wiac moc mi qazunʒepieŋ.
47Dâŋ i Israe kikefuŋ mâmâc sâkozi reŋke‐fârenʒepieŋ.
48Ŋic jabane moczi ŋoŋehec juhuc aakic lama nâzo mume ine e jahacne sahacko mecne, ŋic â motecfâc‐ticne jaŋere sahacko mecne ma bapie sâcne nâocmu, eme e ŋoŋe iŋucne mâreŋ rune jaha erâ juzejec. Sahacnao ma mi bakicnezi ine mi nâzejec.
49Mâreŋ rune â ŋic jabane ŋoŋehec jueŋgopieŋ ŋoŋere sâcmutâc mocjaha fozejec.”
50Eme Israe ŋicguru jaŋe ʒeŋgoma iŋuc embiŋ, Wofuŋzi Mose â Aroŋ mutâcne‐jactewec irec sâcko embiŋ hâcne.
51Eme Wofuŋ e Israe ŋic gurune gurune ʒoaŋ ira hâcne Aigita mâreŋkonec jowac‐jopame wahambiŋ.
