1Midiaŋ mâreŋkonec taha bapa ŋic moc ʒâŋene Jetoro, Mose kimo‐ticne hâcne, e Anutuzi Mose â Israe ŋic ehâmo‐jarewec, erâ Wofuŋ e Israe ŋic Aigita mâreŋkonec jowac‐jopa wahawec irec biŋe mana‐fârewec.
2Irec Mose kimo‐ticne Jetoro e Mosezi juwicnao ŋonâŋ‐ticne Ʒibora â ŋokâ jahec‐ticne râec‐jopame risiembiŋ jaŋe Moserao jowac‐jopa raocte hefârec‐jopawec.
3Motec mocte ʒâŋe i ʒiŋuc muhuc Geresom mukicne: “No mâreŋ furunao jaba jukopac.”
4Mocte ʒâŋe ine ʒiŋuc muhuc Elieʒe mukicne: “Mamac‐nanere Anutuzi bafic‐nane juhuc Faraore ʒikaonec bataracnuwec.”
5Eme Jetoro, Mose kimo‐ticne hâcne, e Mose ŋonâŋ‐ticne â ŋokâ jahecne jowac‐jopa raku mâreŋ burocnao Anuture tikio Mosezi ŋec juc ewecko fisiwec hâcne.
6Ehuc Moserao dâŋ ʒiŋuc râeme rawec: “Go manac, kimoge Jetoro no â ŋonâŋ ŋokâfâcge nâŋe gorao fâzo eŋgopeneŋ.”
7Eme Mose e kimo‐ticne hatao bâfuaocte rawec. Raku bâfuarâ maŋfuŋnao fodaperâ muduckewec. Eme jahe juju‐jekicte muc manac eraku qoruc bozemaŋko fepic.
8Eme Mose e Wofuŋzi Israe ŋic jaŋere erâ Farao â Aigita ŋic jaŋerao wiac ewec bawec irec dâŋ binaŋ kimo‐ticne ninic ecne‐fârewec. Erâ hatao juhapie ʒârâ ʒâpâ wiac fua‐jareme Wofuŋzi hone kitaŋ ejarewec irec bianŋ i mâmâc bacnewec.
9Iŋuc eme Jetoro e Wofuŋzi Israe ŋic ehâmo‐jarewec â Aigita mâreŋkonec batarac‐jopawec irec binaŋ sasawa manarâ bubiaŋ manahuc ʒeri bari ewec.
10Erâ Jetorozi muwec: “Aigita ŋic â Farao jaŋere meonec batarac‐ŋopawec â ŋicguru ʒi Aigita kâpâcwâru‐jeŋickonec firuec‐jopawec, Wofuŋ e hâcne muteŋ bâteŋ ecnezo.
11No ʒi manakopac: Wofuŋ e nemu fuŋne fuŋne siric‐jopa‐fârerâ femicne sâko jukac. E Aigita ŋic jaŋe ŋicguru ʒi bomboŋ ejarehapie mejeŋickonec batarac‐jopawec hâcne.”
12Eme Mose kimo‐ticne Jetoro e Anutu qowi bâzi â taha bâzi rikecnewec. Ehame Aroŋ â Israe ŋic micnefâc‐jeŋic sasawa jaŋe Anuture maio Mose kimo‐ticnehec tiwâ ʒepec nâniŋte bozeo raʒimbiŋ.
13Hae fureme Mose e ŋic jaŋerao mumutiŋ gie baocte waha ŋeha ŋic jaŋe Mosere maio furicte fuŋkerâ domahuc juhapie hae owâewec.
14Eme Mose kimo‐ticne e Mosezi ŋic jaŋerao gie sasawa bahuc juwec i hone‐fârerâ muwec: “Go ŋic jaŋerao keci wemo gie bakomec? Erâ go wemocte gie i buc bahuc ŋehaŋtecne ŋic jaŋe gore maio fuŋkerâ ware domahuc juhapie hae ŋafekac?”
15Eme Mosezi kimo‐ticne âzâcnewec: “Ŋic jaŋe Anutu mu wioc ecnezo norao wareŋgopieŋte bakopac.
16Jaŋe dâŋjeŋic moc fuame norao wareeŋgopieŋ, eme noni dâŋjeŋic mutarahuc Anuture dâŋsanaŋ â mumupaŋ dâŋ mutâcne‐jareekopac.”
17Iŋuc mume kimo‐ticnezi âzâcnewec: “Go wiac keci etecne mi sâckekac.
18Ŋoŋe iŋuc epie gore tâpiri mecne â ŋic gohec juŋgopieŋ jaŋere tâpiri mecne i biac wahaocmu. Gie keci i ŋemâcne, irec go buc bapare sâc mi ekac.
19Irec no dâŋ moc gazape manahuc juhaŋte Anutuzi gohec juzejec. Go ŋic jaŋere erâ Anuture maio fuazemec, ehuc dâŋ wiac‐jeŋic muzemec.
20Erâ dâŋsanaŋ â mumupaŋ dâŋ mutâcne‐jarehuc hata raniŋte â wiac ebac eniŋte mukicne i wâc jaza jowatuc ezemec.
21Iŋuc ehuc ine jaŋere ŋondeŋkonec ŋic asa faio gie bapane â Wofuŋ araŋ babacne, siocmâc â mu bâmiriŋ dâŋ qiqikiŋ, iŋucne bâwosâec‐joparâ micne râec‐jopazemec. Eme gâcne jaŋe ŋic tauseŋ, gâcne jaŋe 100, gâcne jaŋe 50, gâcne jaŋe 10 jaŋere micne junʒepieŋ.
22Ehuc dameŋ sâc dâŋjeŋic mutiŋne‐jarehuc mutara‐jarenʒepieŋ. Dâŋ ŋemâcne sasawa gorao râenʒepieŋ, aafecne ine jaŋe jaŋac mutiŋne‐jarehuc mufâsâenʒepieŋ. Iŋuc epie gore giezi afeckeha jaŋe tagi ŋifec dehuc go baficgunʒepieŋ.
23Go iŋuc ecmuo ine Anutuzi giedâŋ mugarewec i sâcne bahuc jucmu â ŋic ŋokac ʒi jaŋe ʒeŋgoma maŋjeŋic taraha bumâteŋko fic boze‐jeŋicko risieniŋmu.”
24Mose e kimo‐ticnezi dâŋ âzâcnewec sâc mana rereŋ efârewec.
25Ehuc Israe ŋic gurune gurune jaŋeraonec ŋic ropaŋ‐jeŋichec rowosâec‐joparâ ŋic ŋokac jaŋere micne râec‐jopawec, gâcne ŋic tauseŋ jaŋere micne, gâcne ŋic 100, gâcne ŋic 50, gâcne ŋic 10 jaŋere micne râec‐jopawec hâcne.
26Ehuc ŋic ŋokac jaŋere dâŋ dameŋ sâc mutiŋne‐jarehuc dâŋ ŋemâcne erao râeniŋte â aafecne ine jaŋe jaŋac mutaraniŋte mujarewec.
27Mose e iŋuc erâ kimo‐ticne mâzockeme mâreŋ‐ticnao risie rawec.
