Ɛgezɔde 36

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

¹«Ɓɛsaleyɛle ta Wɔɠɔliyaɓe, ta zunuiti kpein ti zooni faa la, niiti Ɠɔoɠɔ GALAGI ɠimalai ta keleɠelegi ʋuuni ti-yiimaʋɛ, ti zoo ti botii ɠɛ, eɠɛʋelei seizu ɲadegai naama wotii kpein ga ɠɛ la, ti lɔɔni botii zu, eɠɛʋelei Ɠɔoɠɔ GALAGI ma levei veeni la.»

²Moize Ɓɛsaleyɛle ta Wɔɠɔliyaɓe lolini, ta zunuiti kpein ɠigi ɠɛni ti ma, niiti Ɠɔoɠɔ GALAGI keleɠelegi ʋuuni ti-yiimaʋɛ, niiti kpein ti-ɠigiti kɛʋele ɓɛtɛni ga ti ɠolo botiiti kɛɛ vai zu.

³Ti vebɛaniiti kpein seɠeni Moize ɠaazu, niiti Izelayɛle nuiti ti daani ɠisu, ti ʋaa la, naa ɠa a kɛ, seizu ɲadegai ma wotii ɠɛ. Sobu-o-sobu, nuiti ti ɠɛni ʋaazu ga vebɛaniiti Moize ʋɔ bɛ mɔnɔ.

⁴Názu ɠa ɲɛɛliɠi nuiti kpein ti ɠɛni seizu ɲadegai ma wotii ɠɛɛzu, ti ɠilagilagi ti botiiti zɛni ná la, niiti ti ɠɛni ti ɠɛɛzu,

⁵ti ʋaani, ti ɠɛ Moize ma: «Nuɓusɛiti ta wola ʋaazu la, é ʋooʋa botiiti kɛɛ vai ma, nii Ɠɔoɠɔ GALAGI deveai ga é ɠɛ.»

⁶Moize devei woni ga ti sezei wo ti-ʋuuzuʋɛ, ga: «Nu nɔpɛ, zunu ɓaa anzanu, ta mina mɔ vebɛani ɠɛʋele ɓɛtɛ seizu ɲadegai vaa zu.» Zekana ti pele leʋeni la nuɓusɛiti tuɠɔ, ti ʋa ʋa ga ta.

⁷Sɔɔlaiti ti ti ɓɛtɛni, ti kula ɠɛɛni, é ʋooʋa botii kpein ma, é ɠɛni ɠɛɛzu.

⁸Zunuiti saama, niiti kpein ti zoogai faa la, ɲɛɛliɠi vai zu, ti seɠe ʋɛlɛ ɲadegai ɓɛtɛni ga tanda puugɔ, ga geze ʋagɔi kpaliai, ta geze ɓiinii, ta ma ɓɔigi, ta ma ɓɔi sɔsɔgi. Ti suʋuni ga seeluɓɛinti ma votoi.

⁹Tanda ɠilagi zakpai ɠɛni ga mɛtɛlɛ puugɔ maazu naanigɔ (14), kogi ɠɛ ga mɛtɛlɛ felegɔ. Kɔɠɔgi ɠɛni ga ani ɠila nɔ tandaiti kpein faa zu.

¹⁰Ti tanda lɔɔlugɔiti seini ɓɔɠɔ la, ti zɔ lɔɔlugɔiti ɓalaa sei ɓɔɠɔ la.

¹¹Ti galu ɓiiniiti giliɠilini tandai ma ɓɔsu mɔungi laamaʋɛ. Ti kɛɛni ɠana nɔ ga tandai ma ɓɔsu velesiɛi laamaʋɛ.

¹²Ti galu ʋuulɔɔlugɔ (50) ɠiliɠilini tandai ma ɓɔsu mɔungi laamaʋɛ ʋa, ti galu ʋuulɔɔlugɔ (50) ɠiliɠili tandai ma ɓɔsu velesiɛi laamaʋɛ ʋa. Naama ɠaluiti ti zolooni ɓɔɠɔ ma ga felefele.

¹³Ti zanu kala puulɔɔlugɔ (50) ɓɛtɛni, ti tandai ma ɓɔsuiti giliɠili ɓɔɠɔ ʋa ga tiye. Seɠe ʋɛlɛ ɲadegai ɠɛni ga ani ɠila kpe nɔ.

¹⁴Ti boli leɠa landa puugɔ maazu ɠila (11) kpɛtɛni, ti ti ʋɛɛ seɠe ʋɛlɛ ɲadegai ɠɔma.

¹⁵Tanda ɠilagi zakpai ɠɛni ga mɛtɛlɛ puugɔ maazu lɔɔlugɔ (15), kogi ɠɛ ga mɛtɛlɛ felegɔ. Kɔɠɔgi ɠɛni ga ani ɠila nɔ tanda puugɔ maazu ɠilagiti (11) bɛ.

¹⁶Ti tanda lɔɔlugɔiti giliɠilini ɓɔɠɔ ʋa, ta ti zɔ lɔzitaiti giliɠili ɓɔɠɔ ʋa.

¹⁷Ti galu ʋuulɔɔlugɔ (50) ɠiliɠilini tandai ma ɓɔsu mɔungi laamaʋɛ, ti galu ʋuulɔɔlugɔ (50) ɓalaa giliɠili tandai ma ɓɔsu velesiɛi laamaʋɛ.

¹⁸Ti kɔlu ɓɔi kala puulɔɔlugɔ (50) ɓɛtɛni, naa ɠa a kɛ tandai ma ɓɔsuiti ti zei da ga tiye, ti ɠɛ ga ani ɠila nɔ.

¹⁹Ti baala sinɛ ɠɔlɔiti kpɛtɛni ga pɛɛmazeɠei, toai ga ma ɓɔigi, seɠe ʋɛlɛi ʋɛ, ti nuni ɠɔlɔiti ma ʋɛɛmazeɠei ʋɛɛ maazu.

²⁰Ti kpɛdɛgiti kpɛtɛni seɠe ʋɛlɛ ɲadegai ʋɛ ga akasia wulu zɛʋɛiti. Ti lɔɔɓadɔni seɠe ʋɛlɛi zuzo fai zu.

²¹Kpɛdɛgi zɔligɔi ɠɛni ga mɛtɛlɛ lɔɔlugɔ, kogi ɠɛ ga mɛtɛlɛ ɠaaɠwɛsui.

²²Kpɛdɛgi ɠilagilagi pɛ kpadɔzuʋɛ ɠaazobani ma wulu zɛʋɛ felegɔi ʋa. Zekana ti kɛɛni la seɠe ʋɛlɛ ɲadegai ma ɓɛdɛgiti kpein ba.

²³Ti kpɛdɛ ʋuufelegɔ (20) ɓɛtɛni seɠe ʋɛlɛ ɲadegai ʋɛ, ti ɠɛni nu yeezazu ʋelei.

²⁴Ti dabu ʋuunaanigɔiti (40) kpɛtɛni ga walii, ti ʋa la kpɛdɛ ʋuufelegɔiti (20) gilagilagi wu, kpadɔzu felegɔiti bɛ.

²⁵Ti kpɛdɛ ʋuufelegɔ (20) ɓɛtɛni ɓalaa seɠe ʋɛlɛ ɲadegai ʋɛ, nu ɠɔʋɛzu ʋelei.

²⁶Ti dabu ʋuunaanigɔiti (40) kpɛtɛni ɓalaa ga walii, ti ʋa la kpɛdɛ ʋuufelegɔiti (20) gilagilagi wu, kpadɔzu felegɔiti bɛ.

²⁷Ti kpɛdɛ dɔzita ɓɛtɛni seɠe ʋɛlɛ ɲadegai ɓogaʋɛ, folo liizu ʋelei.

²⁸Ti kpɛdɛ felegɔ ɓɛtɛni seɠe ʋɛlɛ ɲadegai ma zoko felegɔiti bɛ, ti kpogaʋɛ.

²⁹Ti ɠilini kpɛdɛgi zɔiti ba, é zo buuʋɛ, é zeeli bala mɔungi ma ungaʋɛ. Ʋele ɠana é ɠɛni la ga ti felegɔ, ti ʋilɛgai soko felegɔiti su.

³⁰Kpɛdɛ dɔsaʋa ɠa naazu, é ɠɛni seɠe ʋɛlɛ ɲadegai ɓogaʋɛ, é ʋɛɛ ta-labu puugɔ maazu lɔzitaiti (16) ba, ti ɓɛtɛai ga walii, kpɛdɛ gila dabu felegɔ.

³¹Ti gulu zɔkpɔ lɔɔlugɔ ɓɛtɛni kpɛdɛgiti bɛ ga akasia wului, ti ɓesa seɠe ʋɛlɛ ɲadegai ɠakamaʋɛ ɠilagi,

³²ta gulu zɔkpɔ lɔɔlugɔ seɠe ʋɛlɛ ɲadegai ɠakamaʋɛ zɔɔla ʋelei ma ɓɛdɛgiti bɛ, ta gulu zɔkpɔ lɔɔlugɔ seɠe ʋɛlɛ ɲadegai ɓogaʋɛ ma ɓɛdɛgiti bɛ, folo liizu ʋelei.

³³Ti zaamazu wulu zɔkpɔi ɓɛtɛni, ga é kpɛdɛgiti maaleʋe, é zo kwɛgi ma, é li zɔɔla ʋelei.

³⁴Ti zanugi ziɛni kpɛdɛgiti ma. Ti ta-ʋalaiti kpɛtɛni ga zanugi, ga gulu zɔkpɔiti ti ɗa lɔ ti zu. Ti zanugi ziɛni naama wulu zɔkpɔiti ma.

³⁵Ti seɠe zuɠooza golai ɓɛtɛni ga geze ɓiinii, ta ma ɓɔigi, ta ma ɓɔi sɔsɔgi, ta geze ʋagɔi kpaliai. Ti suʋuni ga seeluɓɛinti ma votoi.

³⁶Ti akasia wulu lɔkpala naanigɔ ɓɛtɛni bɛ, ti zanugi ziɛ ti ma. Zanu kalagiti ti ɠɛni ti ʋa. Ti walii ɠaawuunni, ti kpɛtɛ ga ma labu naanigɔiti.

³⁷Ti seɠe zuɠooza golai taɠili kpɛtɛni seɠe ʋɛlɛi laaʋɛ, ga geze ɓiinii, ta ma ɓɔigi, ta ma ɓɔi sɔsɔgi, ta geze ʋagɔi kpaliai, é ɠɛni ga seɠe zuʋuai.

³⁸Ti ná-tɔkpala lɔɔlugɔiti ta ta-ɠalagiti kpɛtɛni. Ti zanugi ziɛni ti-unsuʋɛti ma, ta ti ti zɛlɛ kɔluiti kpɛtɛ ga zanugi. Ta-labu lɔɔlugɔi ɠɛni ga kɔlu ɓɔigi.