Waha Rara 37

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

¹Eme Bezalele e qorac tapa katapa jâmiŋzi fasaerâ bawec, ine ʒoric‐ticnere sâc kubi jajahec â nâfocne, otecne‐ticnere sâc kubi moc â nâfocne â hâŋne‐ticnere sâc kubi moc â nâfocne jaha, iŋuc bawec.

²Erâ maŋne â sahacne i gol ɋaɋacnezi ɋorockewec, erâ qaŋeŋne moc rârec rârec i golzia bâjomirehuc bawec.

³Guruc‐ticne 4 irec reŋ raraʒi 4 jaha golzi bawec, ine ŋifecte biŋe jajahec â ŋifecte biŋe jajahec jaha.

⁴Erâ jâmiŋzi reŋ jajahec fasaerâ golzi foŋkewec wâc.

⁵Eme katapa reŋkeniŋte reŋ i katapa ŋifec â ŋifec reŋ raraʒi basanaŋkekicnao esorieme raʒiwec.

⁶Iŋuc erâ katapa tapane i gol ɋaɋacnezia ba akic ewec; ʒoricnere sâc kubi jajahec â nâfocne â otecnere sâc kubi moc â nâfocne.

⁷Erâ kerubim hawari jajahec gol hedapirekicnezi basaric‐jofawec, ehuc tapa qaŋeŋ jahecnao bâjomirec‐jofame ŋepic.

⁸Kerubim hawari moc i qaŋeŋne ŋifec â kerubim hawari moc i qaŋeŋne ŋifec; kerubim hawari i katapa tapa faio ŋifec â ŋifec bâjomirec‐jofawec hâcne.

⁹Kerubim jahe mamaic erâ ŋehuc fakec‐jekic bâfeŋnepire faicpec qaratierâ domahuc tapane qofackewec, ehame ʒâŋe mai‐jekic tapaopec enduŋkepic.

¹⁰Eme jâmiŋzi tebo fasaewec wâc, ine ʒoricne‐ticnere sâc kubi jajahec, otecne‐ticnere sâc kubi mocjaha â hâŋne‐ticnere sâc kubi moc â nâfocne.

¹¹Erâ gol ɋaɋacnezi ɋorockerâ rârec rârec mecqaŋeŋne golzia bâjomirewec.

¹²Erâ qaŋeŋne moc metapere sâc i golzia ba akic erâ rârec rârec râe‐fârewec.

¹³Izi ine gol sueŋkekicnezi reŋ raraʒi 4 barâ kikene 4 irec nopacnao basanaŋkewec.

¹⁴Reŋ esoriepie raʒime tebo reŋkeniŋte reŋ raraʒi i qaŋeŋnere heririŋko mickewec.

¹⁵Eme tebo reŋkeniŋte reŋ i jâmiŋzi fasaerâ golzi foŋkewec.

¹⁶Wiac teboo ŋeŋe i gol ɋaɋacnezi bawec, kecʒiŋuc: Oto, amae, râqâc â ʒopo eme ira hâcne taha bâzire wiac hume râe jumbieŋ.

¹⁷Eme lambe dodoma i gol ɋaɋacnezia wâc bawec. Lambe dodomare kikene â wâtuŋne i gol hedapirekicnezi bawec, eme râqâc â ʒariŋ ɋoŋnehec izi dodomahec qâfâsâerâ mocjaha ewec.

¹⁸Wâtuŋnere ombâŋkonec ine sohocne 6 râwiŋnerâ domambiŋ. Ŋifec sohocne jahec â moc â ŋifec sohocne jahec â moc jaha.

¹⁹Erâ wawec kaoŋne ɋoŋnehec iŋucne ʒariŋ ɋoŋne jahec â moc sohocne ŋifec â ŋifec domawec; lambe dodomare wâtuŋkonec sohocne 6 râwiŋnerâ domambiŋ ira iŋuc hâcne doma‐fârembiŋ.

²⁰Erâ lambe dodomare wâtuŋko wawec kaoŋne ɋoŋnehec iŋucne ʒariŋ ɋoŋne 4 bakicne.

²¹Ine ʒiŋuc domawec: Ʒariŋ ɋoŋnehec moc sohoc fuŋne irec juwicnao, moc sohoc birine namba 2 irec juwicnao, iŋuczi iŋuc doma rawec.

²²Sohocne â ʒariŋ ɋoŋnehec i qâfâsâerâ mocjaha efârewec, wiac i sasawa gol ɋaɋacne hedapirekicnezi bakicne hâcne.

²³Erâ e lambe 7 â lambere qoruc bâbâtâc â râqâc‐ticne i gol ɋaɋacnezia bafârewec.

²⁴Gol ɋaɋacne ŋemâc‐ticne 100 izi lambe dodoma â wâcwiac‐ticne sasawa basaricke‐fârewec.

²⁵Hosâc ririkere alata i jâmiŋzi ʒiŋuc bawec: Ʒoricnere sâc kubi mocjaha â otecnere sâc kubi mocjaha jaha, sâckoa bawec hâcne; hâŋne‐ticnere sâc kubi jajahec â ʒuŋene ine alatahec qâfâsâeme mocjaha ewec.

²⁶Eme faine â sâpene rârec rârec â ʒuŋene i gol ɋaɋacnezia ɋorocke‐fârewec â mecqaŋeŋne moc i golzia barâ rârec rârec râe‐fârewec.

²⁷Mecqaŋeŋne juwicnao ŋifec â ŋifec ine reŋ raraʒi golzi bakicne râec‐jofawec, i reŋkeniŋte reŋ ira esoriepe raʒiocte.

²⁸Reŋ ine jâmiŋzi fasaerâ golzi foŋkewec.

²⁹Erâ tiri rurua wokemaŋ â hosâc âsu ririkere wiac ɋaɋacne i âsu biaŋ wiac bapa jaŋere sâcko bawec.