1Iŋuc fuame Wofuŋzi Mose ʒiŋuc âzâcnewec: “Go Faraorao ferâ âzâcnec, ‘Hebiraio ŋic nâŋere Anutu, Wofuŋ hâcne, e dâŋ ʒiŋuc mukac: “Ŋicfâc‐nane jaŋe kiŋaŋ qanareniŋte râec‐jopatec ranʒepieŋ.
2Manakic, dâŋnane qatararâ sakarec‐jopahuc râec‐jopatecne mi raniŋmuo
3ine Wofuŋ nore tâpiri mesanaŋzi qowifâcge gieo juraŋgopieŋ, becâsic mecne, doŋgi mecne, kamele mecne, lama bulimakao mecne jopame qowi hâmoc fua‐fâreocmu.
4Ehame Wofuŋ noni Israe ŋic jaŋere qowi wiac â Aigita ŋic jaŋere qowi wiac i bâtâc bacjopape Israe ŋic jaŋere qowi moc mi sipirickeocmu.” ’”
5Wofuŋ e ʒiŋuc muhuc dameŋ bawec wâc: “No tomâcko mâreŋ ʒira iŋuc hâcne epemu.”
6Eme hae fureme Wofuŋzi iŋuc hâcne ewec. Ehame Aigita ŋic jaŋere qowi wiac hâmo‐fârehapie Israe ŋic jaŋere qowi wiac ine moc mi hâmombiŋ.
7Eme Faraozi fuŋne mana‐hâmoocte kiŋaŋ râeme rame mi ʒiŋuc taniŋkezejec i: Israe ŋic jaŋere qowi moc mi hâmombiŋ. Ehame Farao e ine sifu maŋsanaŋ ehuc ŋic mi râec‐jopawec.
8Eme Wofuŋzi Mose â Aroŋ ʒiŋuc jasawec: “Ŋohe meŋekiczi ʒocmâsic me fufusuc rozepirec eme Mosezi Faraore maio sawao wickezejec.
9Eme ʒocmâsiczi iiŋnehuc rufe erâ Aigita mâreŋ sâcke‐fâreme ŋic sahacko mecne, qowi sahacko mecne wicʒâhâc fuarâ fâuckezejec. Aigita mâreŋ sâkoo wiac iŋuc hâcne fuazejec.”
10Eme jahe ʒocmâsic rorâ Faraore maio fuarâ domahuc Mosezi sawao wickeme feme ŋic sahacko â qowi sahacko wicʒâhâc fuarâ fâuckewec.
11Eme Aigita ŋic wicʒâhâc fua‐jare‐fârewec iŋuc jaha qaŋgec bapa jaŋerao fuame jaŋe Mosere maio fuarâ domaniŋte quŋkembiŋ.
12Wofuŋzi ine Faraore maŋ bârâŋgeŋkeme mi mana‐jactewec, Wofuŋzi qanaŋ Mose âzâcnewec sâc fuawec hâcne.
13Eme Wofuŋzi Mose ʒiŋuc âzâcnewec: “Tomâcko uupictea faharerâ Faraorao rarâ âzâcnezemec, ‘Hebiraio ŋic nâŋere Anutu, Wofuŋ hâcne, eki dâŋ ʒiŋuc mukac: “Ŋicfâc‐nane kiŋaŋ qanareniŋte râec‐jopatec ranʒepieŋ.
14No dameŋ ʒi hâcne go â wiacfâcge â ŋic gurufâcge wiac hâhâwicne jâmbâŋ eŋarepe ʒiŋuc mana tarazemec: ‘Mâreŋ sâko mâreŋ ira Anutu iŋucne moc mi jujâmbâŋkekac.’
15No biac juwicnao menane sicnerâ go â ŋic gurufâcge iroŋzi qâmiziec‐ŋopazo murâ sâcne ezapo, eme go arictac enʒaŋ.
16No ine tâpiri‐nanere fuŋne gowatupemurâ â ʒâŋe biŋe‐nane mâreŋ sâc muromackepie haŋ baocmurâ akicgupo.
17Goki ine gahacne manatec feha ŋicfâc‐nane râec‐jopatec raniŋte mupe qatarakomecte
18no tomâcko dameŋ ʒiŋucne hoe sanaŋ hâhâwicne, Aigita mâreŋ fuŋnaonecteaŋ fuarâ fowefuwecko moc mi hejujec, iŋucne moc mupe heocmu.
19Irec kiŋaŋ sorec‐jopatec rarâ bulimakao â qowifâcge sasawa gieo juraŋgopieŋ jaŋe qâzuc‐jopapie ficko fefârenʒepieŋ; ŋic mecne, qowi mecne ficko mi fehuc gieoa juniŋmu jaŋe ʒeŋgoma hoezi hecjopame hâmo‐fâreniŋmu hâcne.” ’”
20Eme Faraore ŋicfâc tucne jaŋe Wofuŋ dâŋticnere hâwic‐jopame kiŋaŋ qaqafâc‐jeŋic â qowifâc‐jeŋic ejarepie ficko fefârembiŋ.
21Â mi hâwic‐jopawec jaŋe ine kiŋaŋ qaqafâc‐jeŋic â qowifâc‐jeŋic gieoa behec‐jopapie jumbiŋ.
22Eme Wofuŋzi Mose dâŋ ʒiŋuc âzâcnewec: “Mege sambâŋkopec sicnetec Aigita mâreŋ sâkoo hoe sanaŋ hehuc ŋic mecne, qowi mecne jâckâte mecne â nânâ monʒaŋ mecne Aigita mâreŋko forakac sasawa hecjopazejec.”
23Eme Mose e gunu‐ticne sambâŋkopec bâfeŋneme Wofuŋte micte ɋuŋ parandaŋ â hoe sanaŋ â ʒocbâruŋ sambâŋkonec mâreŋko wahawec. Ehame Wofuŋzia mume Aigita mâreŋko hoe sanaŋ hewec.
24Hoe sanaŋ â bâbâric hâhâwicne jâmbâŋ ʒuʒuhuc jaha wahahuc fowec, wiac iŋucne Aigita mâreŋ sâkoo ŋic fuarâ juwefumbiŋko moc mi fuarâ fowec.
25Eme hoe sanaŋ izi Aigita mâreŋ sâkoo ŋic mecne, qowi mecne, gieo jurambiŋ jaŋe hehâmoc‐jopa‐fârewec erâ nânâ monʒaŋ â jâc wiac gieo doma rawec i wâc iŋuc jaha henʒaŋ qanʒaŋne‐fârewec.
26Mâc Goseŋ mâreŋko, Israe ŋic jumbiŋ ira sawa hoe sanaŋ mi hewec.
27Iŋuc fuame Faraozi kiŋaŋ soreme ra Mose â Aroŋ hefârec‐jofame rapire dâŋ ʒiŋuc jasawec: “Ʒi kiŋnane hone manac ekopac, Wofuŋ e tiŋne jâmbâŋ, no â ŋicfâc‐nane nâŋe ine hehesicne.
28Irec ŋohe nore erâ Wofuŋ numucnenic, ɋuŋ parandaŋ â hoe sanaŋ izi siric‐nâpokac hâcne. No râec‐ŋopape ranʒepieŋ, ŋoŋe ʒira ʒuhuckerâ mi junʒepieŋ.”
29Mosezi ine dâŋ ʒiŋuc bâtikiecnewec: “No hae beherâ menane sicnepe Wofuŋtao feme ɋuŋ parandaŋ â hoe sanaŋ tâcneme ʒiŋuc mana tarazemec: Mâreŋ sâko mâreŋ i Wofuŋte biŋe.
30No ine go â ŋicfâcge ŋoŋere fuŋne manakopac, ŋoŋe Wofuŋ Anuture sifu mi hâwic‐ŋopakac.”
31Bundajâc â padi imacke‐fârekicne, padi i biac fârinehec domawecte â bundajâc i ârine qawecte.
32Waizeŋ â wiac iŋucne tinac ine ʒâhec sawa ârickerâ fârine râeekacte hoe sanaŋzi mi imackewec.
33Eme Mose e Farao beherâ haeonec hurâ meticne Wofuŋtao sicneme ɋuŋ parandaŋ â hoe sanaŋ omaepire mâreŋko hoe mocwâc mi hewec.
34Eme Farao e ɋuŋ parandaŋ â hoe sanaŋ omaeme honerâ izia e jahacne mecne â ŋicfâcne mecne sâqocne‐jeŋic basanaŋkepie maŋjeŋic ʒicke sanaŋkewec.
35Eme Farao e maŋsanaŋ erâ Israe ŋic mi râec‐jopawec. Wofuŋzi qanaŋ Mose âzâcnewec iŋuc hâcne fuawec.
