Waha Rara 22

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

¹“Ŋic moczi bulimakao me lama moc fiuc rorâ qa nâc eocmu me furire râeocmu ine bulimakaore okacne bulimakao 5 â lamare okacne lama 4 iŋuc râezejec.

²Fiuc roro e fiuc rohuc juhame jaha runezi bâfuarâ qâhâmoocmuo ine ʒika qahuc kiŋ bâfuawec mi mucnezo.

³Me fiuc roro biac mi qâhâmohuc ŋafe moc huckehuc qâhâmoocmuo ine ʒika qahuc kiŋ bâfuawec muzo. Fiuc rorozi okacne râe‐jâmbâŋkezejec, mi focnekacko ine wiac fiuc rowec irec okacne e jahacne ŋic gâcne qikiŋne‐jarehuc furi ronʒepieŋ.

⁴Qowi fiuc rokicne, bulimakao me lama me doŋgi i ɋâricne jaha juha bâfuaniŋmuo ine bârisiehuc e jahacnaonec moc ʒuhuckezejec.

⁵“Me ŋic moczi qowifâcne seacko me waiŋ gieo nânâ nâniŋte râec‐jopame rambaŋ juku âgo‐ticnere gieo raʒirâ nânâ wiac sipirickeniŋmu irec okacne ine e jahacne gieonec â waiŋkonec wiac biaŋne jâmbâŋ râezejec.

⁶“Me ŋic moczi gieo ʒoc râeme ʒa fofotâc raku nâŋ gagate rohuc padi qa râec ekicne me gieo doma rakac me gieo wiac gâcne gâcne ʒafâreocmuo ine ʒoc râeme ʒawec eki okacne bazu‐fârezejec.

⁷“Me ŋic moc e moneŋ me mafa wiac gâcne i ŋic âgo‐ticnezi soŋaŋkecneocte râcneme râeme foha ere fickonec fiuc ropie ʒâhec fiuc roro bâfuaniŋmuo ecnepie bârisiehuc e jahacnaonec irec sâc jaha ʒuhuckerâ râezejec.

⁸Fiuc roro mi bâfuaniŋmuo ine fic runezi âgo‐ticnere wiac fiuc rowec me mâcne irec fuŋne taniŋkeocte Anuture maio fuarâ fuŋne‐ticne muzejec.

⁹“Me ŋic moczi ŋic âgo‐ticne qorickehuc bulimakaore me doŋgire me lamare me ŋaqi qoructe me wiac irec me irec, ‘Ine hâcne nore,’ iŋuc muhuc hehefaric epire mâmâc jaha Anuture maio râec‐jofazo. Eme Anutu e ere me ere fuŋne bataniŋkeocmu ŋic e hâcne âgo‐ticne okacne bafehuc râcnezejec.

¹⁰“Me ŋic moc e âgo‐ticne doŋgi me bulimakao me lama me qowi moc soŋaŋkecneocte râcneocmu, eme qowi izi hâmoocmu me puriŋ eocmu me ŋic moczi mi honehuc mocko ro bawiseniŋmuo ine

¹¹ŋic jajahec jahe Anuture maio mumupaŋ dâŋ muzepirec. Eme ŋic e âgo‐ticnere wiac fiuc roocte meticne sicnewec me mâcne irec fuŋne taniŋkezejec. Eme qowi runezi mumupaŋte maname fârine eha okacnere mi muzejec.

¹²Fiuc rowecko ine fiuc rorozi rune okacne bazucnezejec.

¹³Me qowi mimicnezi kisuckembiŋko ine qâŋɋâŋne ro bafisime fuŋne taniŋkezejec, eme qowi kisuckekicnere okacne râeocte mi muzo.

¹⁴“Me ŋic moczi âgo‐ticnere qowi moc gie sawa bacneocte bajuha kikene bazuocmuo me runezi mi honeha hâmoocmuo ine okacne furu jaha bazucnezejec.

¹⁵Me runezi honeha hâmoocmuo ine okacne râeocte mi muzo. Qanaŋ qowire gie furi râewecko ine gie furizi okacne ezejec.

¹⁶“Me ŋic moczi naru ŋokac moc ŋicbiŋe tâmiric juha eatuckehuc bâsâqoreocmuo ine ŋokac furi furu jaha râerâ ŋonâŋ‐ticne bazejec.

¹⁷Mamac‐ticnezi mi râcnehuc sakare‐jâmbâŋkeocmu ine ŋokac ʒeŋoŋte furi fehuc roeŋgopieŋ irec sâcko jâmbâŋ râcnezejec.

¹⁸“Ŋokac hafec bapa e manacnetec mi juzejec.

¹⁹“Ŋic moczi qowihec sâqocne baocmu e hâmo‐jâmbâŋkezejec.

²⁰“Ŋic moczi Anutu sawa mâcne, nemu gâcne wâc bâzi rike‐jareocmu e bâsirowezo.

²¹“Ŋoŋe ŋic jaba moc wiac sâctiri mi ecnenʒepieŋ â gie bapare faficne wâc boc mi ecnezo, ŋaŋac wâc Aigita mâreŋko jaba jumbiŋ irec.

²²Ŋoŋe hozec bekâ jaŋe mi bomac‐jopanʒepieŋ.

²³Bomac‐jopapie wira wâwâsic enarepie manarâ mana‐jare‐jâmbâŋkepemu,

²⁴ehuc kimbeŋ‐nanere ʒocbâruŋzi ʒâseŋ‐ŋopapemu â ʒika‐nanezi qâhâmoc‐ŋopape ŋonâŋfâc‐ŋeŋic hozec erâ juniŋmu, â naru motecfâc‐ŋeŋic mamac tâmiric erâ juniŋmu.

²⁵“Go ŋicfâc‐nane jaŋeraonec moczi hapetac erâ gohec juekac e moneŋ moc râcnecmuo i juku okacne bafehuc gareocte mi muzemec, â moneŋ nâfocne ʒuhucke‐gareocte wâc mi muzemec.

²⁶Me go moneŋte okacne âgogere ŋaqi rocmuo ine ʒoaŋzi mi huha mocwâc bârisiecnezemec.

²⁷Wiac izi mocjaha rurufa‐ticne hâcne, izi hâcne sahac‐ticnere foŋ, i tâmiric ine wemo wiac rufarâ guŋ foocmu? E no wira wâwâsic enareocmuo manacnepemu, no buuruc‐nanehec hâcne.

²⁸“Go Anutu mi musoriŋkezemec, erâ wâc ŋicfâcge jaŋere ŋicwofuŋ mi sâweckezemec.

²⁹“Nânâ mâririge â waiŋ mâririge irecnec gâcne tahare biŋe mi sakarehuc afeckerâ râezemec. Mârâc ŋokâge ine nore biŋe qazemec.

³⁰Bulimakao â lamafâcge jaŋere mârâc fufua iŋuc jaha ezemec, i neŋgocnehec juha ʒoaŋ 7 tarazejec, ʒoaŋ namba 8 ira ine no narezemec.

³¹“Ŋoŋe ŋic tirine junarenʒepieŋ, ehuc gieo qowi kisuckekicne irec biucne i mi nânâ qâto behe‐jarenʒepieŋ.