1Dameŋ ira Mose â Israe ŋicguru jaŋe Wofuŋ muteŋkehuc gae kecʒiŋuc hembiŋ: “No Wofuŋ gae hecnepe, e tâpiri ɋuŋɋasaŋ‐ticne bataniŋkewec hâcne; e becâsic â ŋic hâwecko tuŋjopame humbiŋ.
2Sasanaŋ â mumuteŋ‐nane i Wofuŋ e hâcne, ŋeŋezic‐nane i ekizia juwec; e hâcne Anutu‐nane, no muteŋ bâteŋ ecnezepac, e apa ŋosa â mamacfâc‐nane jaŋere Anutu, no e muafeckezepac.
3Wofuŋ e ʒika qaqa ŋicsaric ʒâŋe‐ticne Wofuŋ hâcne.
4“Faraore keretac â momorifâc i hâwecko tuŋjopawec, â momori micne bâwosâec‐jopakicne jaŋe Hâwec Bâbâroŋko bâutuc‐jopakicne.
5Rumizi bârârâŋ‐jopawec; qânâ iŋucne ʒâkâŋ fâhâŋnao hujâmbâŋkembiŋ.
6O Wofuŋ, mefârege i tâpiri ɋuŋɋasaŋhec, gore mefârezi râsi qanʒaŋ‐jopaekac, o Wofuŋ.
7Tâpiri ɋuŋɋasaŋge fekicne, irec râsi jaŋe guriŋ‐jopaekic; erâ kimbeŋgere ʒocbâruŋ râetec izi ra sopâc iŋucne ʒahuc ʒâseŋ‐jopaekac.
8Sâke rombâŋge wefume opâzi ferâ sanaŋkewec, â hâweczi sac iŋucne hâŋ domawec, sirizi hâwec ʒâʒâŋiŋko sanaŋkerâ fowec.
9Râsizi muwec: ‘No jopa jâpec ejarehuc jowarupe, no mateŋ bâtâc bape andac‐nane omaezejec. No ʒika‐nane bâfeŋnepe menanezi jopa miziezejec.’
10Go mutec mâŋâŋ qame hâweczi qâuruc‐jopawec, jaŋe aeŋ iŋucne opâ sâkoo hufârembiŋ.
11“O Wofuŋ, nemu ŋondeŋko go iŋucne mozi moc jukac? Mozi moc go iŋucne ɋuŋɋasaŋ‐ticnehec â tirine erâ mâsi bapa â ʒika qaqare ʒâŋe rara sâkohec jukac?
12Go mefârege sicnemeŋ, eme mâreŋzi ɋâcjopawec.
13“Go aki anonoc fogareha ŋic batarac‐jopameŋ, go tâpirigezi jowa qataŋ ejarehuc tiri haegao râec‐jopameŋ.
14Ŋic jaŋe manarâ fâfârembiŋ, Filisa mâreŋ rune jaŋe ɋarac ɋarac qambiŋ.
15Dameŋ ira Edom ŋicwofuŋ jaŋe bipic tatara ejarewec, â Moabi fekicnefâc‐jeŋic hâwic‐jopawec. Kanaaŋ mâreŋ rune ʒeŋgoma maŋjeŋic gâckewec.
16Hâhâwic â bipic tatara ejarewec; megere tâpiri sâko irec erâ qânâ iŋucne qiriŋmâc embiŋ. O Wofuŋ, gurufâcge jaŋe fotâcnembiŋ, go gahac batarac‐jopameŋ ŋicguru i jaŋe hâcne fotâcnembiŋ.
17Goki jowac‐jopatec raʒimbiŋ erâ gokizia gahacne tiki mâreŋko sara mama ejaremeŋ, go gahac fic hae erâ ŋec juc eekic ira hâcne, o Wofuŋ, gahacne mezi tirific bameŋ, ira hâcne, o Wofuŋ.
18Wofuŋ e guriŋ bapa gie‐ticne bahuc juekaczi baraʒihuc juocmu sanaŋ.”
19Farao becâsic â keretac â momorifâc‐ticne jaŋe hâwec fotâcnezo ehapie Wofuŋzi hâwec ecneme fai‐jeŋicko fehuc qâurucjopawec hâcne. Israe ŋic jaŋe ine mâreŋ kereŋnao hâwec fotâcnembiŋ.
20Eme porofete ŋokac Miriam, Aroŋte qo hâcne, eki woŋgâŋ rome ŋokac sasawa e qâterâ woŋgâŋ jaha ropie gae wombiŋ.
21Eme Miriamzi gae ʒiŋuc hejarewec: “Wofuŋ gae hecnenaŋ, e tâpiri ɋuŋɋasaŋ‐ticne bataniŋkewec hâcne; e becâsic â momori hâwecko tuŋjopame hufârembiŋ.”
22Eme Mose e Israe ŋic jaŋe ejareme Hâwec Bâbâroŋ behembiŋ. Eme jaŋe Suru mâreŋ burocnao rahuc juhapie ʒoaŋ jahec â moc eha opâ moc mi bâfuambiŋ.
23Raku Mara mâreŋko fisirâ opâ bâfuambiŋ. Erâ i opâ hâtânere wemocko moc nanʒapiŋ. Opâ hâtânere mâreŋ irec ʒâŋe Mara mukicne.
24Eme ŋic ŋokac jaŋe Mose mu heŋɋâŋ ecnehuc ʒiŋuc âzâcnembiŋ: “Nâŋe opâ wenirec nanaŋmu?”
25Eme Mose e Wofuŋ wira wâwâsic ecneme Wofuŋzi jâc moc jâutuwec i rorâ opâo beheme hume opâzi nocne ewec. Eme Wofuŋ e ira hâcne dâŋsanaŋ â mumutâc dâŋ gâcne jarehuc esâic‐jopawec.
26Ehuc muwec: “Ŋoŋe Wofuŋ Anutu‐ŋeŋicte mic reŋkehuc ere maio wiac eene biaŋ i ehuc dâŋsanaŋ â sâcmutâc‐ticne reŋkeniŋmuo ine Aigita mâreŋko huc ʒâic wiac bâfuapo i ŋoŋere faio râepe mi feocmu, no Wofuŋ ŋoŋere bâbâpiaŋ hâcne.”
27Eme jaŋe raku Elim hae mâreŋko fisimbiŋ. Ira ine opâ ʒâŋe 12 fowec â hâmu jâcne 70 doma rawec. Eme jaŋe opâ fowecko toma âterâ waha fombiŋ.
