1Mose e tikio jume ʒorame ŋic ŋokac jaŋe Aroŋtao heâckerâ rarâ âzâcnembiŋ: “Ajoc, nemu moc bâfua‐nâretec bânie‐nârezejec. Mose ŋic keci, Aigita mâreŋkonec bacnâpo warewec, e iŋuc me iŋuc fuacnejec i mi manaŋgopeneŋ.”
2Eme Aroŋzi jazawec, “Ŋoŋe ŋokac naru motecfâc‐ŋeŋic jaŋere hazeckonec pâŋi warawa golzi bakicne batararâ norao bafisiniŋ.”
3Eme ŋic ŋokac naru motec mâmâc sasawa jaŋe pâŋi warawa hazec‐jeŋicko doma rawec i batararâ Aroŋtao bafisimbiŋ.
4Eme Aroŋ e gol jowac rohuc rike dockerâ bulimakao motecne irec hawari bawec. Eme jaŋe mumbiŋ, “O Israe, Aigita mâreŋkonec bacgu warewec nemuge ʒi hâcne.”
5Iŋuc epie Aroŋzi honerâ bulimakaore maŋfuŋko alata moc bawec; erâ dâŋ kecʒiŋuc jazame wirapie hazec sâc huwec: “Tomâcko Wofuŋte hombaŋ ŋezo.”
6Hae fureme uupictea qowi bâzi rikembiŋ â wama bubiaŋte taha wiac bafisimbiŋ. Eme ŋic ŋokac jaŋe waha ŋehuc nânâ opâ nâmbiŋ, erâ faharerâ mamasiri wiac embiŋ.
7Eme Wofuŋzi Mose âzâcnewec, “Ajoc, fahare huc! Ŋicfâcge Aigita mâreŋkonec jowac‐jopa waremeŋ jaŋe sindaŋ eŋgopieŋ;
8no hata mutâcne‐jarepo i biac qâsuambieŋ. Jaŋe bulimakao qâqâtâc moc bâfuarâ numucnehuc bâzi rikecneŋgopieŋ, ehuc ʒiŋuc muŋgopieŋ: ‘O Israe, Aigita mâreŋkonec bacgu warewec nemuge ʒi hâcne.’”
9Iŋuc murâ ʒiŋuc âzâcnewec: “No ŋic ŋokac ʒi hone tarac‐jopakopac, jaŋe ŋic ŋokac maŋsanaŋ;
10irec behecnuhaŋ kimbeŋ‐nanere ʒoczi bâruŋkerâ ʒâseŋ‐jopazejec; go ine mupe sawe mâririackerâ ŋicguru sâko ezemec.”
11Eme Mose e ine Wofuŋ Anutu‐ticne mu bâmunaŋ ecnerâ muwec, “O Wofuŋ, ŋicfâcge Aigita mâreŋkonec mesanaŋgezi tâpiri sâkohec bacjopa waremeŋ, jaŋe wemocte kimbeŋgere ʒoczi ʒâseŋ‐jopaocte bâruŋkekac?
12Go iŋuc etec Aigita ŋic jaŋe ʒiŋuc muniŋmu i: ‘Imac‐jopaocte manasuhuc tiki mâreŋko bacjopa rawec, ehuc mâreŋkonec bâsirowec‐jopaocte iŋuc hâcne ewec?’ Irec sifu ŋicfâcge jaŋere buge sâqoreme mana uruetec kimbeŋgere ʒoc qaʒuezejec.
13Kiŋaŋŋicfâcge Abraham, Isaka â Israe jaŋe manasuc‐jopac. Erâ gahacne ʒâŋeo iticnehuc mumupaŋ sanaŋ mupaŋke‐jarehuc biŋedâŋ ʒiŋuc jazameŋ i manasuc, ‘Ɋâricfâc‐ŋeŋic basawec‐jopakupe sambâŋko bâpiŋ ŋeraŋgopieŋ irec sâc fuaniŋmu, â mâreŋ biŋe qaŋarepo ʒi ɋâricfâc‐ŋeŋic jarepe raucke sanaŋkenʒoŋgopieŋ.’”
14Eme Wofuŋ e ŋicfâcne sisipiric wiac ejarezo muwec i mana uruehuc maŋne risieme behewec.
15Eme Mose e tikionec risierâ wahawec. Eme Sâcmutâc Sanaŋte qorac tapa jajahec meo bacjofawec. Tapa jajahec i ŋifec â ŋifec qâreŋhec sasawa.
16Qorac tapa i Anutuzi bâfuawec erâ qâreŋ i ekizia qorac tapao heutuckehuc qâreŋkewec.
17Eme wahahuc Josuazi ŋic jaŋere ojowa fânâŋ manarâ Mose ʒiŋuc âzâcnewec: “Tomao ʒikare ojowa fuame manakopac.”
18Eme eki muwec: “No saoreŋ fânâŋ me busâqocte kio owa mâcne, gae woŋgâŋte micʒonʒoŋ manakopac.”
19Eme wahaku toma bâqiŋkehuc bulimakao qâqâtâc â gae wowo hone manac erâ bune bâruŋkeme qorac tapa tiki fuŋnao beheme qanʒaŋnewec.
20Erâ ra bulimakao qâqâtâc bambiŋ i rorâ ʒocko beheme ʒame henʒaŋ qanʒaŋnerâ uucne opâhec bâsifuckerâ Israe ŋicguru jaŋe nâniŋte ʒoɋac ejarewec.
21Eme Mosezi Aroŋ ʒiŋuc âzâcnewec: “Ŋicguru ʒi jaŋe weniŋuc egarepie kiŋ iŋucne sâko fai‐jeŋicko râetec fewec?”
22Aroŋzi muwec: “O bomboŋ, kimbeŋgezi mi bâruŋkeoc, ŋicguru ʒi jaŋe boc repireeŋgopieŋ i gahac manaekic i!
23Jaŋe ʒiŋuc nazambiŋ hâcne: ‘Go nemu bâfuac‐jopatec bânie‐nârepie ranʒepeneŋ; Aigita mâreŋkonec jowac‐nâpo warewec, Mose hâcne, ŋic e sifucke wiac moc ewec me weniŋuc i mi manaŋgopeneŋ.’
24Iŋuc mupie jazapo, ‘Moc e eri wiac golzi bakicne moc bajuekacko hetarazejec.’ Eme narepie ʒocko behepe hume bulimakao qâqâtâc ʒi hâcne fuawec.”
25Eme Mose e bâbâsifuc sâko bâfuapie honewec. Aroŋzi docke‐jareme iŋuc epie râsifâc‐jeŋic sowine iŋuc eŋgopieŋ muhuc bubiaŋ manambiŋ, Mose e iŋuc hone manac erâ
26teuŋ‐jeŋicte motâcko domahuc wirarâ muwec: “Moc e Wofuŋte ŋic juzo ecnekacko norao warezejec.” Mume Lewire gurufâc jaŋe sasawa erao tumaŋne‐fârembiŋ.
27Eme jazawec: “Wofuŋ, Israere Anutu e hâcne ʒiŋuc mukac, ‘Ŋoŋe ru sâc ombâŋ‐ŋeŋicko becsahac jomarâ ʒika‐ŋeŋic esorienʒepieŋ. Erâ teuŋ sâckerâ motâc mockoneczi mocko rac warec ehuc hahac ɋafâc‐ŋeŋic mecne, âgo tofafâc‐ŋeŋic mecne, soctofafâc‐ŋeŋic mecne jaŋe mâmâc sasawa qâhâmoc‐jopanʒepieŋ.’”
28Eme Lewire gurufâc jaŋe Mosezi mujarewec sâc efârembiŋ. Iŋuc epie ŋic jaŋeraonec ʒoaŋ ira 3 tauseŋzi hâmombiŋ.
29Eme Mosezi muwec, “Ŋoŋe miŋecgac ru sâc Wofuŋte biŋe eniŋte mupaŋkehuc ŋokâfâc‐ŋeŋic me hahac ɋafâc‐ŋeŋic qaisoc‐jopambieŋ i Wofuŋte jambuŋzi ʒoaŋ ʒira fai‐ŋeŋicko feocte iŋuc hâcne embieŋ.”
30Hae fureme Mosezi ŋic ŋokac ʒiŋuc jazawec: “Ŋoŋe sâqocne ŋemâcne bâfuambiŋ. Irec no ʒi Wofuŋtao fepemu, erâ hece, ŋoŋere erâ Wofuŋ mu wâwâsic ecnehuc kiwiric‐ŋeŋic sâcne ropemu me weniŋuc?”
31Mose e iŋuc murâ mocwâc Wofuŋtao ferâ ʒiŋuc âzâcnewec: “Jâi, ŋicguru ʒi jaŋe sâqocne ŋemâcne bâfuambiŋ, jaŋe golzi nemuɋâŋ bambiŋ hâcne.
32Eme ʒi sifu sâqocne‐jeŋic bâtâmire‐jarezemec. Mi ezo murâ ine nore ʒâŋe papiagao qâreŋkemeŋ i hetâmirezemec.”
33Wofuŋzi ine Mose âzâcnewec, “Iŋuc mâcne, moc e sâqocne bahuc bunaneo baocmu ere ʒâŋe papia‐naneo hetâmirepemu.
34Ʒi ine rac, erâ hae mâreŋ gazapo ira ŋicguru jowac‐jopatec ranʒepieŋ. Manakic, aŋelo‐nanezi bânie‐gareocmu. Ehame dameŋ‐nane maickeme ine kiŋjeŋicte okacne bazu‐jarepemu.”
35Eme Aroŋzi bulimakao qâqâtâc bame araŋ bacnembiŋte Wofuŋzi mume wiac mimicne fai‐jeŋicko fewec.
