1Eme Wofuŋzi Mose ʒiŋuc âzâcnewec: “Ajoc, go â ŋicguru Aigita mâreŋkonec jowac‐jopa waremeŋ ŋoŋe ʒirecnec rahuc juku Abraham, Isaka â Jakobo mâreŋ mupaŋke‐jarehuc biŋe qajarepo ira fisinʒepieŋ. Ʒiŋuc hâcne mupaŋke‐jarepo: ‘Ɋâricfâc‐ŋeŋic jarezokopac.’
2Eme no aŋelo moc sorepe bânie‐ŋarezejec, ehame Kanaaŋ ŋic, Amori ŋic, Hitiŋic, Periʒi ŋic, Hiwiŋic â Jebusi ŋic jâpec‐jopazepac.
3Go mâreŋ susu â baŋac fusucmarâ qâmbâriŋkeekacko razemec; no ine ŋoŋehec mi rapemu, ŋoŋe ŋic maŋsanaŋ juŋgopieŋte juku hatao bâsirowec‐ŋopazipohec.”
4Eme ŋic ŋokac jaŋe dâŋ ŋemâcne i manarâ makuc bambiŋ, ehuc moczi moc eri qoqonaŋ wiac‐ticne moc mi qonaŋkewec.
5Wofuŋzi ine Mose ʒiŋuc âzâcnewec: “Go Israe ŋicguru jazac, ‘Ŋoŋe ŋicguru râŋgeŋ qaŋqaŋne, irec no dameŋ bembeŋne mac sawa ŋondeŋ‐ŋeŋicko rafehuc bâsirowec‐ŋopazipohec. Irec ʒi eri wiac‐ŋeŋic heunucke hetarac enʒepieŋ, eme no wiac weniŋuc jaha eŋarezo i mana tarazepac.’”
6Iŋuc mume Israe ŋic ŋokac jaŋe Horebe tikionec rahuc rahuc izia eri wiac‐jeŋic heunucke hetarac embiŋ.
7Eme Mose e ine qoruc boze rorâ teuŋ qaŋeŋnao taicko fâre jujec, ehuc ʒâŋene tutumaŋ qoruc boze mujujec. Eme moc e Wofuŋ mu wioc ecnezo murâ tutumaŋ qoruc boze teuŋ qaŋeŋnao ŋewec ira rajujec.
8Eme Mose e qoruc bozeo rame sâc ŋic ŋokac jaŋe ʒeŋgoma faharerâ ru sâc boze‐jeŋicte motâcko domahuc Mose ʒâŋezi hone jâjâpe jumbieŋ.
9Eme Mose e qoruc bozeo raʒime karorac ɋâfoŋnezi waharâ bozere motâc ɋorockerâ domaha Wofuŋzi Mosehec dâŋ muc manac ejujec.
10Eme ŋic ŋokac ʒeŋgoma jaŋe boze motâcko karorac ɋâfoŋne domame honerâ ru sâc faharerâ boze‐jeŋicte motâcko fodape jumbieŋ.
11Wofuŋ e Mosehec mamaic ehuc dâŋ muc manac ejupirec, ŋic moczi âgo qomâ‐ticnehec dâŋ muc manac eekopirec irec sâc. Eme Mose e ŋic jaŋere teuŋko risieme kiŋaŋŋic‐ticne socɋâri Josua, Nuŋte ŋokâ hâcne, e tutumaŋ qoruc boze i moc mi behe jujec.
12Eme Mose e Wofuŋ âzâcnerâ muwec: “Manakic, go ŋicguru ʒi bacjopa rapemurâ munaremeŋ, erâ mo ŋic mo soretec nohec mâmâc ranacmu, i ine mi mutec manaekopac; kecʒiŋuc ine nazameŋ: ‘No ʒâŋege manaekopac â honeriŋguekopac.’
13Irec ʒiŋuc numu‐garekopac: No jâmbomac honeriŋnuekicko mamana birige nowatutec fuŋnege mana tarape â honeriŋnuekic i wâc hone tarape. Erâ ŋicguru ʒi jaŋe gore gurufâc juŋgopieŋ i wâc manasuc.”
14Eme dâŋ ʒiŋuc bâtikiecnewec: “No nahac bânie‐ŋarehuc jowac‐ŋoparâ hatao râec‐ŋopape me?”
15Eme eki muwec, “Go gahac jâmbâŋ mi bânie‐nârezo mukicko ine ʒirecnec mi jowac‐nâpo razemec.
16Goki no mecne â ŋicguru ʒi mecne honeriŋ‐nâpoekic i wemocko fuŋne taniŋkeme hone tarazo? Ʒiŋucko hâcne hone tarazo: Go gahac jâmbâŋ bânie‐nâretec no â ŋicfâcge nâŋe ŋicne ŋicne mâreŋko juraŋgopieŋ jaŋere sâc mâcne, sâc moc enaŋmu hâcne.”
17Eme Wofuŋzi Mose âzâcnewec, “Wiac moc, go mukomec iŋuc jâmbâŋ epemu hâcne. No go honeriŋguekopac â ʒâŋege wâc manaekopac i!”
18Mume Mosezi muwec, “Mana‐naretecne eri tatamacge honezepac.”
19Mume muwec, “No eri tatamac‐nane gore maio râepe fota rame ʒâŋe‐nane ‘Wofuŋ’ i gore maio musokapemu, erâ no ŋic moc aki anonoc ecnezo murâ ecnepemu; â moc buuruc qacnezo murâ qacnepemu jaha.”
20Erâ muwec, “Mocjaha, ʒâŋe mai‐nane sâcne mi honecmu, ŋiczi honecnurâ ɋâricne juju i mi fokac.”
21Erâ Wofuŋzi ʒuhuckerâ muwec, “Manakic, ʒi maŋfuŋ‐naneo sawane fokac ira haroŋaŋko domazemec.
22Eme no qânâ hawecko râecgurâ menanezi ʒâŋege bâsoŋkehuc eri tatamac‐nanehec gowarupemu.
23Iŋuc ehuc menane bârâriepe râpe‐nane sawa honezemec, mâc ʒâŋe mai‐nane hohonene ine mi fokac.”
