1Eme Mose e dâŋ ʒiŋuc bâtikiecnerâ muwec: “Manakic, jaŋe dâŋnane mi mana ʒakiehuc muniŋmu, ‘Wofuŋ e go mi fua‐garewec.’ Iŋuc mupie wenac epemu?”
2Mume Wofuŋzi âzâcnewec: “Megao wemo wiac bakomec?” Eme eki muwec: “Gunu moc.”
3Eme muwec: “Mâreŋko behec.” Eme mâreŋko beheme gunuzi homa eme Mose e wisewec.
4Wiseme Wofuŋzi Mose ʒiŋuc âzâcnewec: “Mege sicnerâ ʒinao roc.” Eme meticne sicnerâ rome mocwâc gunu ewec.
5Eme muwec: “Iŋuc etec jaŋe ʒiŋuc mana taraniŋmu, Wofuŋ, apafâc‐nâŋec Abraham, Isaka â Jakobo jaŋere Anutu eki fuacnewec.”
6Erâ Wofuŋzi ʒuhuckerâ ʒiŋuc âzâcnewec: “Mege ŋaqimaŋko esoriec.” Eme e meticne ŋaqimaŋko esoriewec, eme mocwâc unuckeme mene mi wakoc sasawa ehuc qaŋqaŋ jâmbâŋ ezejec i!
7Eme Anutuzi muwec: “Mege mocwâc ŋaqimaŋko esoriec.” Eme meticne mocwâc ŋaqimaŋko esoriewec, eme mocwâc unuckeme fâsâerâ sahac‐ticne gâcnere sâc ewec.
8Eme Anutuzi muwec: “Jaŋe dâŋge mi mana ʒakieniŋmuo â mâsi bâbâni bacmu irec wâc manapie fârine mi eocmuo ine mâsi arec jajahec irec manapie fârine eocmu mecne.
9Me mâsi i â i hone‐bipiehuc manapie fârine mi eha dâŋge qataraniŋmuo ine Nilu opâonec opâ afecne fiarâ mâreŋ kereŋnao hoŋkezemec, eme opâ fiacmu izi mâreŋ kereŋnao soc eocmu.”
10Mosezi ine Wofuŋ âzâcnewec: “No ŋic micafec aricne, no mârâc ŋic micafec moc mi jupo, erâ ʒi kiŋaŋŋicge no dâŋ nazakomecko ŋic micafec wâc mi jukopac, aricne, no marac‐nane piticne â nameŋ‐nane ŋemâcne.”
11Eme Wofuŋzi âzâcnewec: “Ŋicte mic mozi bâfuawec? Me mozi ŋic ecneme nâŋguŋ me qepoŋ me ʒâŋe fifi me tiŋtuŋ eekac? Wofuŋ noni hâcne.
12Irec go rac, eme no nahac micge baafeckehuc dâŋ qazu‐garepemu i hâcne muzemec.”
13Eki ine muwec: “O Wofuŋ, go ŋic e me e sorezo murâ soretec raoc.”
14Iŋuc mume Wofuŋ e Mosere erâ bune ʒâʒâficne qame muwec: “Hahacge Aroŋ, Lewiŋic hâcne, e mi jukac me? E dâŋ micafec muekac i no manakopac, erâ e bâfuacguocte biac warehuc jukac, erâ ware honecgurâ ine bune biaŋkeocmu.
15Eme go dâŋ âzâcnehuc micnao râezemec. Noni ine gore â ere mic i mâmâc baafeckehuc wiac enicmu i qazu‐ŋactepemu.
16Eki gore âkehoc ŋic dâŋ jazazejec, eme e gore mic eha goki ere Anutu tinac ezemec.
17Eme go gunu keci megao badomahuc izi hâcne mâsi bazemec.”
18Eme Mose e kimo‐ticne Jetoro erao risie rarâ âzâcnewec: “No qomâfâc‐nane Aigita mâreŋko juŋgopieŋ jaŋe sâcne mac juŋgopieŋ me weniŋuc i honec‐jopazore jaŋerao risiezo mukopac.” Eme Jetorozi Mose âzâcnewec: “Go wamao rac.”
19Eme Wofuŋzi Midiaŋ mâreŋko Mose ʒiŋuc âzâcnewec: “Ajoc, go Aigita mâreŋko risie rac, ŋic guzo mumbiŋ jaŋe hâmo‐fârembiŋ hâcne.”
20Eme Mose e ŋonâŋ motecfâcne rocjoparâ doŋgi faio râec‐joparâ Aigita mâreŋko risie rawec; ehuc Anuture gunu meo bawec.
21Eme Wofuŋzi Mose âzâcnewec: “Go Aigita mâreŋko risie rarâ mâsi wiac gaza gowatuc ehuc irec tâpiri qikiŋne‐garepo i sasawa manasurâ Faraore maio bafârezemec. Noni ine ŋic mi râec‐jopame raniŋte maŋsanaŋ bâfuacnepemu.
22Goki ine Farao âzâcnezemec, ‘Wofuŋzi ʒiŋuc mukac: Israe e mârâc ŋokâ‐nane hâcne.
23Eme “Ŋokâ‐nane râetec ra kiŋaŋ qanarezejec,” iŋuc gazape mi ehuc qataracmuo ine no gahacne mârâc ŋokâ qâhâmopemu.’”
24Eme hata raku mocko fohapie Wofuŋzi Mose qâhâmoocmurâ fuacnewec.
25Iŋuc eme Ʒiborazi buse dâkâne micnehec rorâ ŋokâ‐ticnere sahac tofa hetâcnerâ izi Mosere sahac tofa heuahuc muwec: “Go socte erâ nore biŋe ekomec.”
26Iŋuc mume Wofuŋzi Mose akickewec. Dameŋ ira sahacko ma bapare ʒiŋuc mujumbieŋ hâcne: “Socte erâ nore biŋe.”
27Wofuŋzi Aroŋ dâŋ ʒiŋuc âzâcnewec: “Go Mose bâfuacmurâ mâreŋ tuhuo razemec.” Eme eki raku Anuture tiki fuŋnao bâfuarâ muduckewec.
28Eme Mose e Anutuzi dâŋ âzâcnewec â mâsi baocte mucnewec irec binaŋ Aroŋ bacne‐fârewec.
29Eme Mose â Aroŋ jahe ra Israe ŋic micne sasawa hetumaŋ‐jopapic.
30Ehuc Wofuŋzi Mose dâŋ âzâcnewec sâc i Aroŋzi jaza‐fârewec, erâ mâsi wiac i ŋic mai‐jeŋicko bawec.
31Eme ŋic jaŋe mana ʒakiembiŋ, erâ Wofuŋ e Israe ŋic nâŋere busâqoc manahuc fific guguriŋ‐nâŋec hone manac ewec, jaŋe iŋuc manarâ fodapehuc numucnembiŋ.
