Sakari 9

1

2

3

4

5

6

7

8

9

10

11

12

13

14

¹Waliyiya falan ni i ra, Alatala falan naxan tixi Xadiraki yamanan xili ma, a Damasi taan li. Amasɔtɔ Alatala gbeen nan adamadiin bonne ra, alo Isirayila bɔnsɔnne birin.

²A mɔn xa Xamata taan li, Damasi danna, e nun Tire taan nun Sidɔn taana, kolonna gbo dɛnaxan yi.

³Tire taan bata yinna ti, a bata gbetin malan alo burunburunna. A xɛmaan gbo alo kira xɔn borona.

⁴Koni Marigina a bama a yii nɛn, a yi a yinna radin baani, tɛɛn yi taan gan.

⁵Asikalɔn kaane na toma nɛn e gaxu. Gasa kaane fan gaxuma nɛn e xuruxurun, e nun Ekirɔn kaane, amasɔtɔ e yigitɛgɛma nɛn. Mangayaan ɲanma nɛn Gasa taani, Asikalɔn taani gelima nɛn.

⁶Siya basanxin fa Asadodi taan tongoma nɛn, n yi Filisitine wason kala.

⁷N suben bama nɛn e dɛ wunla naxan yi, e nun donse haramuxine. E dɔnxɛn naxanye na lu, ne fan findima nɛn en ma Ala gbeen na. E yi lu alo Yuda xabila kedenna. Ekirɔn kaane luma nɛn alo Yebusu kaane.

⁸Ganla naxanye danguma hanma naxanye fama, n daaxama nɛn n ma yamaan makantandeni ne ma. E mi luma fitina muxu yo a nɔɔn bun, amasɔtɔ iki n yɛɛn tixi e ra.

⁹Siyon kaane, ɛ ɲaxan han! Yerusalɛn kaane, ɛ xuini te sɛwani. Ɛ a mato! Ɛ mangan fama ɛ ma. A tinxin. A bata rakisi. A limaniya. A fama sofanla nan fari, sofali diina, sofali gilɛn diina.

¹⁰N yɛngɛ so wontorone bama nɛn Efirami yi e nun soone Yerusalɛn taani. Yɛngɛ so xanle kalama nɛn. A tan bɔɲɛ xunbenla ralima siyane ma nɛn. A mangayaan xuyama ayi nɛn keli fɔxɔ igen ma han fɔxɔ igena, keli baan ma han bɔxɔn danna.

¹¹Ɛ tan mabinni, n na ɛ muxu suxine xunbama nɛn en ma layirin wunla fe ra naxanye ramaraxi alo kasorasane yili kui xareni.

¹²Ɛ mɔn xa so taa makantanxini, ɛ tan kasorasaan naxanye yigi saxi. N mɔn xa a rali ɛ ma to: n ni i saranma nɛn dɔxɔɲa ma firin.

¹³Amasɔtɔ n bata Yuda yitɔn alo xanla, Efirami yi lu alo n ma xalimakunla. Siyon, n ni i ya dii xɛmɛne rakelima nɛn Girɛki kaane xili ma. N yi ɛ lu alo sofana silanfanna.

¹⁴Alatala a makɛnɛnma nɛn e xun ma, a xalimakunla yi siga alo kuye sarinna. Marigina Alatala xɔtaan fema nɛn, a fa yiifari ma tule foyeni.

¹⁵Alatala Sɛnbɛn Birin Kanna e rakantanma nɛn. E e dɛgema nɛn, e sigan ti lantan gɛmɛne fari. E e minma nɛn sɛwani, e sarin alo dɔlɔ minne. E lugo alo goron nafexina alo saraxa ganden tongonne wasan wunla ra kii naxan yi.

¹⁶Alatala, e Ala e rakisima nɛn na lɔxɔni, alo a xuruse kuruna. E nɔrɔxin yi lu a yamanani alo gɛmɛ faɲine mangaya taxamaseri kɔmɔtin ma.

¹⁷E tofanma nɛn han! E rayabuma nɛn han! Balon banxulanne ragboma nɛn, minse faɲine yi sungutunne rayabu.