1Findaŋdâŋ moc. Wofuŋtaonec dâŋ Hadarake mâreŋte biŋe fuawec i ʒine hâcne, erâ dâŋ izi Damasko hae wâc mâmâc rokac. Aram mâreŋko hae ŋeraŋgopieŋ jaŋere fuŋne mecne â Israe kikefuŋ gurune gurune jaŋere fuŋne i Wofuŋzi mâmâc hone manac eekac hâcne.
2Erâ Hamati mâreŋzi mai foha Tiro â Sidoŋ hae jahe mamana fojacte‐bipieha sifu dâŋ i jaŋere biŋe mâmâc ekac.
3Tiro e sacsanaŋ‐ticne moc bahuc siliwa‐ticne rufe iŋucne qâzuckewec, â golticne i sohoŋ iŋucne ɋârâŋne focnewec.
4Wofuŋzi ine moneŋ mafa‐ticne jâoc rorâ hâwecko beheme huocmu, hae e jahacne ine ʒoczi ʒâseŋkeocmu.
5Asikaloŋ rune jaŋe wiac i honerâ bipic tatara ejareocmu. Ehame Gaza hae rune jaŋe wâc hâwic‐jopame ɋarac ɋarac qaniŋmu, erâ Ekoroŋ hae rune jaŋe rorowec‐jeŋic omaeha iŋuc jaha eniŋmu. Gaza haeonec ŋicwofuŋ e ine sipirickeocmu, â Asikaloŋ hae i sesuctac fuarâ foocmu.
6Asidode hae ira ŋicŋondeŋ jaŋe juniŋmu, ehame Filisa ŋic jaŋere pepec penaroŋ i bawahapemu.
7No micjeŋickonec tiwâ bâzi sochec i bârâriepemu, â wiac mamakâcne kisoŋnerâ jueŋgopieŋ i jowac ropemu. Iŋuc ejarepe jaŋe ŋic ʒanʒaŋnezi Anutu‐nâŋecte biŋe jaha juhuc Judare ŋicguru moc iŋucne erâ juniŋmu; ehame Ekoroŋ rune jaŋe Jebusi ŋic jaŋere sâc erâ juniŋmu.
8No ruc bapa ŋic iŋucne ufuŋ‐nane râreckehuc juhape ŋic jaŋe ira sicne fotâc mocwâc mi enʒepieŋ, â ŋic gâcnezi fific mocwâc mi bacjopanʒepieŋ; ʒi no nahac ɋâricne juhuc ruc bapemu hâcne.
9O Zioŋte otâ, go ʒeri bari ec! O Jerusalem rune, go semuja hec! Manakic, ŋicwofuŋgezi gorao fakac e ŋic tiŋne â sanaŋne, e maŋ huhuŋheczi doŋgi faio fakac, doŋgi motecnere faio ŋehuc fakac hâcne.
10Erâ e Eferaimte ʒika keretac wiac â Jerusalem haere becâsic i bâsirowec‐jopaocmu. Â ʒikare tepe wiac i wâc bazu behec ehuc ŋicne ŋicne wama bâfua‐jarehame guriŋ bapa gie‐ticnezi hâwec fotâcne behec rahuc Eufrata opâo â mâreŋ qaŋeŋnao sâcke‐fâreocmu.
11Eme no gohec ʒâʒâfic epo ʒâʒâfic irec socte erâ kâpâcwâru ŋicfâcge nombâŋkonec fârec‐jopape wefuniŋmu.
12Jujuhâmo fua‐ŋareocte woworic gie baeŋgopieŋ ŋoŋe hae sanaŋ‐ŋeŋicko risieniŋ; no wiac bâmârehuc ŋarepemurâ mupaŋke‐ŋarekopac hâcne.
13Juda e tepe‐nane eha âpârepo â Eferaimzi ine tepe motecne ewec. O Zioŋ, no ŋokâfâcge qafeŋ‐jopape Grikŋic jaŋere ŋokâfâc râsi ejarenʒepieŋ, ehame go ŋic qac momori ere ʒika iŋucne ezemec.
14Eme Wofuŋ e fua‐jarerâ tepe qâtâcneme bâricnehuc raocmu, Wofuŋ Anutu e qeŋ qarâ juwic mâreŋkonec ʒâʒâkiriŋ mâŋâŋ irec maŋnao ware fisiocmu.
15Anutu Tâpiri Ɋuŋɋasaŋ Wofuŋ eki ŋezic‐jopame jaŋe tacbaŋ qaqa ŋic âte‐hâmoc‐jopaniŋmu, ehuc socjeŋic waiŋ opâ iŋucne nâkupie bujeŋiczi taha bapare râqâc iŋucne fuseocmu â alatare qenʒoŋnao soc ŋeekac irec sâc eocmu.
16Wofuŋ Anutu‐jeŋic e dameŋ ira ŋicfâc‐ticne bafic‐jopahuc lama iŋucne hone maiŋ ejareocmu. Eme jaŋe eri hendiŋko qânâ furi sâkozi bâricnehuc tamaeekac irec sâc ehuc mâreŋ‐ticne sâcke‐fârerâ juhâmoniŋmu.
17Oi, mâreŋ i biaŋne â mâririhec foocmu i! Ehame padi jacgoŋzi ŋic motec gume qiŋjopaocmu â waiŋ opâzi naru ʒeŋoŋ dopec‐jopaocmu.
