Job 36

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Ac Elihu el sifilpa fahk:

²“Sifilpa mongfisrasr kitin pacl ac lohng Kas ma nga ac aolla God ac fahk.

³Yohk ma nga kalem kac; nga ac orekmakin ma kalem sik uh In akkalemye lah God, su oreyula, El suwosna.

⁴Wangin kas kikiap ke ma nga ac fahk nu sum inge; Kom liye sie mwet na lalmwetmet ye motom.

⁵“Arulana yohk ku lun God! Wangin sie mwet El srunga; Wangin kutena ma El tia kalem kac.

⁶El tia lela mwet koluk uh in moul na, Ac El oru ma suwohs nu sin mwet sukasrup in pacl nukewa.

⁷El loangelos su suwosna moul la; Ac lela tuh elos in leumi oana tokosra, Ac oru in akfulatyeyuk elos nwe tok.

⁸Tusruktu mwet uh fin kapiri ke sein, Ac keok ke sripen ma koluk elos orala,

⁹God El akkalemye nu selos ma koluk lalos ac inse fulat lalos.

¹⁰El oru elos in lohng kas in sensenkakin lal nu selos Tuh elos in forla liki orekma koluk.

¹¹Elos fin akos God ac kulansupal, Na elos ac insewowokin moul lalos uh in misla ac wo ouiya.

¹²A elos fin tia akos ac kulansupu God, na elos ac anwuki ke cutlass, Ac misa in nikin lalos.

¹³“Mwet su tia etu God uh elos ac mutana in kasrkusrak lalos, Ac finne akkeokyeyuk elos, elos tia pre in suk kasru.

¹⁴Elos ac srakna fusr na elos misa, Eli ke sie moul lusrongten.

¹⁵Tusruktu God El luti mwet uh ke mwe keok nu selos, Ac ikasla mutalos ke mwe ongoiya.

¹⁶“God El ke folokinkomme liki ongoiya, Nu ke sie acn mwesas, yen wangin ma ikus kom; Ac tepu lom uh sessesla ke mwe mongo yuyu.

¹⁷Tusruktu, inge akkeokyeyuk kom oana ma fal in orek nu sum.

¹⁸Taranna kom in tia lela molin eyeinse in kiapwekomla, Ku mwe kasrup in aktafongyekomla.

¹⁹Kom finne pang ke kuiyom nufon in suk kasru, ac fah wangin sripa; Ku lom nufon tia ku in akwoye kom inge.

²⁰Nimet kom ke in tari fongeni, In sun pacl ma mutunfacl lulap uh ac fah wanginla.

²¹Karinganang kom in tia forla nu ke ma koluk; Mwe keok lom inge ma tuku in tuh sruokkomi liki ma koluk.

²²“Esam lupan yokiyen ku lun God uh; Su sie mwet luti oana El?

²³Wangin mwet ku in fahk nu sin God ma Elan oru, Ku fahk mu koluk ma El oru uh.

²⁴Nuna kaksakinyuk El pacl nukewa ke ma El oru; Enenu na kom in wi pac kaksakunul.

²⁵Mwet nukewa liye tari ma El orala; Tusruktu kut ac tu na oe saya liye.

²⁶Kut tia ku in etu na pwaye lupan fulat lal uh, Ku oakla pisen yac lal uh.

²⁷“God pa orauk kof uh liki faclu, Ac ekulla nu ke tulin af uh.

²⁸El oru tuh kof uh in kahkla liki pukunyeng uh Ac afi nu fin mwet nukewa.

²⁹Wangin mwet etu lah pukunyeng uh mukuikui fuka, Ku lah fuka tuh pulahl uh ngirngir In acn engyeng uh yen God El muta we.

³⁰El supu sarom nu in acn nukewa yen engyeng uh, Tusruktu acn loal in meoa uh nuna lohsr na.

³¹Pa inge luman kiteyen mwet uh sel, Ac El sang mwe mongo puspis nun mwet uh.

³²El sang paol sruokya sarom uh, Ac sap tuh in tungalya acn El ac fahk uh.

³³Pusren pulahl uh sulkakin lah paka se ac tuku, Ac un cow uh etu lah ac pakala.