Ayuba 36

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Elihu man naxa a fala,

²«I xa mamɛ ti, n fama n ma lɔnni masende i bɛ Ala xa fe kui.

³N ma lɔnni kelima yire makuye nɛ. N nɔndi fima nɛ n Daa Mangɛ ma.

⁴Wule yo mu na n ma masenyi kui. I nun naxan a ra yi ki, tinxintɔɛ nan a ra naxan xa lɔnni kamalixi.»

⁵«Ala sɛnbɛ gbo, a mu yoma mixi yo ma. A sɛnbɛ gbo, a ɲanige fan.

⁶A mu a luma mixi ɲaaxie xa bu, a mɛɛnima tɔɔrɔmixie ma.

⁷A mɛɛnima nɛ tinxintɔɛe ma, a e rasabati mangɛe sɛɛti ma kibanyi, a e xa fe ite e xa bu abadan.

⁸Kɔnɔ xa e suxuxi tɔɔrɛ nan kui,

⁹a e xa fe ɲaaxie masen e bɛ, e naxee rabaxi e xa yɛtɛ igboɲa kui.

¹⁰A marasi fanyi fi e ma, a a fala e bɛ e xa tinxintareya bɛɲin.

¹¹Xa e e tuli matima a ra, e na sɛriyɛ rabatu, e xa simaya xɔn kuyama nɛ hɛɛri kui, e xa fe birin sɔɔnɛya.

¹²Kɔnɔ xa e mu e tuli matima a ra, e faxama nɛ santidɛgɛma ra lɔnnitareɲa kui.

¹³Tinxintaree xɔnɔma, e mu Ala maxandima a na e suxu tɛmui naxɛ.

¹⁴E faxama e fonike nan na langoee ya ma.

¹⁵Kɔnɔ Ala tɔɔrɔmixie rakisima nɛ e xa tɔɔrɛ saabui ra. Tɔɔrɛ nan marasi fima e ma.»

¹⁶«A wama i tan fan nakisife i xa tɔɔrɛ kui, alako tɔɔrɛ naxa i raxɛtɛn, alako donse fanyi xa lu i yi ra.

¹⁷Kɔnɔ i na a raba alɔ mixi ɲaaxie, ɲaxankatɛ naxan lan a xa dɔxɔ mixi ɲaaxie ma, na kiiti tinxinxi nan dɔxɔma i fan ma.

¹⁸I naxa yo Ala ma i xa xɔnɛ kui, i naxa gbilen Ala fɔxɔ ra se nde xa fe ra.

¹⁹I wa xui nɔma i raminide i xa tɔɔrɛ kui? I nɔma na rabade i yɛtɛ sɛnbɛ ra?

²⁰Kɔɛ naxa findi i bɛ mixi tɔɔrɔ se ra,

²¹i naxa bira fe ɲaaxi fɔxɔ ra i xa tɔɔrɛ xa fe ra.

²²Fisamante nan Ala ra a sɛnbɛ xa fe ra. Nde nɔma a raside?

²³Nde nɔma a yamaride? Nde nɔma a falade, ‹I bara tantan?›

²⁴I xa a xa kɛwali matɔxɔ, alɔ mixie luma a ba ra bɛɛti ra ki naxɛ.

²⁵Adamadi birin bara a xa wali to, duniɲa birin a toma kelife yire makuye.

²⁶Ala sɛnbɛ gbo, won mu nɔma na birin kolonde. Won mu nɔma a xa abadan kɔnti kolonde.

²⁷A ye tonbie mafindima tunɛ ra, a fa a ragoro bɔxi ma.

²⁸Nuxuie nan tunɛ ye rayensenma adamadi birin xun ma.

²⁹Nde nɔma nuxui xa wali fahaamude? Nde nɔma galanyi xa fe kolonde?

³⁰A seyamakɔnyi ragoroma baa ma, a naiyalanyi xungbe ramini.

³¹A ɲamanɛ makiitima nee nan na. A baloe fima e ma a fanyi ra.

³²A seyamakɔnyi wolima a waxɔnde.

³³Galanyi xui mixie rakolonma nɛ tunɛ xa fa ma, hali xuruse gɔɔrɛe fan nakolonma nɛ, e nu fa gbata e makɔrɛde e lingira ra.»