Jesaja 10:3-14

³Okac dameŋ maic‐ŋopame wenac eniŋmu? Â mâŋâŋ sâqocne taickonec fisime wena raniŋmu? Morao wiserâ rapie bafic‐ŋopaocmu? Mafa mâriri‐ŋeŋic wena soŋkepie foocmu?

⁴Kâpâcwâru ŋic jaŋere guruo babarâ juju, me qâhâmoc‐jopakicne ŋondeŋ‐jeŋicko fofo, wiac i sawa fua‐ŋareocmu. Eme sifu kimbeŋ‐ticnezi mi qaʒue wahakac, â menezi mi betaŋkehuc qiŋ herâ domakac jaha.

⁵Jei, Asiria e kimbeŋ‐nanere ɋaruc â aaric‐nanere kâcbiŋ ekac.

⁶No ŋicguru sindaŋne jopaocte sorekopac, kimbeŋ‐nane hurembiŋ jaŋerao giedâŋ mucnekopac; e mafa‐jeŋic jowac rohuc huhure‐jeŋic rauckezejec, ro waha âte ejarekume hatao goteŋ iŋucne enʒepieŋ.

⁷Eki ine iŋuc mi maŋkekac â maŋnezi iŋuc mi manasukac; e sisipiric gie baocte aŋackekac, â ŋicguru omaec‐jopaocte mukac i afecne mâcne.

⁸E ʒiŋuc hâcne manasukac: “Micnefâc‐nane jaŋe ŋicwofuŋ sasawa i!

⁹Kalono hae e Kakemisi hae ere sâc mi ewec me? Hamati hae e Arapada hae ere sâc mi ewec me? Samaria e Damasko ere sâc mi ewec me?

¹⁰Menanezi ŋicguru jopapo jaŋere nemuɋâŋzi Jerusalemnec â Samarianec jaŋere siric‐joparâ kâcɋene domambiŋ, eme no sifu mi bâipiec‐jopapo.

¹¹Irec no Samaria â ɋâŋ qâqâtâcfâcne wiac ejarepo, sâc ijaha Jerusalem â nemuɋâŋfâcne mi ejarepemu me?”

¹²Eme ʒiŋuc fuaocmu: Wofuŋzi Zioŋ tikio â Jerusalemko gie‐ticne batara‐fârerâ Asiria ŋicwofuŋ maŋfefe‐ticnere â pepec ʒâŋe fifi‐ticnere okacne râcneocmu.

¹³E ʒiŋuc hâcne mukac: “No menanere tâpirizi gie i bapo â mamana fonarekacte maŋɋârâŋ‐nanezi epo; no ŋicguru mâreŋ‐jeŋicte ma bârâriepo â moneŋ mafa rowaŋ‐jeŋic omaepo, erâ eri ŋeŋeo ŋembiŋ jaŋe herândiŋ‐jopapo, i bulimakao ŋicnezi mâsi eekac irec sâc.

¹⁴Ŋicguru jaŋere mafa mâriri rowaŋ i menanezi wawaŋ sesuc iŋucne bâfuawec; â ŋiczi wawaŋ hândâŋ ro amec eeŋgopieŋ, iŋuc mâreŋ sâc wiac ro nusec epo. Eme moczi moc fakecnezi qiriŋ mi qawec, me micne aŋkerâ dâŋ wâc mi dâŋewec.”