1Jei, sâcmutâc dâŋ hehesicne ââkendâŋ ŋic ŋoŋe! Jei, ro waha âte eejare dâŋ qâreŋkehuc ŋeŋe ŋoŋe!
2Ŋic qarâ suriŋne jaŋere dâŋzi mumutiŋ ŋic mai‐jeŋicko fârimâc eocte guriŋne baeŋgopieŋ, â ŋicfâc‐nane hapetac mumutiŋ sakare‐jareeŋgopieŋ. Hozec wiac biŋe‐jeŋic bâkiri bajareeŋgopieŋ, â bekâ mâsiŋ jaŋere wiac kâŋgâc jowac roeŋgopieŋ.
3Okac dameŋ maic‐ŋopame wenac eniŋmu? Â mâŋâŋ sâqocne taickonec fisime wena raniŋmu? Morao wiserâ rapie bafic‐ŋopaocmu? Mafa mâriri‐ŋeŋic wena soŋkepie foocmu?
4Kâpâcwâru ŋic jaŋere guruo babarâ juju, me qâhâmoc‐jopakicne ŋondeŋ‐jeŋicko fofo, wiac i sawa fua‐ŋareocmu. Eme sifu kimbeŋ‐ticnezi mi qaʒue wahakac, â menezi mi betaŋkehuc qiŋ herâ domakac jaha.
5Jei, Asiria e kimbeŋ‐nanere ɋaruc â aaric‐nanere kâcbiŋ ekac.
6No ŋicguru sindaŋne jopaocte sorekopac, kimbeŋ‐nane hurembiŋ jaŋerao giedâŋ mucnekopac; e mafa‐jeŋic jowac rohuc huhure‐jeŋic rauckezejec, ro waha âte ejarekume hatao goteŋ iŋucne enʒepieŋ.
7Eki ine iŋuc mi maŋkekac â maŋnezi iŋuc mi manasukac; e sisipiric gie baocte aŋackekac, â ŋicguru omaec‐jopaocte mukac i afecne mâcne.
8E ʒiŋuc hâcne manasukac: “Micnefâc‐nane jaŋe ŋicwofuŋ sasawa i!
9Kalono hae e Kakemisi hae ere sâc mi ewec me? Hamati hae e Arapada hae ere sâc mi ewec me? Samaria e Damasko ere sâc mi ewec me?
Jesaja 10
Jesaja 10:1-9