Isaías 1:12-26

¹²¿Ibiga be an-asabin danimala? ¿Doa bega ibdurgan-sedamaloye sogsa? Unnila anse-goled-neg-imba-oichogega be nonidamalad.

¹³Melle bar be anga ibmar-ukleged-gwen-igarga-gusulid sedamalo. Ar ina-wawadikid anga ibmar-isganaga gued. Nii-binidgi, iba-onoleged an budar dakgusad, obunnoged-ibagi, iba-onoleged an budar dakgusad, dulemar-bular-onmaknonidamalad an budar dakgusad, be-an-nug-odummomalad, aka bur an-ourwe damalad, bar an itobisulid.

¹⁴Bemar nii-binid-gwisguedgi iba-onogedi, an budar itogusad. Itoakwaa-iba-onolegedi, an budar itogusad. Ibmar-nuedga gwen anga gusulid, abali, an budar itogusad.

¹⁵Bemar anse-goledgi argan-onakwialile, an bemar-dakosulid, wagar-biir an bemar-idu imakoed. Ar gandikidgi bemar anse gornanaile, an bemar-itogosulid. Ar bemar dulemar-ibe ablis eosmalad.

¹⁶”¡Isguedgi be bangumar, swilidik be gumar! ¡An-asabin ibmar-isgana-imakedgi be bangumar! ¡Melle bar ibmar-isgana be imakmar!

¹⁷¡Igar-nuegan-imaked be durdakmar! ¡Igar-napiragwad be imakmar! ¡Dule-mesagwar-imaklediid be bendakmar! ¡Dule-sergan-satedga be igar nabomar! ¡Siamar-ei-sui-burgwismalad-ular, be gwisgumar!”

¹⁸Bab-Jehová soged: “Be dagmar, anmar igar nudakmargwelo. Bemar-isgued, ginnitibiyob-gue-inigwele, boo-sibudikidyob-dakle naoed. Bemar-isgued, mor-ginnidyob-gue-inigwele, sibad-wawaad-e-absar-dagudikid-daklegedyob naoed.

¹⁹Ar bemar an-sogedba nanamaloye sogele, be-yargi ibmar-nuegan-sanmakoedi be gunmaloed.

²⁰Ar bemar amba an-itosulile, angi be gwisgudmalale, es-suidgi be ogilolemaloed.” Ar Bab-Jehová, e-sunnagwad deyob soged.

²¹Neggwebur-innikigwad, ¿ibiyobi gambanuchusaedga be gusa? Gebe-iduar, igar-napiragwadbi be imakdidaenad. Igar-innikigwadbi begi nai gusanad. Emide, unnila dule-gindakmaladbi begi gudigusmarsunnad.

²²Gebeunni be maniyob-gumalanad, emidi, durganga-binnideyob be gudnanaed. Vino-nuedyob be gumalanad, emidi, vino dii-sunnabi-goblegeyob be gudnanaed.

²³Be-dummagan-neg-dakmamaid dulegi-gwisgumaladid. Amarde, dule-ibmar-atursamalad-e-sordamalad. Manigi-dule-binsaed-gaedgi bela na yeer itodamalad, dulemar-ega-ibmar-uked unnila abedamalad, dule-sergan-sated-ular sunmakdasurmalad, siamar-ei-sui-burgwismalad-e-igar gwen bai dakdasurmalad.

²⁴A-ulale, Israel-dulemar-e-Bab-Jehová-Bela-Gangued-Nikad, weyob soged: “¡Wese ugaksun! An-isdarmaladga an igar nudakoed, an-isdarmalad an buged imakoed.

²⁵Gannar an-argan an bemarse oyogoed, bela be-isgued an elioed, degi, bela begi ibmar-isgana-naid an osulogoed.

²⁶Bega dule-igar-nabomalad gebe-iduar-bukusadyob an oambikuoed, dule-be-unamalad gebe-iduar-ambikusadyob an oambikuoed. Degisoggu, Neggwebur-Innikigwadye be-nugsamaloed, Neggwebur-Sogedba-Daedye be-nugsamaloed.”