Eʒekie 27

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

¹Wofuŋte dâŋ norao ʒuhuckerâ ʒiŋuc fuawec:

²“O ŋicte ɋâric, go Tiro haere makuc gae moc hefuac.

³Ehuc Tiro hae hâwecmecko ŋeekaczi mâreŋ sâc ŋicne ŋicne â nucne nucne jaŋehec âbârâ gie baekac e ʒiŋuc âzâcnec: Wofuŋ Anutu e dâŋ kecʒiŋuc mukac: “O Tiro hae, go kecʒiŋuc mumeŋ: ‘No wokere sâc biaŋne jâmbâŋ.’

⁴Giegaŋge i hâwec ʒâʒâŋiŋko fokac; gieŋicfâcge jaŋe sahac hawarige basarickehuc bambiŋ.

⁵Paraŋ wiacge i Seniri mâreŋkonec bizojâczi bafârembiŋ; â jâmânere ine Lebanoŋ tikionec jâmâzâc rombiŋ.

⁶Foige i Basaŋ mâreŋkonec boriŋjâc he fasaec embiŋ; â wokere maŋne ine Kipiro nuckonec jâczi bambiŋ, ehuc elefaŋte ʒuŋenezi ba eric embiŋ.

⁷Aigita mâreŋkonec qoruc qâreŋ biaŋhec izi rac bapie mage ewec; â woke bupune ine Kipiro nuckonec qoruc furi sâko bâbâroŋ â bugeneheczi ɋâtâmbiŋ.

⁸Sidoŋ â Arawada haeonec ŋic jaŋe foi qaqafâcge erâ juhapie, gahacne ŋic mepapac jaŋe guriŋ bapafâcge erâ jumbiŋ.

⁹Gebali haeonec ŋic kâcɋene â ŋic mepapac jaŋe gore maŋko juhuc kikisuge sâfâzi ʒimickembiŋ; Woke sasawa â ŋicfâc‐jeŋic jaŋe gorao fisirâ, gohec âbârâ gie bambiŋ.

¹⁰“Perisia â Ludi â Puti ŋic jaŋe ʒikaŋicfâcge erâ jumbiŋ, jaŋe maro erâ aeŋdu wiac‐jeŋic gorao hepie ŋehuc juwec; jaŋe hâcne ʒâŋe biŋege fuaocte giene bambiŋ.

¹¹Arawada haeonec ŋic jaŋe go gahacne ŋicfâc jaŋehec ruc bapa ŋic erâ jumbiŋ. Ehame Gamada ŋic jaŋe ficʒorage hâŋ bafekicne ira ferâ ŋembiŋ, ehuc maro‐jeŋic qânâsacko râepie qâfeŋneme hawari biaŋge fuawec.

¹²“Go mafa mâririge fofo dunduŋ fogarewecte Tarasisi ŋic jaŋe gohec âbârâ gie bambiŋ, ehuc siliwa, aeŋ â wapa erâ led izi goraonec wiac gâcne furine bambiŋ.

¹³Jawaŋ, Tubali erâ Meseke ŋic jaŋe gohec wiac nareŋ gareŋ embiŋ; jaŋe goraonec wiac furine baniŋte kiŋaŋ qaqa â aeŋ bâbâroŋzi râqâc wiac bakicne i amec‐jopa fisimbiŋ.

¹⁴Bete‐Togarama mâreŋkonec ŋic jaŋe goraonec wâcwiac kitâcne‐jareocte becâsic â doŋgi bacjopa fisimbiŋ.

¹⁵Rodo nuckonec ŋic jaŋe gohec wâc nareŋ gareŋ embiŋ, ehame hâwec mâreŋte ŋicne ŋicne siricfâcge jufârembiŋ jaŋe goraonec wiac furine baniŋte elefaŋte ʒuŋe â bonejâc wiac bafisi‐garembiŋ.

¹⁶Go mafa mâririge fofo dunduŋ fogarewecte Edomŋic jaŋe gohec âbârâ gie bahuc jumbiŋ, ehuc goraonec wiac i qânâ â qoruc furi sâko â qoruc qâreŋ biaŋ erâ qoruc hahameŋne â kubu wiac erâ qânâ furi sâko bâbâroŋ izi furine bambiŋ.

¹⁷Juda â Israe ŋic jaŋe gohec nareŋ gareŋ ehuc goraonec wâcwiac i padi â oliwa â jâmbo hândâŋne erâ baŋac â wokemaŋ wiac izi furine bambiŋ.

¹⁸Damasko ŋic jaŋe gohec âbârâ gie bambiŋ wâc, ehuc wiac hawari fuŋne fuŋne fogarewec i Heliboŋ mâreŋkonec waiŋ â lama kanʒaŋ wiac izi furine bambiŋ.

¹⁹Wedaŋ â Jawaŋ ŋic jaŋe Uʒali mâreŋkonec aeŋ wiac ba akic ekicne bafisi‐garembiŋ, ehuc musijâc uucne â wiac âsu biaŋ gâcne i goraonec wiac furi baniŋte bafisimbiŋ wâc.

²⁰Dedaŋŋic jaŋe ine becâsicko ŋeŋere qoruc wiac bafisi‐garembiŋ.

²¹Arabia ŋic â Kedara ŋic fekicne jaŋe gohec nareŋ gareŋ eniŋte lama bulimakao â noniŋ wiac amec‐jopa fisimbiŋ.

²²Seba â Rama haeonec ŋic jaŋe goraonec wiac furine baniŋte wiac âsu biaŋ fuŋne fuŋne â qânâ furi sâko erâ gol bafisimbiŋ.

²³Haraŋ, Kane, Edeŋ, Asihuru â Kilimadi ŋic jaŋe gohec âbârâ gie bambiŋ wâc.

²⁴Jaŋe ŋaqi qoruc biaŋne â ŋaqi ʒora qoruc furi sâko â qâreŋneheczi bakicne erâ ɋâriŋko rurumac qoruc foforierâ muczi basanaŋkekicne i bafisi‐fârembiŋ.

²⁵Tarasisionec woke jaŋe wiac i sasawa furire biŋe bafisi‐gare jumbieŋ hâcne. “Iŋuc egarepie mafa mâriri sâkohec etec ʒâŋe biŋegezi hâwecne hâwecne sâcke‐fârerâ fowec.

²⁶Foi qaqa ŋicfâcge jaŋe foicgupie hâwec ʒâʒâŋiŋko rameŋ. Ehame ʒoaŋ wewefunaonec mâŋâŋzi fisirâ qanʒaŋguwec.

²⁷Eme mafa mâririge mecne nareŋ gareŋ eere mafa wiac mecne, wokeŋic â guriŋ bapa ŋicfâcge mecne, woke ʒiʒimic ŋicfâcge mecne nareŋ gareŋ gie bapa ŋicfâcge mecne, momorifâcge gohec jumbiŋ mecne, erâ ŋic gâcne gohec jumbiŋ jaŋe sasawa sisipiric dameŋge maickeme hâwec fâhâŋnao hufârembiŋ.

²⁸Guriŋ bapafâcge jaŋe ki owa epie mâreŋzi ɋiɋiteckewec.

²⁹Ehame foi qaqa ŋic jaŋe woke‐jeŋickonec tararâ waha‐fârembiŋ. Wokeŋic â guriŋ bapa ŋic sasawa jaŋe moŋgeŋko ferâ domahuc

³⁰gore erâ kio ŋâŋâtâc ehuc owa ruruckembiŋ. Jaŋe rufe fiapie fai‐jeŋicko feme ʒafemaŋko fohuc risimbine qambiŋ.

³¹Jaŋe gore erâ qizec‐jeŋic utu pârâc bambiŋ, â mateŋ qonaŋke‐fârembiŋ, ehuc gore erâ wâuŋa qahuc ki mamakuc embiŋ.

³²Jaŋe iŋuc ehuc gore makuc gae moc ʒiŋuc hefuambiŋ: ‘Mozi Tirore sâc hâwec ʒâʒâŋiŋko moc sipirickewec?

³³Go hâwecko rac warec erâ nareŋ gareŋ gie bahuc ŋic bocjaha bubiaŋ qajaremeŋ; mafa mâririge ɋâfoŋne foweczi mâreŋne mâreŋne ŋicwofuŋ dope hutuŋ ejaremeŋ.

³⁴Ʒi ine hâwec sirizi qanʒaŋgume, hâwec fâhâŋnao hujâmbâŋkemeŋ; ehame furi bapare wiac â wokeŋic sasawa jaŋe gohec mâmâc hufârembiŋ.

³⁵Irec hâwecmecko ŋic ŋec juc eeŋgopieŋ jaŋe honecgurâ bipic tatara ejare‐fârekac; ŋicwofuŋfâc‐jeŋic jaŋe fâfâre sâqorepie hawari‐jeŋic memezacne ekac.

³⁶Ŋic gurune gurune jaŋere âbârâ gie bapa ŋic jaŋe mu ruruc egareŋgopieŋ; go ɋeŋfâfâc jaha sipirickemeŋ i, go omae‐jâmbâŋkemeŋ hâcne.’”