1“O ŋicte ɋâric, go sâqe ʒora micnehec moc rorâ sâqe kiruŋ iŋucne bahuc qizec susuc â mecʒâwâge rorâ sigelio râerâ guru jahec â moc bacjopazemec.
2Ehuc guru moc i somâ bapa dameŋ tarame hae ʒâʒâŋiŋko ʒocko behetec ʒazejec; â guru moc i hae orâŋkehuc ʒikazi qâtâtiezemec, erâ guru moc i ine mâŋâŋko behetec ficneme raha ʒikahec bâjâperâ rapemu.
3Ehame qizec susuc jahec mac rorâ ŋaqigao basanaŋkezemec.
4Ehuc gâcne mocwâc rorâ ʒocko behetec ʒaoc, eme irecnec hâcne ʒoc fuarâ Israe kikefuŋ sâcke‐fâreocmu.”
5Wofuŋ Anutuzi ʒiŋuc mukac: “No Jerusalem hae i ŋic gurune gurune jaŋere ŋondeŋko bâfuarâ râepe ŋekac, ehame hae mâreŋ gâcnezi râreckerâ fokac.
6Eme e ŋic gurune gurune â mâreŋne mâreŋne jaŋere sâc jâuruhuc sâcmutâc â dâŋsanaŋ‐nane qatara sanaŋkewec, e sâcmutâc dâŋnane qikiŋnehuc dâŋsanaŋ‐nanere sâcko mi juju qatarawec hâcne.
7Irec Wofuŋ Anutu‐ŋeŋic noni ʒiŋuc mukopac: Ŋoŋe ŋic gurune gurune orâŋ‐ŋopahuc juŋgopieŋ jaŋere sâc jâuruhuc maŋrâŋgeŋ sâko bâfuarâ dâŋsanaŋ‐nanere sâcko mi jumbiŋ â sâcmutâc dâŋnane mi reŋkembiŋ erâ ŋic gurune gurune rârec‐ŋopahuc juŋgopieŋ jaŋere sâcmutâc wâc mi reŋkembiŋ.
8Irec Wofuŋ Anutu‐ŋeŋic no ʒiŋuc mukopac: Noni hâcne râsi eŋarehuc ŋicne ŋicne jaŋere maio okacne bazu‐ŋarepemu.
9“No sindaŋ wiac‐ŋeŋic sasawa irec erâ mâsi furune moc, mârâc mi fua‐ŋarewec erâ juku wâc mi fua‐ŋarezokac i hâcne ŋoŋerao epemu.
10Ine ʒiŋuc, ŋondeŋ‐ŋeŋicko mamac jaŋe naru motecfâc‐jeŋic nâcjopaniŋmu â naru motec jaŋe mamacfâc‐jeŋic nâcjopaniŋmu. Ehame no okacne bazu‐ŋarehuc ʒanʒaŋnefâc‐ŋeŋic bâtâtiec‐jopape faic â juwic erâ ŋifec â ŋifec rafâreniŋmu.
11Wofuŋ Anutu no ʒiŋuc mukopac: Ŋoŋe eebapa‐ŋeŋic sâqocne â hehesicnezi tiri ufuŋ‐nane hegâpârembiŋ, irec no jujâmbâŋkekopacte bâsirowec‐ŋopapemu, ehuc busâqoc mana‐ŋarehuc moc mi akic‐ŋopapemu.
12Ŋoŋeraonec ŋic tucne jaŋe huc mimicnezi rocjopaocmu â rorocte hâmo sipiric eniŋmu, tucnezi rârec rârec ʒika fokac irec micko fefâreniŋmu, erâ tucne jaŋe ine mupe tâtierâ mâreŋ qaŋeŋne fokac sâc rafârehapie no ʒikahec rahuc jopa jâpec ejarepemu.
13“Iŋuc ejarepe aaric‐nanere fârine fuame kimbeŋ‐nane wahaocmu â maŋnane mâteŋkeocmu. Iŋuc fuame jaŋe ʒiŋuc mana tarahuc munʒepieŋ: ‘Wofuŋ e ʒoɋac‐ticnere erâ aaric mana‐nârehuc kimbeŋ qanârewec.’
14Erâ manakic, no mupe Jerusalem hae‐ŋeŋic niniŋ siarereŋ fuarâ foha ŋicne ŋicne râreckehuc juŋgopieŋ jaŋe, ŋic ira sicne fotâc eniŋmu jaŋere maio rune ŋoŋe mu ruruc eŋareniŋmu.
15No kimbeŋ aaricko dâŋŋeŋic mutarahuc okacne bazu‐ŋarepe ŋicne ŋicne orâŋ‐ŋopahuc juŋgopieŋ jaŋe ŋoŋere manapie mamakâcne eha âke sisic eŋareniŋmu; ŋifec ine uŋsawaŋ‐jeŋic eha hâwic‐jopazejec. No Wofuŋzi hâcne mukopac.
16No imac‐ŋopapemurâ roroc fufuare tepe motec, sisipiricte tepe motec hâcne, i qâtâcnepemu. No mupe roroc fua‐ŋareme nânâ poroŋ‐ŋeŋic omaezejec.
17Erâ nonizia mupe roroc fua‐ŋareme qowi mimicne jaŋe naru motecfâc‐ŋeŋic nâ sipiric ejareniŋmu. Ŋoŋerao huc mimicne â soc rurua fuaha ʒikare meo râec‐ŋopapemu. No Wofuŋzi hâcne mukopac.”
