1Wofuŋte dâŋ kecʒiŋuc fua‐narewec:
2“Ŋicte ɋâric, go Israe tiki mâreŋkopec fitec rahame irec findaŋdâŋ muzemec.
3Ehuc ʒiŋuc muzemec: Israe tiki mâreŋ, go Wofuŋ Anuture dâŋ manac: Wofuŋ Anutu e Israe tiki mâreŋ â facne facne erâ opâ wâcne wâŋgoroŋ â wâneŋne wâneŋne ŋoŋe dâŋ ʒiŋuc ŋazakac: Manaŋgopieŋ, noni hâcne ʒikare biŋe râec‐ŋopahuc ɋâŋufuŋ wiac‐ŋeŋic tikio ŋerakac i imacke‐fârepemu.
4Alata wiac‐ŋeŋic i ima bazo â hosâc âsu alata wiac i qanʒaŋnezo, ehame no qâhâmoc‐jopakicnefâc‐ŋeŋic jaŋe nemufâc‐ŋeŋic jaŋere maio behec‐jopape foraniŋmu.
5Erâ no Israe ŋic ŋoŋere qâŋɋâŋfâc i nemufâc‐ŋeŋic jaŋere maio guruc‐jopapemu, ehuc siec wiac‐ŋeŋic i alata‐ŋeŋic râreckerâ bâtâtiehuc râe rapemu.
6Hae‐ŋeŋic tâtie‐fâreme nemuɋâŋfâc‐ŋeŋic jaŋere fic hae i niniŋ siarereŋ fuarâ foocmu. Ehame alata wiac‐ŋeŋic i henʒaŋnepie omaeocmu, â nemuɋâŋfâc‐ŋeŋic jaŋe qanʒaŋ‐joparâ sipiric‐jopaniŋmu. Erâ hosâc âsu ririke alata‐ŋeŋic i heropiehuc meqâreŋ‐ŋeŋic ima bafâreniŋmu.
7Eme no Wofuŋ jukopac, i ŋoŋe mana taraniŋte qâhâmoc‐jopakicnefâc‐ŋeŋic jaŋe ŋondeŋ‐ŋeŋicko foraniŋmu.
8“Eme no gâcne ŋoŋe akic‐ŋopape ʒika wisecnehuc mâreŋ sâc tâtierâ ŋicne ŋicne jaŋere ŋondeŋko juniŋmu.
9Eme ŋoŋe ŋicne ŋicne jaŋere ŋondeŋko kâpâcwâruo juhuc nore manasuniŋmu. Ŋoŋe wiac mamakâcne ehuc maŋŋeŋiczi qikiŋnurâ nemu jaŋerao ʒâŋe fihuc qohotapie aaricnume qanʒaŋ‐ŋopapo i hâcne manasuniŋmu. Ehuc ŋoŋe ŋaŋacnere â eebapa‐ŋeŋicte manapie wiac mamakâcne eocmu hâcne.
10Ehuc nore ʒiŋuc mana taraniŋmu: Eki hâcne Wofuŋ jukac, e ʒârâ hâriŋ wiac keci fai‐nâŋecko râeme feocte qanaŋ uŋdâŋ nâzâwec i fârimâc mi ewec.”
11Wofuŋ Anutuzi kecʒiŋuc mukac: “Israe kikefuŋ eebapa‐jeŋic mamakâcnere erâ me qahuc kike âteicke‐jarerâ ʒiŋuc muzemec: ‘Jei!’ Jaŋe ʒikare â rorocte erâ huc mimicnere sipirickeniŋmu hâcne.
12Ehuc ʒoricko juocmu e huc mimicnere hâmoocmu â bembeŋko juocmuzi ʒikare biŋe eocmu, me wiac izi bâtirime juocmu eki ine roroc fuame sipirickeocmu. No iŋuc ehuc kimbeŋ qajarepemu hâcne.
13Qâhâmoc‐jopakicnefâc‐jeŋic jaŋe nemuɋâŋfâc‐jeŋic jaŋere ŋondeŋko alata wiac‐jeŋic râreckehuc foraniŋmu, me tikine tikine â tiki botâŋne sâc erâ jâc dodomane â boriŋjâc fuŋnao â nemuɋâŋfâc‐jeŋic hosâc âsu biaŋ rike‐jare jumbieŋko ira forapie honec‐joparâ, no hâcne Wofuŋ jukopac i mana taraniŋmu.
14Eme no menane sicnehuc râsi ejarepemu, ehuc mâreŋ‐jeŋic imackepe niniŋ siarereŋ fuarâ foocmu. Ŋeŋe hae‐jeŋic mâreŋ sawaonec fuŋkerâ raku Ribela haeo tarakac ira hâcne wiac iŋuc ejarepe jaŋe no hâcne Wofuŋ jukopac i mana taraniŋmu.”
