Eʒekie 44

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

¹Eme sâc bapa ŋic e jowacnume risierâ furu ufuŋte sacmotâc ʒoaŋ wewefunaopec fowec ira rapec. Rarâ honepere motâc i hehe fowec.

²Eme Wofuŋzi ʒiŋuc nazawec: “Motâc ʒizi hehe jaha fohame moc mi raʒinʒepieŋ. Israere Wofuŋ Anutu noni raʒikopacte moczi moc ira mi raʒinʒepieŋ; motâc i irec hâcne hehe jaha fozejec.

³Ŋic fekicne e mocjahazi raʒirâ ŋehuc Wofuŋ nore maio nânâ poroŋ nâocte manacnekicne, eki hae gâŋgâŋnere motâcko fec wahac ezejec.”

⁴Eme ŋic ekizia jowacnume faic mâreŋkopec motâc fowec i fotâcnerâ taha ufuŋte hae ʒoŋao fisipec. Fisirâ honepe mi Wofuŋte huriri qâreŋzi ufuŋ fusucmazejec i! Iŋuc honerâ ʒâŋe mai‐nane mâreŋko hetutuckepo.

⁵Ehame Wofuŋzi ʒiŋuc nazawec: “Ŋicte ɋâric, go manac, Wofuŋ no taha ufuŋ‐nanere mumutâc â sâcmutâc dâŋ gaza mutâc epe hone manac ezemec; erâ taha ufuŋko feniŋte mana‐jarekicne â mi feniŋte aka hejarekicne jaŋe wâc hone wosâc ejarezemec.

⁶Ehuc Israe kikefuŋ qaqatarahec ʒiŋuc jazazemec: Wofuŋ Anutuzi kecʒiŋuc mukac: O Israe kikefuŋ, ŋoŋe eebapa‐ŋeŋic mamakâcne behe‐fârenʒepieŋ.

⁷Ŋoŋe ŋic furune maŋ sahac‐jeŋicko ma mi bakicne jaŋe mana‐jarepie tiri ufuŋ‐naneo ferâ hegâpârembiŋ. Ŋoŋe ŋifec iŋuc ehuc ŋifec nânâ wiac â wokemaŋ erâ soc tahare biŋe râe‐narehuc ʒâʒâfic‐nane hetâcnembiŋ hâcne.

⁸Ŋoŋe tiri ufuŋ‐naneo wiac‐nane tirine forakac i hone soŋaŋ biaŋne mi ehuc ŋic furune jaŋe soŋaŋkeniŋte râec‐jopambiŋ.

⁹“Irec hâcne Wofuŋ Anutu no dâŋ kecʒiŋuc mukopac: Israe ŋic jaŋere ŋondeŋko ŋic furune maŋ sahac‐jeŋicko ma mi bakicnezi juŋgopieŋ jaŋeraonec moczi tiri ufuŋ‐naneo moc mi raʒizejec.

¹⁰Ehame Israe ŋic jaŋe qâsoriehapie Lewiŋic jaŋe no behecnurâ qâsoriehuc jaha nemuɋâŋfâc‐jeŋic kiŋaŋ qajarembiŋte okacne roniŋmu.

¹¹Ehuc tiri ufuŋ‐naneo gie ʒiŋuc hâcne baniŋmu: Taha ufuŋte motâcko ruc bahuc ufuŋ soŋaŋkehuc domaniŋmu, erâ ŋic jaŋere okacne bâzi ririkere qowi qa hezuc ejareniŋmu, ehuc ŋic jaŋerao kiŋaŋ gie baniŋmu.

¹²Jaŋe nemuɋâŋfâc‐jeŋic jaŋere maio ŋic kiŋaŋ qajarehuc Israe ŋic jaŋe sipirickeniŋte doc bacjopambiŋ. Eme no irec hâcne okacne fua‐jareocte mupaŋkepo, Wofuŋ Anutu no iŋuc mukopac.

¹³Jaŋe no maicnurâ taha gie mi banʒepieŋ â wiac bâtirikicne me furu dindiŋ irec heririŋko wâc mi warenʒepieŋ. Aricne, jaŋe wiac mamakâcne ebac embiŋte mimi busâqoczi fai‐jeŋicko fezejec.

¹⁴No ine sifu taha ufuŋte soŋaŋ râec‐jopape maŋnao juhuc kiŋaŋ qaqa gie bafârenʒepieŋ.”

¹⁵Wofuŋ Anutuzi dâŋ ʒiŋuc mukac: “Lewire ŋicfâc taha bapa, Zadokore ɋâricfâc hâcne, jaŋe Israe ŋic qâsoriehuc juhapie tiri ufuŋ‐nane soŋaŋkehuc jumbiŋte maicnuhuc kiŋaŋ qanarenʒepieŋ. Ehuc mai‐naneo fuarâ wokemaŋ â soc râe‐narenʒepieŋ.

¹⁶Jaŋe tiri ufuŋ‐naneo ferâ soŋaŋkehuc kiŋaŋ qanareniŋte alata‐nane maickenʒepieŋ.

¹⁷Jaŋe hae ʒoŋa piticnere motâc fotâcnezo murâ qoruc sawa qanʒepieŋ. Jaŋe motâcko me hae ʒoŋa piticnao gie bahuc ŋaqi qoruc hâroŋne mi rojunʒepieŋ.

¹⁸Qizec‐jeŋicko qoruczi aʒo barâ fozunʒepieŋ; â kike ŋaqi wâc hepie huzejec. Erâ fofoŋa henʒipiŋte ŋaqi wiac‐jeŋic becsahaczi mi basanaŋkenʒepieŋ.

¹⁹Erâ ŋic ŋokac jaŋerao hae ʒoŋa sâkoo huzo murâ gie ŋaqi wiac‐jeŋic hetararâ fic ʒuhucne mutirikicnao râenʒepieŋ, ehuc wiac tirinezi ŋic ŋondeŋko rahuc wâwânâŋhec ezacte ŋaqi wiac omane hepie huzejec.

²⁰Qizec‐jeŋic mi orackenʒepieŋ; â qizec susuc‐jeŋic ɋoɋoru i boc mi ʒorazejec, jaŋe qizec susuc‐jeŋic i akickehuc bâtâcnenʒepieŋ.

²¹Taha bapa moc e hae ʒoŋa piticnao fezo murâ waiŋ opâ moc mi nâzejec.

²²Jaŋe hozec me ŋokac ʒuhuc bâtâc ekicne moc mi rocjopahuc Israe kikefuŋkonec ŋokac ʒeŋoŋ me taha bapa mocte hozec ine sâcne rocjopaniŋmu.

²³“Ehuc ŋicfâc‐nane jaŋe wiac tirine â omane irec fuŋne mana taraniŋte qazu‐jarenʒepieŋ â wiac biaŋne â sâqocne mana râwiŋ‐jofaniŋte jaza jowatuc enʒepieŋ.

²⁴Dâŋgie fuame mumutara ŋic erâ nore mumutiŋ dâŋte sâcko dâŋ mutaranʒepieŋ. Â hombaŋ dameŋ‐nane mukicne irec sâcmutâc â dâŋsanaŋ i mana rereŋ ehuc sabata‐nane soŋaŋkepie tiri fozejec.

²⁵Jaŋe qâŋɋâŋficko rarâ juju‐jeŋic mi hegâparenʒepieŋ; mâc neŋgoc mamac me naru motec me hahac ɋa me seŋfâc‐jeŋic mesawane jaŋere erâ sawa ezo murâ enʒepieŋ.

²⁶Iŋuc erâ maŋ sahac‐jeŋic ʒure ɋaɋackerâ ʒoaŋ gie bapa 7 mâc jufehuc ɋaɋacke‐hâmonʒepieŋ.

²⁷Erâ taha gie baniŋte hae ʒoŋa piticnao mocwâc feniŋmu ʒoaŋ ira qanaŋ jaŋe jaŋacnere manasuhuc sâqocne tâtâmire taha râenʒepieŋ; Wofuŋ Anutu nore dâŋ iŋuc.

²⁸“Noni hâcne merâfâc‐jeŋic ekopacte jaŋe merâfâc wiac omane moc mi bajunʒepieŋ, noni jufu sesuc‐jeŋic ekopacte jaŋe Israe mâreŋko jufu sesuc moc mi jarezemec.

²⁹Jaŋe taha bâzi â sâqocne tâtâmire taha â kiŋ tatarare taha irec wiac nâ bac enʒepieŋ, ehame Israe ŋondeŋko wiac moc Wofuŋ nore biŋe qahuc murâriekicne i jaŋere biŋe ezejec.

³⁰Gie ɋârionec nânâ wiac nânâsune biaŋne gâcne erâ taha wiac‐ŋeŋic gâcne sasawa Wofuŋ nore biŋe râeeŋgopieŋ i taha bapa jaŋere biŋe jaha; ehame gie ɋârionec nânâzi poroŋ baniŋmu irec nâfocne i taha bapa jaŋere biŋe râepie fic hae‐ŋeŋicko jambuŋ mâriri fuazejec.

³¹Taha bapa jaŋe wipe qowi jaŋe jaŋac hâmombiŋ me qa sipiric ejarekicne i moc mi nâhuŋgaŋkenʒepieŋ.”