Eʒekie 46

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

¹Wofuŋzi dâŋ kecʒiŋuc mukac: “Hae ʒoŋa piticnere motâc ʒoaŋ wewefunaopec fokac i ʒoaŋ gie bapa 6 motâc hehe fozejec, sabata â mosa hombaŋko ira ine motâc aaŋ fozejec.

²Eme ŋic fekicne e hae ʒoŋa kâcɋenaonec fe fisirâ hae gâŋgâŋne fotâcnerâ motâc wâtuŋko fisirâ domazejec. Erâ taha bapa jaŋe qowi bâzi‐ticne â wama bâzi‐ticne rikehapie e jahacne motâcfuŋko domahuc Anutu numu wâwâsic ecnezejec. Iŋuc erâ wahame motâczi aaŋ jaha foha hae ŋafezejec.

³Ŋic ŋokac omane jaŋe sabata â mosa hombaŋko motâc fuŋnao ijaha Wofuŋ mai ecnenʒepieŋ.

⁴Ŋic fekicne e sabata hombaŋko Wofuŋte biŋe qowi bâzi kecʒiŋuc rikezejec: Lama motecne biaŋne 6 erâ lama ŋicne biaŋne moc.

⁵Ehame lama ŋicnere biŋe padi oto moc râehuc lama gâcne jaŋere biŋe focneocmu sâc râezejec. Erâ oto sâc wokemaŋ opâ fifia râqâc moc irec sâc râezejec wâc.

⁶Mosa hombaŋko ine bulimakao motecnezi ŋicne biaŋne â lama motecne 6 erâ lama ŋicne moc biaŋne jaha tahare biŋe râezejec.

⁷Ehuc bulimakao ŋicnere biŋe padi oto moc â lama ŋicnere biŋe oto moc erâ lama gâcne jaŋere biŋe focneocmu sâc taha bâzi râezejec, erâ oto sâc wokemaŋ opâ mâmâc ʒuhuckezejec.

⁸Ŋic fekicne e raʒizo murâ motâcte hae gâŋgâŋko raʒizejec, erâ wâc hata ijaha wahazejec.

⁹“Ŋic ŋokac omane jaŋe hombaŋ mukicnao Wofuŋ mai ecneniŋte gâcne jaŋe motâc faic mâreŋkopec fokac ira raʒirâ wahaniŋte motâc juwic mâreŋkopec fokac ira wahanʒepieŋ, â gâcne jaŋe ine motâc mâreŋ juwickopec fokac ira raʒirâ wahaniŋte motâc faic mâreŋkopec ira wahanʒepieŋ. Moczi moc motâc raʒiocmu ijaha mi risie wahazejec, aricne, e mâc fofotâc rarâ huzejec.

¹⁰Jaŋe raʒi raʒihapie ŋic fekicne e mâmâc raʒizejec, me waha wahahapie eki wâc wahazejec.

¹¹“Hombaŋko me dameŋ bakicnao bulimakao motecnezi ŋicne ere biŋe padi oto moc taha bâzi râenʒepieŋ, â lama ŋicnere biŋe oto moc, erâ lama gâcne jaŋere biŋe fojareocmu sâc râenʒepieŋ. Erâ oto sâc wokemaŋ opâ gâcne mâmâc ʒuhuckenʒepieŋ.

¹²Ŋic fekicne e Wofuŋ buafec faio taha bacneocte qowi bâzi me wama bâzi râehame motâc ʒoaŋ wewefunaopec fokac i rocnezo. Ehame e sabata hombaŋko eekac irec sâc jaha ehuc qowi bâzi me wama bâzi‐ticne râezejec. Râe tararâ huha motâc kibâzickezejec.

¹³“Ŋic fekicne e furic sâc lama biaŋne moc jara‐ticne wâŋ ekicne Wofuŋte biŋe bâzi rikezejec.

¹⁴Ehuc furic sâc taha padi nâfocne moc taha bâzire biŋe mâmâc râezejec, erâ wokemaŋ gâcne padihec bâsifuckerâ Wofuŋ taha bâzi râecnezejec. Qowi bâzi ririkere mumutâc fofo sanaŋ iŋuc hâcne fokac.

¹⁵Ŋoŋe iŋuc hâcne ehuc furic sâc lama â taha bâzi erâ wokemaŋ qowi bâzi ririkere biŋe râehuc junʒepieŋ.”

¹⁶Wofuŋ Anutuzi dâŋ kecʒiŋuc mukac: “Ŋic fekicne e jahacne biŋe mâreŋ focnekac irec dâkâne moc ŋokâfâcne jareocmuo ine jaŋere biŋe ezejec. Izi hâcne mamac mâreŋ‐jeŋic ekac.

¹⁷Mâreŋ focnekac irec dâkâne moc kiŋaŋ qaqa‐ticne râcneocmuo eki kiŋaŋ qaqa dameŋ focneocmu sâc sâcne bajuocmu; dameŋ i tarame ine mâreŋ i ŋic fekicne erao risieocmu. Motec fuŋfuŋfâc‐ticne jaŋe sasawa mâreŋ tahac‐jopakicne i rauckerâ jusanaŋkeniŋmu.

¹⁸Ŋic fekicne e ŋic jaŋere mâreŋ moc mi jowac rorâ bajuzejec; e jahacne biŋe mâreŋ focnekac irec dâkâne ŋifec ŋokâfâcne jarezejec. Iŋuc eme ŋicfâc‐nane jaŋe mâreŋ tâmiric moc mi junʒepieŋ.”

¹⁹Eme sâc bapa ŋic eki jowacnume motâc fefe moc motâc sâko ŋifecnao fowec i fotâcnerâ taha bapa jaŋere fic maŋne faic mâreŋkopec forawec ira fisipec; eme ira domahuc mi ʒoaŋ huhunaopec fic maŋne moc honezepac i!

²⁰Ehame ʒiŋuc nazawec: “Fic maŋne kecira hâcne taha bapa jaŋe kiŋ tatarare â sâqocne tâtâmirere bâzi, erâ taha bâzi rikeniŋte mukicne. Bâzire wiac i hae ʒoŋa kâcɋenao bahupie wiac tirinezi ŋic ŋokac jaŋerao wâwânâŋhec ezacte iŋuc hâcne eniŋte mukicne.”

²¹Eme irecnec jowacnume hae ʒoŋa kâcɋene tuturuŋne 4 ira fisipec. Eme tuturuŋne 4 i jaŋere maŋnao hae ʒoŋa piticne wâc forambiŋ.

²²Hae ʒoŋa 4 forambiŋ jaŋere sâc ine kecʒiŋuc: Ʒoricne‐jeŋic i kubi 40 â bembeŋne‐jeŋic i kubi 30. Hae ʒoŋa 4 i jaŋe sâc mocjaha sasawa.

²³Erâ hae ʒoŋa 4 i jaŋe qânâsaczi rârec‐jopahuc fowec. Sac fuŋnao ine rârec rârec ʒafe qafârekicne.

²⁴Eme ŋic eki ʒiŋuc nazawec: “Ʒi ʒegoc bapa toma, eme taha ufuŋko kiŋaŋ gie baniŋmu jaŋe ira hâcne ŋic ŋokac jaŋere qowi bâzi rikehuc junʒepieŋ.”