1Jara namba 12 irec mosa 12 jaha â irec ʒoaŋ gie bapa wâŋ ira Wofuŋte dâŋ norao ʒiŋuc fuawec:
2“Ŋicte ɋâric, go Aigita ŋicwofuŋ Farao ere makuc gae moc ʒiŋuc hefuazemec: No ŋicne ŋicne jaŋere ŋondeŋko laioŋ iŋucne jukopac, gahacne iŋuc muekiczi laioŋ mâcne, hâwecko oâ juekac iŋucne juekic. Ehuc hâwec ficne sueekic, â opâ masirickeekic â kikegezi âtetec opâ sohoŋ eekac.
3Irec Wofuŋ Anutuzi ʒiŋuc mukac: No ŋic gurune gurune ejarepe wasaŋ‐nane behe‐garepie wasaŋko jowatec fârecgupe tiŋko wefucmu.
4Eme no mâreŋko behecgupe, tomao fohaŋtec sawa wipe jaŋe gore faio herâ ŋeniŋmu, â mâreŋne mâreŋne irec kâte qowi jaŋe fisirâ nâcguku gapec‐jopaocmu.
5No tiki mâreŋko biucge râe rapemu, â biucge bânâŋkerâ âsu fikac i wâneŋko behepe fusucmaocmu.
6No socge hoŋkepe mâreŋ ruacne‐fâre raku tiki mâreŋko taraocmu, ehame opâ jaŋe soc sasawa efâreniŋmu.
7No bâsirowecguhuc sawa qânikiŋ sâockepe bâpiŋ jaŋe gâpâreniŋmu, ehame mupe karoraczi ʒoaŋ bâsoŋkeocmu, â mosa tatamac‐ticne omaeocmu.
8No sambâŋ tatamac sasawa bârâriehuc dapâc bâfua‐garepemu, ehame gore mâreŋko dapâc qisiric fuarâ foocmu. Wofuŋ Anutu nore dâŋ iŋuc.
9“Eme no ŋicfâcge jaŋehec mâreŋ furune mi mamana‐ŋeŋicko kâpâcwâruo bacŋopa rape ŋicne ŋicne jaŋe ŋoŋere biŋe manarâ busâqoc eniŋmu.
10No jaŋere ʒâŋe faio ʒika‐nane fotariepe ŋic bocjaha jaŋe gore erâ bipic tatara ejarezejec â ŋicwofuŋfâc‐jeŋic jaŋe gore erâ hâwic‐jopazejec. Jaŋe waha guocmu ʒoaŋ ira ru sâc juju‐jeŋicte manasuhuc ɋarac ɋarac qanʒepieŋ.”
11Wofuŋ Anutuzi dâŋ kecʒiŋuc mukac hâcne: “Babe ŋicwofuŋte ʒikazi gore faio fezejec.
12Noni mupe ŋic qac momori â repic qapicne jaŋere ʒikazi ŋic guru sâkofâcge omaec‐jopaocmu. “Jaŋe Aigita mâreŋte ʒâŋe biŋe bawahapie ŋicfâc‐ticne guru sâko sipiricke‐fâreniŋmu.
13No qowifâc‐jeŋic opâ heririŋko jueŋgopieŋ jaŋe bâsirowec‐jopa‐fârepe ŋic mecne qowi mecne opâ âtepie sohoŋ mocwâc mi ezejec.
14Eme no mupe sohoŋ omaeme opâzi ɋaɋackerâ wokemaŋ iŋucne fâre fâsâerâ rahuc foocmu. Wofuŋ Anutu nore dâŋ iŋuc.
15No Aigita mâreŋ ima bape niniŋ siarereŋ fua‐fâreocmu â ŋecjucfâc‐ticne qâhâmoc‐jopa‐fârepe no hâcne Wofuŋ jukopac i mana taraniŋmu.
16Gae ʒizi makuc gae eme henʒepieŋ, ŋicne ŋicne ŋokacfâc‐jeŋic jaŋe hâcne henʒepieŋ; jaŋe Aigita mâreŋ â ŋicfâc‐ticne guru sâko irec erâ maku ehuc gae i henʒepieŋ. Wofuŋ Anutu nore dâŋ iŋuc.”
17Jara namba 12 irec mosa wâŋ â irec ʒoaŋ gie bapa 15 eha Wofuŋte dâŋ norao ʒiŋuc fuawec:
18“Ŋicte ɋâric, go Aigita mâreŋ ŋicfâc‐ticne guru sâko jaŋere erâ ki busâqoc ec, ehuc e jahacne mecne â ŋicne ŋicne ʒâŋe biŋe sâkohec jaŋere ŋokacfâc mecne mâmâc tuŋjopatec ŋic nombâŋko humbiŋ jaŋerao hunʒepieŋ wâc.
19‘Me ŋoŋe ŋic weni jaŋe siric‐jopahuc hawari biaŋ juŋgopieŋ? Aricne, ŋoŋe hujâmbâŋkeniŋ, erâ sahac‐jeŋicko ma mi bakicne jaŋehec foniŋ.’
20Ʒikazi jopa qâhâmoc ejarewec jaŋere ŋondeŋko waha jopazejec, ehame ŋicfâc‐ticne guru sâko jaŋe mâmâc waha jopazejec.
21Ŋic qac momori jaŋe hâmoc haeo juhuc Aigita ŋic â babaficfâc‐jeŋic jaŋere ʒiŋuc muniŋmu: ‘Sahac‐jeŋicko ma mi bakicne â ʒikazi jopa sipiric ejarekicne jaŋe waharâ qiriŋmâc foraŋgopieŋ.’
22“Asiria ŋicwofuŋ â ŋicfâc‐ticne jaŋe ʒikao hâmo sipiric efârerâ ira humbiŋ wâc, ʒâŋeruŋ‐jeŋic ira hâcne forakac.
23Ʒâŋeruŋ‐jeŋic i nombâŋ tuturuŋnao râe rakicnere ira foraŋgopieŋ. Ŋicfâcne jaŋere ʒâŋeruŋzi e jahacne ʒâŋeruŋ râreckehuc forakac hâcne. Asiria ŋic jaŋe mârâc jaha mâreŋko juhuc ʒârâ ʒâpâ bâfuambiŋ, ʒi ine ʒikazi jopa‐fâreme hâmombiŋ.
24“Elam ŋicwofuŋ e ira fokac wâc, ehame ŋicfâc‐ticne guru sâko jaŋere ʒâŋeruŋzi ere ʒâŋeruŋ râreckehuc forakac. Jaŋe ʒikao hâmo‐fârembiŋ, ehuc ŋic ma tâmiric hâmoc haeo hufârembiŋ. Jaŋe mâreŋko juhuc wiac hâhâwicne bâfuambiŋzi hâmokicne jaŋehec mimi busâqoc eŋgopieŋ.
25Ŋicwofuŋ e ŋic gurufâc‐ticne jaŋehec ŋic qâhâmoc‐jopakicne jaŋere ŋondeŋko râec‐jopakicne, ehame jaŋere ʒâŋeruŋzi ere ʒâŋeruŋ râreckehuc forakac. Jaŋe ma tâmiriczi ʒikare biŋe efârembiŋ hâcne. Jaŋe mâreŋko juhuc wiac hâhâwicne bâfuambiŋzi hâmokicne jaŋehec mimi busâqoc eŋgopieŋ. Jaŋe qâhâmoc‐jopakicne jaŋere ŋondeŋko râec‐jopakicne hâcne.
26“Meseke â Tubali erâ ŋicfâc‐jekic guru sâko jaŋe ira mâmâc foŋgopieŋ, ehame ʒâŋeruŋ‐jeŋiczi jaŋere ʒâŋeruŋ râreckehuc forakac. Jaŋe ma tâmiriczi mâreŋko juhuc wiac hâhâwicne bâfuambiŋte ʒikare biŋe efârembiŋ.
27Jaŋe ŋic qac momorihec mârâc jaha juku hâmombiŋ jaŋehec mi foŋgopieŋ. Ŋic qac momorihec jaŋe ʒikare wiac‐jeŋichec hâmorâ hâmoc haeo hupie ʒika‐jeŋiczi roŋgâŋ‐jeŋic eha maro‐jeŋiczi rurufa‐jeŋic ewec. Jaŋe mâreŋko qac momorihec jumbiŋte ŋic jaŋe boc hâwic‐jopa jujec.
28Farao goki ine ŋic qac momorihec jaŋerao mâcne, go ma tâmiric juhuc ʒikao hâmo sipiric ekicne jaŋere ŋondeŋko hurâ fozemec.
29“Edom mâreŋte ŋicwofuŋ â fekicnefâc‐ticne jaŋe ira mâmâc foŋgopieŋ. Jaŋe tâpirihec jumbiŋ, erâ sifu ŋic ʒikare nânâ embiŋ jaŋerao ʒuhuc‐jopakicne. Irec ŋic ma tâmiric jumbiŋ â mârâc jaha nombâŋko humbiŋ jaŋehec hurâ foŋgopieŋ.
30“Faic mâreŋkonec ŋic fekicne â Sidoŋ haere ŋic jaŋe sasawa ira foŋgopieŋ wâc. Jaŋe tâpiri sâkohec juhuc wiac hâhâwicne bâfuambiŋzi sifu qurutuarâ ʒikare nânâ embiŋ jaŋehec sipirickembiŋ. Jaŋe ʒikao hâmombiŋ jaŋehec ma tâmiric foŋgopieŋ, erâ nombâŋko humbiŋ jaŋehec mimi busâqoc bâfuaŋgopieŋ.
31“Iŋuc fua‐jare‐fâreme Faraozi honerâ maŋticne fâre wahaocmu. Farao â ŋicfâc‐ticne jaŋe ʒikare nânâ efârembiŋ. Wofuŋ Anutu nore dâŋ iŋuc.
32Farao e mâreŋko juhuc ʒârâ ʒâpâ bâfuawec, irec e jahacne mecne â ŋicfâc‐ticne guru sâko jaŋe mecne mâmâc ŋic ma tâmiric ʒikao hâmo sipiric ekicne jaŋere ŋondeŋko hurâ fofârenʒepieŋ. Wofuŋ Anutu nore dâŋ iŋuc.”
