1“O ŋicte ɋâric, go qânâ dadapic moc rorâ maŋfuŋgao râerâ fainao heutuckehuc Jerusalem haere hawari bazemec.
2Ehuc hae rârec rârec somâ bapare ʒae â sac wiac, mâreŋ toŋne erâ râsi jaŋere toma â sac ââke mârâŋ tuŋ irec hawari mâmâc bazemec.
3Iŋuc erâ aeŋ dadapic moc rorâ go â hae ŋondeŋ‐ŋekicko râetec sac iŋucne erâ ŋezejec. Eme go hae maickehaŋtec somâmaŋko ŋezejec. Goki hâcne somâckerâ juzemec, eme izi hâcne Israe kikefuŋ wiac fua‐jareocmu irec ma ezejec.
4“Go qanaopec waha fohaŋtec Israe ŋic jaŋere sâqocne i gore faio râepe feocmu, ehame ʒoaŋ gie bapa focmu irec sâc sâqocne‐jeŋic âsickecmu hâcne.
5Go ʒoaŋ gie bapa 190 Israe kikefuŋ jaŋere sâqocne âsickehuc jucmurâ mugarekopac, jaŋe jara 190 bâbâtiŋko juniŋmu irec sâsâcne.
6Eme dameŋ irec faicnao fâreopec waha fohuc Juda kikefuŋ jaŋere sâqocne ʒoaŋ gie bapa 40 irec sâcko âsickehuc juzemec. Ʒoaŋ gie bapa 40 i jara 40 irec sâsâcne.
7Eme go Jerusalem hae somâ bakicne i maickerâ mege ŋaqi tâmiric biuctac sicnehuc haere findaŋdâŋ muzemec.
8Manakic, no muczi basanaŋgupe ŋifec me ŋifec sâcne mi fotikiehuc juhaŋtec somâ bapa dameŋge tarazejec.
9“Go padi jacgoŋ, gai uucne, basac erâ kasaŋ hândâŋ rorâ kuʒi mocjahao bâsifuckerâ nânâ poroŋ bazemec. Eme ʒoaŋ gie bapa 190 fohuc jucmu sâc nânâ i hâcne nâhuc juzemec.
10Erâ go kosa mâcne, sigelizi aafecne mufua‐gareocmu i ŋafe furec irec sâc bâtâc barâ nâzemec.
11Â opâ i wâc iŋuc jaha ʒoaŋte sâc bâtâc barâ nâhuc juzemec. Ʒoaŋ mocte biŋe kiruŋ moc â ʒoaŋ mocte biŋe kiruŋ moc, iŋuczi iŋuc.
12Go nânâ i ŋic jaŋe honehapie ŋichozi rikerâ nâhuc juzemec.”
13Erâ Wofuŋzi ʒuhuckerâ muwec: “Israe ŋic jaŋe ŋic gurune gurune jaŋere ŋondeŋko bâtâtiec‐jopape nânâ poroŋ wâwânâŋnehec i hâcne nâhuc junʒepieŋ.”
14Iŋuc nazame kecʒiŋuc mupo: “O Wofuŋ Anutu, manakic, no wiac gâgâpâcne iŋucne moc mi nâhuc jupo, erâ ɋieonecteaŋ juwefuhuc wiac mâc hâmokicne me kisuc qâsuckekicne me gârecke ʒaŋ ekicne i wâc iŋuc jaha moc mi nâjupac.”
15Iŋuc mupe eki ʒiŋuc nazawec: “Manakic, no mana‐garepe ŋichozi mâcne, bulimakao hozi nânâ poroŋge rikezemec.”
16Erâ ʒuhuckerâ ʒiŋuc nazawec: “Ŋicte ɋâric, go manac: No mupe Jerusalem haeonec jaŋe nânâ afecne sawa fojarezejec, irec jaŋe hâwic‐jopame nânâ sigelizi mufua‐jareme sâc sawa nâniŋmu â opâ mutâcne‐jarekicne irec sâc nâhuc bipic‐jeŋic taraocmu.
17Jaŋe nânâ opâ‐jeŋic omaezo eha nânâre hâmohuc hohonec erâ bipic tatara ejareocmu, jaŋe hehesic‐jeŋicte erâ sipirickeniŋmu hâcne.
