1“O ŋicte ɋâric, go Gogo râsi ecnerâ findaŋdâŋ‐ticne muhuc ʒiŋuc âzâcnezemec: Wofuŋ Anutuzi kecʒiŋuc mukac: O Gogo, Meseke â Tubali hae mâreŋ jahere micne sâko go manac, no râsi egarekopac.
2Ehuc bârisiecgurâ ʒoɋac egarepe hae mâreŋge faicpec beherâ Israe tiki mâreŋko ra fisizemec.
3Ira fisihaŋtec meqanagaonec tepe neŋgocge qatarape wahaocmu â mefâregaonec tepe motecne iŋuc jaha qatarape wahaocmu.
4Ehame go mecne â momorifâcge jaŋe mecne, erâ ŋicguru gohec juŋgopieŋ jaŋe Israe tiki mâreŋko hâmo‐fâreniŋmu. Hâmo‐fârepie qâŋɋâŋfâc‐ŋeŋic wipe fuŋne fuŋne â kâte qowi behe‐jarepe jaŋere nânâ enʒepieŋ.
5No mukopacte tomao hâmozemec, Wofuŋ Anutu nore dâŋ iŋuc.
6No mupe Magogo mâreŋko â hâwec heririŋko ŋic juhâmoeŋgopieŋ jaŋerao ʒoc fuarâ ʒâseŋ‐jopazejec. Iŋuc fuame, no hâcne Wofuŋ jukopac i mana taraniŋmu.
7“No tiri ʒâŋe‐nane Israe ŋicfâc‐nane mutaniŋke‐jarepe mana‐fârenʒepieŋ. Ehame ŋicne ŋicne jaŋe tiri ʒâŋe‐nane mocwâc mi musoriŋkehuc, no hâcne Israe guruo Tiri Wofuŋ jukopac i mana taranʒepieŋ.
8Manakic, okac dameŋ i fârinehec eocte maickekac. No dameŋte dâŋ mupo dameŋ i hâcne maickeocmu. Wofuŋ Anutu nore dâŋ iŋuc.
9“Iŋuc fuame Israe ŋic haene haene juraŋgopieŋ jaŋe faharerâ ʒikare wiac ro qâzuc erâ ʒoc ruqepie ʒaocmu. Wiac kecʒiŋuc: Maro kâcɋene â piticne, tepe neŋgocne â motecne, erâ damu â qândiŋ wiac. Jaŋe wiac i hâcne rikehuc juhapie jara 7 taraocmu.
10Ʒikare wiaczi ʒocjeŋic eha gieonec me kâteonec ʒoc mocwâc mi roniŋmu. Jaŋe wiac‐jeŋic sipirickembiŋ ŋic i jaŋere wiac wâc sipirickeniŋmu, â wiac‐jeŋic fiuckembiŋ ŋic i jaŋere wiac wâc fiuckeniŋmu. Wofuŋ Anutu nore dâŋ iŋuc.
11“Eme no dameŋ ira Israe mâreŋko Gogo e ŋic duduc‐jopa mâreŋ moc râcnepemu. Mâreŋ i wâneŋ, erâ Hâwec Hâmocne ʒoaŋ wewefu‐ticnao ŋiczi sicne fotâc eeŋgopieŋ irapec fokac. Ira hâcne Gogo â ŋicfâc‐ticne guru sâko ducjopahuc ŋic ira sicne fotâc eeŋgopieŋ jaŋe aka hejareniŋmu. Ehuc wâneŋ irec ʒâŋe Hamoŋ‐Gogo muniŋmu.
12Israe kikefuŋ jaŋe mâreŋ‐jeŋic mocwâc biaŋkeocte râsifâc‐jeŋic ducjopahuc juhapie mosa 7 taraocmu.
13Mâreŋ ira ŋic ŋokac jaŋe babafic ehuc ducjopaniŋmu, ehame no tâpiri‐nanere fuŋne bataniŋkepemu, ʒoaŋ irec manapie boc feocmu. Wofuŋ Anutu nore dâŋ iŋuc.
14Jaŋe ŋic bâwosâec‐jopapie ʒuʒuhuc jaha mâreŋ fotâcnehuc qâŋɋâŋ bâfuac‐jopa raniŋmu sâc ducjopapie mâreŋ‐jeŋic biaŋkeocmu. Mosa 7 tarame wiac iŋuc hâcne eniŋmu.
15Jaŋe mâreŋ fotâcnehuc ŋicsiec bâfuarâ heririŋnao ma wirenʒepieŋ, eme duduc‐jopa ŋic jaŋe fisi honerâ Hamoŋ‐Gogo wâneŋko ducjopanʒepieŋ.
16Iŋuc fuame mâreŋ‐jeŋic bâpiaŋke‐hâmoniŋmu. (Mâreŋ ira hae moc ʒâŋene Hamona i wâc ŋeocmu.)
17“O ŋicte ɋâric, Wofuŋ Anutu no gore ʒiŋuc mukopac: Go wipe fuŋne fuŋne â kâte qowi sasawa ʒiŋuc jazazemec: Ŋoŋe mâreŋne mâreŋne irecnec tumaŋnerâ Israe tikio tiwâ bâzi sâko bâmocke‐ŋarepe soc â biuc i nânʒepieŋ.
18Ŋoŋe ŋic tâpirihec jaŋere biuc erâ mâreŋte ŋic fekicne jaŋere soc i nânʒepieŋ. Jaŋe hâcne lama bulimakaofâc‐ŋeŋic wokemaŋ sâkohec eŋgopieŋ.
19Tiwâ bâzi bâmocke ŋarehape ŋoŋe wokemaŋ nâku gape susuc‐ŋopazejec â soc nâku maŋŋeŋic sifuckezejec.
20Ŋoŋe nore tiwâ bâzio fisirâ becâsic â becâsicko rara ŋic erâ ŋic tâpirihec â momori ŋic fuŋne fuŋne nâcjopaku gapec‐ŋopazejec hâcne. Wofuŋ Anutu nore dâŋ iŋuc.
21“No ŋicne ŋicne jaŋere ŋondeŋko huriri qâreŋ‐nanere fuŋne bataniŋkepemu, ehame dâŋjeŋic mutara‐jarehuc wiac ŋemâcne mupe fai‐jeŋicko fewec i hone taranʒepieŋ.
22Eme Israe kikefuŋ jaŋe dameŋ ira fuŋkerâ, no hâcne Wofuŋ Anutu‐jeŋic jukopac i mana taranʒepieŋ.
23Â ŋicne ŋicne jaŋe ʒiŋuc mana taracnunʒepieŋ: Israe kikefuŋ jaŋe Wofuŋ‐jeŋic râpeckehuc qaqatara bâfuambiŋte kâpâcwâru ficko rambiŋ, e ʒâŋe mai‐ticne bâsoŋke‐jarehuc râsifâc‐jeŋic jaŋere meo râec‐jopame ʒikare biŋe efârembiŋ.
24E hehesic‐jeŋic â qaqatara‐jeŋicte sâcko okacne bazu‐jarehuc ʒâŋe mai‐ticne sâockewec hâcne.”
25Wofuŋ Anutu e irec hâcne kecʒiŋuc mukac: “No Jakobo kikefuŋ ʒârâ ʒâpâ faio juju‐jeŋic i mupe omaezejec, â Israe kikefuŋ jaŋe ine busâqo mana‐jare‐fârezepac, no tiri ʒâŋe‐nane fosanaŋkeocte ʒoɋac epemu.
26Jaŋe mâreŋ‐jeŋicko risierâ râsi jaŋere manabâc mi ehuc wama faio juhâc qâhâmoniŋmu dameŋ ira mimi busâqochec juju â qaqatara‐jeŋic sasawa irec nikec‐jopazejec.
27No ŋicne ŋicne jaŋere ŋondeŋkonec â râsifâc‐jeŋic jaŋere mâreŋkonec jowac‐jopa waharâ jaŋerao tiri juju‐nanere fuŋne bataniŋkepe qâpuc guru bocjahazi honenʒepieŋ.
28Iŋuc ejarepe, no hâcne Wofuŋ Anutu‐jeŋic jukopac i mana taranʒepieŋ. Noni hâcne ŋicne ŋicne jaŋerao bâtâtiec‐jopapo, erâ nonizia mocwâc rocjoparâ mâreŋ‐jeŋicko râec‐jopakopac. No mocwâc behec‐jopape ŋicne ŋicne jaŋere ŋondeŋko ʒuhuckerâ mi juniŋmu.
29No Mâro‐nane Israe kikefuŋ jaŋe râe‐jarepo, irec ʒâŋe mai‐nane mocwâc mi bâsoŋke‐jarepemu. Wofuŋ Anutu nore dâŋ iŋuc.”
