1Wofuŋte dâŋ norao kecʒiŋuc fuawec:
2“Ŋicte ɋâric, go Amoŋŋic maic‐jopahuc okacdâŋ‐jeŋic muzemec.
3Ehuc ʒiŋuc jazazemec: Ŋoŋe Wofuŋ Anuture dâŋ mananiŋ. Wofuŋ Anutuzi dâŋ kecʒiŋuc mukac: ‘Râsi jaŋe tiri ufuŋ‐nane hegâpârembiŋ â Israeŋic mâreŋ‐jeŋic imackembiŋ, erâ Juda kikefuŋ kâpâcwâruo bacjopa rambiŋ. Eme ŋoŋe wiac i honerâ ʒiŋuc mumbiŋ: “Sowine!”
4Ŋoŋe iŋuc mumbiŋte no ʒoaŋ wewefunaonec ŋicguru jaŋere meo râec‐ŋopape rauc‐ŋopanʒepieŋ, ehuc jaŋe ware fisirâ ŋondeŋ‐ŋeŋicko ŋec juc ehuc nânâ opâ wiac‐ŋeŋic nâhuc junʒepieŋ.
5No Raba hae imackepe kamele jaŋere toma ezejec, â Amoŋŋic jaŋere hae gâcne ŋerakac i lama bulimakaofâc‐jeŋic jaŋere sac sapa ezejec. Iŋuc fuame ŋoŋe, no hâcne Wofuŋ jukopac i mana taranʒepieŋ.’
6Ŋoŋe me qahuc kike‐ŋeŋic âteickerâ Israe mâreŋ ʒâic fâro‐ticne honerâ mu ruruc ecnembiŋte
7no menane sicnehuc rocŋoparâ ŋicne ŋicne jaŋere meo râec‐ŋopapemu. Eme ŋicne ŋicne jaŋere ŋondeŋkonec â mâreŋ sâc irecnec wâc bârâriec‐ŋoparâ bâsirowec‐ŋopapemu. Iŋuc eŋarepe ŋoŋe, no hâcne Wofuŋ jukopac i mana taraniŋmu.”
8Wofuŋ Anutuzi dâŋ kecʒiŋuc mukac: “Moabi ŋic jaŋe ʒiŋuc muŋgopieŋ: Manaŋgopieŋ, Judaŋic jaŋe mâreŋ sâc ŋicguru gâcne jaŋere sâc jaha juŋgopieŋ.
9Iŋuc muŋgopieŋte no Moabi tiki mâreŋte eri qaraweŋ hae jahec â moc kecʒiŋuc jaŋe hâcne bârâriec‐jopapemu: Bete‐Jesimo, Baali‐Meoŋ erâ Kiriataim. Iŋuc epe Moabi mâreŋ i rambaŋ foocmu.
10Ehame no Moabi mâreŋ â Amoŋŋic jaŋere mâreŋ i mâmâc ʒoaŋ wewefunaonec ŋic qikiŋne‐jarepe ro rauc enʒepieŋ, eme ŋicne ŋicne jaŋe mocwâc mi manasuc‐jopaniŋmu.
11Eme no Moabi ŋic okacne bazu‐jarepe jaŋe no hâcne Wofuŋ jukopac i mana taranʒepieŋ.”
12Wofuŋ Anutuzi dâŋ kecʒiŋuc mukac: “Edomŋic jaŋe Juda kikefuŋ jaŋerao okac babazu gie bahuc kiŋsâko hurembiŋ.
13Irec no Edom mâreŋ râsi ecnehuc ŋic mecne qowi mecne mâmâc bâsirowec‐jopa‐fârepe mâreŋ i tuhutac fuarâ foocmu. Jaŋe Temaŋ haeo fuŋkerâ ʒikare biŋe erakupie Dedaŋ haeo tarazejec.
14No Israe ŋicfâc‐nane ejarepe kimbeŋ aaric‐nane fuawec irec sâcko Edomŋic jaŋerao okac babazu gie banʒepieŋ. Eme jaŋe okac babazu gie‐nanere fuŋne mananʒepieŋ. Wofuŋ Anutu nore dâŋ iŋuc.”
15Wofuŋ Anutuzi dâŋ kecʒiŋuc mukac: “Filisa ŋic jaŋe ŋicfâc‐nane râsi sanaŋ â mu âke sisic ejarehuc sipiric‐jopambiŋte okac babazu gie bambiŋ.
16Irec Wofuŋ Anutu no kecʒiŋuc mukopac: Manaŋgopieŋ, no Filisa ŋic jaŋe râsi ejarepemu, ehuc Kereti ŋic mecne â hâwecŋic ʒanʒaŋne jaŋe mecne mâmâc bâsirowec‐jopa‐fârepemu.
17No okacne ŋemâcne bazu‐jarehuc kimbeŋ aaric faio bâtiŋ‐jopapemu. Eme bâbâtiŋ‐nanezi fai‐jeŋicko feme jaŋe no hâcne Wofuŋ jukopac i mana taraniŋmu.”
