Text copied!
CopyCompare
Kâte Bible - Eʒekie

Eʒekie 7

Help us?
Click on verse(s) to share them!
1Wofuŋte dâŋ kecʒiŋuc fua‐narewec:
2“O ŋicte ɋâric, Wofuŋ Anutu no Israe mâreŋte dâŋ kecʒiŋuc mukopac: Dameŋge tarakac. Mâreŋge qaŋeŋne jahec â jahec irec dameŋ tarakac hâcne.
3Ʒi dameŋge tarazo eha kimbeŋ‐nanezi ŋecjucfâcge jaŋere faio feocmu, ehame juju‐jeŋicte sâcko dâŋjeŋic mutarahuc eebapa‐jeŋic mamakâcnere okacne bazu‐jarepemu.
4Ehuc no busâqoc mana‐jarerâ moc mi akic‐jopapemu, wiac mamakâcnezi ŋondeŋ‐jeŋicko ʒuhuckerâ foha eebapa‐jeŋicte okacne bazu‐jarepemu hâcne. Iŋuc ejarepe jaŋe, no hâcne Wofuŋ jukopac i mana taraniŋmu.”
5Wofuŋ Anutuzi ʒiŋuc mukac: “Manaŋgopieŋ, sisipiriczi sisipiric ware fisikac.
6Dameŋ tarazo ekac, tarazo ekac hâcne. Manaŋgopieŋ, dameŋ tataranezi maic‐ŋopakac.
7O mâreŋ ʒirec ŋecjucfâc, sisipiriczi bâmbeŋ‐ŋopakac, dameŋ maickekac i ʒeri bubiaŋ dameŋ mâcne, ʒâic busâqoc dameŋ.
8No dameŋ mi ʒoraha kimbeŋ qahuc aaric mana‐ŋarepemu, ehuc juju‐ŋeŋicte sâcko dâŋŋeŋic mutarahuc eebapa‐ŋeŋic mamakâcnere okacne bazu‐ŋare‐fârepemu.
9Erâ no busâqoc mana‐ŋarehuc moc mi akic‐ŋopapemu, wiac mamakâcnezi ŋondeŋ‐ŋeŋicko ʒuhuckerâ foha eebapa‐ŋeŋicte okacne bazu‐ŋarepemu hâcne. Iŋuc eŋarepe ŋoŋe, no hâcne Wofuŋ juhuc imac‐ŋopakopac i mana taraniŋmu.
10“Manaŋgopieŋ, sisipiric dameŋzi biac maic‐ŋopakac hâcne. Juju â eebapa hehesicnezi fua ɋârâŋkeha pepec penaroŋzi sueme sue fua fewec.
11Bâbâʒâiczi soka ŋedâmârec erâ hehesicte fuŋqizecne ewec. Irec moczi moc ʒuhuckerâ mi juocmu, ehame moneŋ mafa‐ŋeŋic me mazuc mâriri‐ŋeŋic i wâc mi foŋareocmu, â ʒâŋe biŋe‐ŋeŋic i wâc iŋuc jaha omaeocmu.
12Dameŋ bembeŋkekac, irec moc e wiac furine baekac e bubiaŋ mi manazejec, â moc e furire erâ wiac râeekaczi busâqoc mi ezejec. Kimbeŋ aaric i mâmâc sâko‐ŋeŋic eocmu hâcne.
13Furire erâ wiac râeekac e dameŋ ʒora juipiehame wiac izi me izi sifu ere biŋe mocwâc mi eocmu. Kimbeŋ aaric‐nanezi fai‐ŋeŋicko fosanaŋkeha ŋoŋe kiŋŋeŋicte erâ juju‐ŋeŋic sâcne mi ŋezickeniŋmu. fai‐jeŋicko fohuc bâmâc‐jopawecte moczi moc ʒikare mi afeckewec.
15Hae râpeo ʒika fuakac â haemaŋko ine huc mimicne â roroczi fuarâ fokac, irec gieo juekaczi ʒikare micko feocmu, â haeo juekaczi roroc â huc mimicnere biŋe eocmu.
16Me wiac izi bâtiric‐jopaocmu jaŋe tikio ferâ juhuc kâec kâec jaŋe opâwâcko nânâ‐jeŋicte maku eeŋgopieŋ irec sâcko kiŋjeŋicte mu mamakuc eniŋmu.
17Mejeŋiczi ɋaŋaha dieŋ‐jeŋiczi jâjâwâckeocmu.
18Jaŋe târuzi mateŋ barâ qonaŋkeeŋgopieŋ, ehuc hâwic‐jopame fâfâre sâqoreniŋmu, jaŋe mimi busâqoczi fai‐jeŋicko feha utu pârâc fua‐jare‐fâreocmu.
19Jaŋe siliwa‐jeŋic hae ʒoŋao behepie foocmu â goljeŋicte manapie mamakâcne eocmu. Wofuŋte okac dameŋko siliwa â goljeŋiczi sâcne mi ŋezic‐jopaocmu. Wiac izi sâcne mi gapec‐jopaocmu â hobu‐jeŋic sâcne mi fusucmaocmu, jaŋe i hâcne bajuhuc kiŋ hurembiŋ.

20Eri wiac‐jeŋic gol â siliwazi bakicne i bajuhuc sahac fefe boc embiŋ, ehuc wiac izi hâcne nemuɋâŋ mamakâcne â qâpuc wiac repicne gâcne ba akic embiŋ, eme no irec mupe wiac wâwânâŋnehec eocmu.
21Ehame ŋic furune â sindaŋne mana‐jarepe ro rauc epie mateŋ‐jeŋic eha bajupie wâwânâŋhec ezejec.
22Jaŋe tiri ufuŋ‐nane wâwânâŋ ecnembiŋte râpec‐jopapemu. Eme ŋic sindaŋne jaŋe raʒirâ wiac qacne gâpâcne ecnehuc
23imackepie niniŋ siarereŋ fuarâ fozejec. “Mâreŋ ira soc bocjaha hoŋkeeŋgopieŋ â haeo ŋic boc bâʒâic‐jopaeŋgopieŋ.
24Eme no irec ŋicguru repic qapicne jaŋe ejarepe fic wiac‐jeŋic ro rauc enʒepieŋ; no tâpiri sâko‐jeŋic bawahape tiri ufuŋ wiac‐jeŋic wâwânâŋnehec ezejec.
25Eme hâhâwic fua‐jareme wama basaniŋmu.
26Sisipiriczi sisipiric â biŋe bâroŋzi biŋe bâroŋ fisiocmu, ehame porofetezi findaŋdâŋ muocte âzâcne‐bipieniŋmu, erâ taha bapa jaŋe sâcmutâc dâŋte fuŋne mocwâc mi mana taraniŋmu â soŋaŋ micne jaŋere maŋɋârâŋzi wâc omaeocmu.
27Ŋicwofuŋzi maku eocmu â ŋic fekicne jaŋe hâhâwic sâko bâfuaniŋmu, erâ ŋic omane jaŋe bipic tatara ejareocmu. No eebapa‐jeŋicte sâcko wiac ejarepemu, ehuc jaŋacne sâcmutâc dâŋte sâcko dâŋjeŋic mutara‐jarepemu. Eme jaŋe, no hâcne Wofuŋ jukopac i mana taraniŋmu.”