1Wofuŋte dâŋ norao ʒuhuckerâ ʒiŋuc fuawec:
2“Ŋicte ɋâric, findaŋdâŋ muhuc ʒiŋuc jazazemec: Wofuŋ Anutuzi dâŋ kecʒiŋuc mukac: “Ŋoŋe ki owa eniŋ: ‘Jei, dameŋ hâhâwicne fuakac!’ Dameŋ moc maickekac,
3Wofuŋte dameŋ hâcne maickekac, dameŋ i dameŋ sâqocne, erâ ŋicne ŋicne jaŋere sisipiric dameŋ.
4Ʒikazi Aigita ŋic jaŋere faio feme, qâhâmoc‐jopakicnefâc‐ticne jaŋe mâreŋko foraniŋmu â moneŋ mafa wiac‐ticne bawiseniŋmu, erâ ficsanaŋ wiac‐ticne heroc qâropieniŋmu, eme Etiopia ŋic jaŋe honerâ bipic tatara ejareocmu.
5“Ehame Etiopia â Puti â Ludi, â Arabia â Libia mâreŋkonec ŋic jaŋe mecne, erâ Aigita ŋic jaŋehec ʒâʒâfic erâ jumbiŋ ŋic i jaŋe mecne mâmâc ʒikare biŋe efâreniŋmu.”
6Wofuŋzi dâŋ kecʒiŋuc mukac: “Aigita mâreŋ dopeckeeŋgopieŋ jaŋe waha jopazejec, ehame tâpiri‐ticne fekicne i omaezejec. Migidoli fuŋkerâ raku Siene ira mickekac mâreŋ ŋondeŋ irec ŋic jaŋe ʒikare biŋe efârenʒepieŋ. Wofuŋ nore dâŋ iŋuc.
7Eme Aigita mâreŋ i mâreŋ gâcne niniŋ siarereŋ foraŋgopieŋ jaŋere ŋondeŋko niniŋ siarereŋ jaha fuarâ fozejec, â haefâc‐ticne jaŋe hae gâcne ima bacjopakicne jaŋere ŋondeŋko sesuctac fuarâ ŋeranʒepieŋ.
8Eme no Aigita mâreŋ ʒoc turuŋkepe ʒame, dodopecfâc‐ticne jaŋe sipirickepie, mâreŋ rune jaŋe, no hâcne Wofuŋ jukopac i mana taranʒepieŋ.
9“Dameŋ ira kiŋaŋŋicfâc‐nane jaŋe wokeo raku Etiopia ŋic manabâc tâmiric juŋgopieŋ jaŋe ututuŋ jaha fisi‐jareniŋmu; ehame sipirickepie Aigita ŋic jaŋe biŋe‐jeŋic manarâ mâretec hâwic‐jopaocmu. Manaŋgopieŋ, sisipiric i fua‐jâmbâŋkeocmu hâcne!”
10Wofuŋ Anutuzi dâŋ kecʒiŋuc mukac: “No Babe ŋicwofuŋ Nebukaneza ecnepe Aigita ŋic jaŋere moneŋ mafa jowac rome omaezejec.
11E â ŋicfâc‐ticne guru repic qapicne jâmbâŋ, jaŋe mâreŋ imackeniŋte fisiniŋmu; ehuc ʒikazi mâreŋ â ŋic imac‐jopapie qâŋɋâŋ jaŋe mâreŋ sâcke‐fârerâ foraniŋmu.
12Eme no mupe Nilu opâ ʒickeme mâreŋ i ŋic hehesicne jaŋere meo râepemu, erâ ŋic furune jaŋe mana‐jarepe mâreŋ â ira wiac sasawa forakac i ima bacjopa‐fâreniŋmu. No Wofuŋzi hâcne mukopac.”
13Wofuŋ Anutuzi dâŋ kecʒiŋuc mukac: “No Memfisi haeo nemuɋâŋ â ɋâŋ qâqâtâc wiac i sipiric‐jopape omaeniŋmu. Aigita mâreŋko ŋic fekicne mocwâc mi junʒepieŋ, ehame mâreŋ rune jaŋe hâhâwic hejarepemu.
14No Patarosi mâreŋ imackepe niniŋ siarereŋ fuarâ fozejec, â Zoaŋ hae i ʒoc turuŋkepe ʒazejec; ehame Tebesi hae okacne bazucnepemu.
15Erâ Aigita jaŋere fic hae sanaŋ, ʒâŋene Pelusium, i imackehuc Tebesi ŋic guru sâko jaŋe bâsirowec‐jopapemu.
16No Aigita mâreŋ ʒoc turuŋkepe ʒaha Pelusiumzi ɋiɋiteckezejec; Tebesi hae ima bahuc sac wiac‐ticne hetâc qâtâtieniŋmu.
17Oŋ â Pibeseti haeonec ŋic socɋâri jaŋe ʒikare biŋe ehapie, ŋokac jaŋe kâpâcwâru ficko rafâreniŋmu.
18No Tapanesi haeo Aigita ŋicwofuŋte gunu bazupe, ira dapâc sâko fuame tâpiri‐ticne omaeocmu; hae i dudubizi sâockeha narufâc‐ticne jaŋe kâpâcwâru ficko rafâreniŋmu.
19No iŋuc ejarehuc Aigita mâreŋ okacne bazucnepemu hâcne. Eme jaŋe, no hâcne Wofuŋ jukopac i mana taranʒepieŋ.”
20Jara namba 11 irec mosa wâŋ â irec ʒoaŋ gie bapa 7 eha Wofuŋte dâŋ norao ʒiŋuc fuawec:
21“Ŋicte ɋâric, manakic, no Aigita ŋicwofuŋ Farao meombâŋ‐ticne qazupo, eme moczi he foŋ mi ecnehame mocwâc biaŋkerâ ʒika qaqare sâc mi ewec.
22Irec Wofuŋ Anutu no ʒiŋuc mukopac: Manakic, no Aigita ŋicwofuŋ e râsi ecnehuc meticne moc sanaŋne â moc herickekicne i mâmâc jaha qazuc‐jofape ʒika beheocmu.
23Â Aigita ŋic jaŋe bâtâtiec‐jopape mâreŋ sâc ŋicne ŋicne jaŋere ŋondeŋko siŋsaŋ qarâ juniŋmu.
24No Babe ŋicwofuŋ tâpiri râecnehuc ʒika‐nane meticnao râepemu; Farao e ine mejahec‐ticne qazuc‐jofape Babe ŋicwofuŋte maio ŋic ʒâpâ jopakicne jaŋe iŋucne kio huse ezejec.
25No Babe ŋicwofuŋ mejahec‐ticne basanaŋkehape Farao mejahec‐ticne ɋaŋanicmu, eme no Wofuŋ jukopac i mana taranʒepieŋ. Eme no ʒika‐nane Babe ŋicwofuŋ ere meo râepe eki Aigita mâreŋ râsi ecnehuc imackezejec.
26Ehame no Aigita jaŋe bâtâtiec‐jopape mâreŋ sâc ŋicne ŋicne jaŋere ŋondeŋko siŋsaŋ qarâ junʒepieŋ. Iŋuc fua‐jareme no hâcne Wofuŋ jukopac i mana taranʒepieŋ.”
