1Eme Wofuŋzi kecʒiŋuc nazawec: “Israe ŋic gurune gurune jaŋere ʒâŋe ʒine hâcne: Mâreŋ mazi faic hâweckonec fuŋkerâ raku Heteloŋ hae fotâcnerâ Hamati hae râpeo fisikac. Erâ irecnec raku Haza‐Enoŋ haeo mickekac. Hae izi ine Damasko faicpec Hamati hae ŋifecnao ŋekac. Erâ ʒoaŋ wewefunaonec raku ʒoaŋ huhunao tarakac mâreŋ ŋondeŋ izi Daŋ ere biŋe ezejec.
2Daŋte mâreŋ heririŋnao ʒoaŋ wewefunaonec mâreŋ raku huhunao tarakac izi Ase ere biŋe ezejec.
3Asere mâreŋ heririŋnao ʒoaŋ wewefunaonec mâreŋ raku huhunao tarakac izi Naftali ere biŋe ezejec.
4Naftalire mâreŋ heririŋnao ʒoaŋ wewefunaonec mâreŋ raku huhunao tarakac izi Manase ere biŋe ezejec.
5Manasere mâreŋ heririŋnao ʒoaŋ wewefunaonec mâreŋ raku huhunao tarakac izi Eferaim ere biŋe ezejec.
6Eferaimte mâreŋ heririŋnao ʒoaŋ wewefunaonec mâreŋ raku huhunao tarakac izi Rubeŋ ere biŋe ezejec.
7Rubeŋte mâreŋ heririŋnao ʒoaŋ wewefunaonec mâreŋ raku huhunao tarakac izi Juda ere biŋe ezejec.
8“Judare mâreŋ heririŋnao ʒoaŋ wewefunaonec mâreŋ raku huhunao tarakac irec dâkâne moc bâtiripie fozejec, mâreŋ otecne‐ticnere sâc i kubi 25 tauseŋ ezejec â hâŋne‐ticne ʒoaŋ wewefunaonec raku huhunao tarakac i ine ŋic gurune gurune jaŋeraonec moczi mâreŋ rowec irec sâc ezejec; tiri ufuŋ ine ʒâʒâŋiŋko ŋezejec.
9Mâreŋ dâkâne Wofuŋte biŋe bâtiripie foocmu irec sâc ine kecʒiŋuc: Hâŋne‐ticne kubi 25 tauseŋ â otecne‐ticne kubi 20 tauseŋ.
10Mâreŋ bâtirikicne i bâfâuckepie dâkâne jahec â moc ʒiŋuc fuazejec: Taha bapa jaŋere mâreŋ dâkâne moc fuaocmu irec sâc ʒiŋuc: Hâŋne‐ticne faicpec i kubi 25 tauseŋ, â otecne‐ticne ʒoaŋ huhunaopec i kubi 10 tauseŋ, â ʒoaŋ wewefunaopec i kubi 10 tauseŋ jaha, erâ hâŋne‐ticne juwicpec i kubi 25 tauseŋ jaha. Wofuŋte tiri ufuŋzi ine ʒâʒâŋiŋko ŋezejec.
11Mâreŋ dâkâne i taha bapa mufiriec‐jopakicne, Zadokore ŋokâfâc hâcne, jaŋere biŋe. Jaŋe hâcne kiŋaŋ qanarehuc Israe ŋic jaŋe qâsoriehapie Lewire ɋâricfâc qâsoriembiŋ jaŋere sâc mi embiŋ.
12Mâreŋ ŋondeŋ izi hâcne mâreŋ bâtirikicnaonec dâkâne furu dindiŋ ehuc jaŋere biŋe ezejec. Ehuc Lewire ɋâricfâc jaŋere mâreŋ heririŋnao fozejec.
13Ehame taha bapa jaŋere mâreŋ heririŋnao Lewire ɋâricfâc jaŋere mâreŋ dâkâne fuazejec, hâŋne‐ticnere sâc i kubi 25 tauseŋ â otecne‐ticnere sâc i kubi 10 tauseŋ. Qâqâhâc mâreŋ‐jeŋicte sâc ine ʒiŋuc fuazejec: Hâŋne‐ticne kubi 25 tauseŋ â otecne‐ticne kubi 20 tauseŋ ezejec.
14Jaŋe mâreŋ i moneŋte erâ mi qikiŋnenʒepieŋ â nareŋ gareŋ wâc mi enʒepieŋ. Ehuc mâreŋ bâwosâekicne i Wofuŋzi honeme tirine ekacte ŋic furune jarepie moc mi rauckenʒepieŋ.
15“Mâreŋ tofane foocmu otecne‐ticnere sâc i kubi 5 tauseŋ â hâŋne‐ticnere sâc i kubi 25 tauseŋ ezejec. Mâreŋ izi hâcne haere biŋe foha fic hae â gie wiac banʒepieŋ. Hae ine ʒâʒâŋiŋko ŋezejec.
16Haere ma ine kecʒiŋuc fuazejec: Faic mâreŋkopec â juwic mâreŋkopec, erâ ʒoaŋ wewefunaopec â huhunaopec irec ma i kubi 4 tauseŋ 500 sasawa efârezejec.
17Erâ haere toma irec sâc ine kecʒiŋuc fuazejec: Faic mâreŋkopec â juwic mâreŋkopec, erâ ʒoaŋ wewefunaopec â huhunaopec irec ma i kubi 250 sasawa fua‐fârezejec.
18Mâreŋ bâtirikicne irec heririŋnao mâreŋ tofane fokac izi ʒoaŋ wewefunaopec kubi 10 tauseŋ ezejec â ʒoaŋ huhunaopec iŋuc jaha kubi 10 tauseŋ fuazejec. Eme ira nânâ gie bapie fârine fuame haeo gieŋic juŋgopieŋ jaŋere biŋe ezejec.
19Ehame Israe ŋic gurune gurune jaŋeraonec gieŋiczi ira juhuc he sarac enʒepieŋ.
20Qâqâhâc mâreŋ tirine bâwosâeniŋmu ira haere biŋe mâreŋzi ʒuhuckeme hâŋne‐ticnere sâc i kubi 25 tauseŋ â otecne‐ticnere sâc i kubi 25 tauseŋ jaha ezejec.
21“Mâreŋ haere biŋe â tirine mukicne irec tofane ŋifec â ŋifec forakac i ŋic fekicne ere biŋe ezejec. Mâreŋ‐ticnere ma i tiri mâreŋ kubi 25 tauseŋ mukicne irecnec domarâ raku ʒoaŋ wewefunaopec mao tarazejec. Â ŋifec iŋuc jaha mâreŋ‐ticnere ma i tiri mâreŋ kubi 25 tauseŋ mukicne irecnec domarâ raku ʒoaŋ huhunaopec mao tarazejec. Israe ŋicguru jaŋere mâreŋ foocmu irec heririŋko mâreŋ‐ticnere ma fuazejec. Mâreŋ izi hâcne ŋic fekicnere biŋe eha mâreŋ tirine mukicne â taha ufuŋ jahe ʒâʒâŋiŋko fozepirec.
22Eme Lewiŋic jaŋere mâreŋ mecne â mâreŋ izi ʒâʒâŋiŋkoa foha ŋic fekicnere mâreŋzi ŋifec â ŋifec forazejec. Ŋic fekicne ere mâreŋzi Juda â Benjamiŋ jahere mâreŋ ŋoŋondeŋko fozejec.
23“Guru nâfocne jaŋere dâŋ ine kecʒiŋuc fokac: Ʒoaŋ wewefunaopec raku huhunao tarakac mâreŋ ŋondeŋ izi Benjamiŋ ere biŋe ezejec.
24Benjamiŋte mâreŋ heririŋnao ʒoaŋ wewefunaonec raku huhunao tarakac izi Simeoŋ ere biŋe ezejec.
25Simeoŋte mâreŋ heririŋnao ʒoaŋ wewefunaonec raku huhunao tarakac izi Isasa ere biŋe ezejec.
26Isasare mâreŋ heririŋnao ʒoaŋ wewefunaonec raku huhunao tarakac izi Sebuloŋ ere biŋe ezejec.
27Sebuloŋte mâreŋ heririŋnao ʒoaŋ wewefunaonec raku huhunao tarakac izi Gade ere biŋe ezejec.
28Gadere mâreŋ heririŋnao juwic mâreŋkopec ma foocmu izi Tama haeonec raku Meriba‐Kadesi opâo fisizejec, erâ irecnec ʒuhuckerâ raku Aigita opâ qacnerâ raku hâwec sâkoo hu fisizejec.
29Mâreŋ i hâcne Israe ŋicguru jaŋe bâtâc bajarepie dâkâne dâkâne ru sâc ro rauc erâ bajunʒepieŋ. Wofuŋ Anutu nore dâŋ iŋuc.
30“Haere motâc ine ʒiŋuc fua‐fârezejec: Faic mâreŋkopec sac fuaocmu irec sâc i kubi 4 tauseŋ 500 ezejec.
31Ehame motâc sâko‐ticne 3 fuazejec: Moc Rubeŋte motâc â moc Judare motâc erâ moc Lewire motâc. Hae motâc i Israe ŋicguru juraŋgopieŋ sâc jaŋe jaŋacne wase bafârenʒepieŋ.
32Ʒoaŋ wewefunaopec sac foocmu irec sâc i kubi 4 tauseŋ 500 eha motâc‐ticne 3 jaha fuazejec: Josefere motâc, Benjamiŋte motâc â Daŋte motâc.
33Juwic mâreŋkopec sac foocmu irec sâc i kubi 4 tauseŋ 500 eha motâc‐ticne 3 jaha fuazejec: Simeoŋte motâc, Isasare motâc â Sebuloŋte motâc.
34Ʒoaŋ huhunaopec sac foocmu irec sâc i kubi 4 tauseŋ 500 eha motâc‐ticne 3 jaha fuazejec: Gadere motâc, Asere motâc â Naftalire motâc.
35Hae râreckehuc sac bapie sâcticne kubi 18 tauseŋ ezejec. Ehame hae irec ʒâŋe ʒiŋuc muhuc junʒepieŋ: Wofuŋte hae sanaŋ hâcne.”
