Eʒekie 10

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

¹No ʒâŋe fipe feme mi kerubim jaŋere qizec botâŋko wiac moc eri ŋeŋere hawari iŋucne qânâ furi sâko safirizi bakicne honezepac i!

²Eme ŋic qoruc qarâ domawec e Wofuŋzi ʒiŋuc âzâcnewec: “Go ʒafeŋgâŋ jaŋe ririsiehapie kerubim jaŋere rurumaŋko raʒirâ ŋondeŋ‐jeŋickonec ʒoc kine ameckerâ haeo behetec iiŋnehuc tâtiezejec.” Eme ʒâŋe fai‐naneo raʒiwec.

³Raʒihame kerubim jaŋe taha ufuŋ ŋifecne juwic mâreŋkopec domambiŋ, ehame karorac moczi taha ufuŋte hae ʒoŋa piticne sâcke‐fârewec.

⁴Eme Wofuŋte huriri qâreŋzi kerubim jaŋeraonec faharerâ taha ufuŋte motâc fuŋko sâckerâ fowec, eme karoraczi taha ufuŋ fusucma‐fâreha Wofuŋte huriri qâreŋ irec ʒâziriŋzi hae ʒoŋa‐ticne batamae‐fârewec.

⁵Kerubim jaŋere fafakec irec fânâŋ fuame hae ʒoŋao domambiŋzi manambiŋ, fânâŋ i Anutu tâpiri runezi dâŋeekac iŋucne tinac.

⁶“Go ʒafeŋgâŋ ririsieeŋgopieŋ â kerubim ŋondeŋ‐jeŋickonec ʒoc rozemec,” Wofuŋ e ŋic qoruc qarâ domawec dâŋ iŋuc âzâcneme raʒirâ ʒafeŋgâŋ ŋifecnao domawec.

⁷Eme kerubim moczi âgofâcne jaŋerao meticne sicnehuc ŋondeŋ‐jeŋicko ʒoc ʒahuc fowec irec tucne gâcne rorâ ŋic qoruc qarâ domawec e râcneme rorâ hurawec.

⁸Kerubim jaŋe fafakec rurumaŋ‐jeŋicko ŋicme hawari fowec.

⁹Eme no ʒâŋe fipe rame kerubim jaŋere ŋondeŋko ʒafeŋgâŋ 4 honec‐jopapo, kerubim jaŋe ru sâc ʒafeŋgâŋ‐jeŋic mocjaha mocjaha sasawa. Ʒafeŋgâŋ jaŋere hawari ine qânâ furi sâko iŋucne bâricnehuc ŋembiŋ.

¹⁰Jaŋe hawari‐jeŋic mocjaha sasawa, erâ wâc ʒafeŋgâŋ mocte maŋnao ʒafeŋgâŋ moc râekicne tinac ewec.

¹¹Kerubim jaŋe mâreŋ faic â juwic, ŋifec â ŋifec rahuc tikic fotikic tâmiric dândâŋnea rafârembiŋ, ehame ʒafeŋgâŋ bâbânizi rawec ijaha âgofâcne jaŋe bâjâperâ tikic fotikic tâmiric jaha rafârembiŋ.

¹²Kerubim sahac‐jeŋicko, râpe‐jeŋicko, mejeŋicko, fafakec‐jeŋicko erâ ʒafeŋgâŋ‐jeŋicko ʒâŋe hândâŋ bocjahazi sâcke‐fârerâ ŋerawec.

¹³Ʒafeŋgâŋ jaŋe ine ʒafeŋgâŋ ŋeŋe risiene, ʒâŋe‐jeŋic iŋuc mupie manapo.

¹⁴Kerubim jaŋe ru sâc ʒâŋe mai‐jeŋic 4; ʒâŋe mai‐jeŋic moc ine kerubim iŋucne, â moc ine ŋic hawari iŋucne, â moc ine laioŋ hawari iŋucne erâ moc i ine tucwipere hawari iŋucne.

¹⁵Eme kerubim jaŋe faharerâ sawao fembiŋ. Ine Kebara opâo wiac jujune honec‐jopapo jaŋe hâcne.

¹⁶Eme kerubim jaŋe rapie sâc ʒafeŋgâŋ jaŋe mâmâc rambiŋ, â kerubim jaŋe mâreŋ beherâ fahareniŋte fafakec‐jeŋic qaratiepie ʒafeŋgâŋ jaŋe moc mi behec‐jopambiŋ.

¹⁷Wiac jujune jaŋere mârozi ʒafeŋgâŋ jaŋehec mâmâc juwecte wiac jujune jaŋe domambiŋ sâc ʒafeŋgâŋ jaŋe mâmâc domambiŋ, me faharerâ rambiŋ sâc jaŋe mâmâc rambiŋ.

¹⁸Iŋuc fuame Wofuŋte huriri qâreŋzi taha ufuŋte motâckonec rârierâ kerubim jaŋere qizec botâŋko sanaŋkerâ domawec.

¹⁹Kerubim jaŋe ine fafakec‐jeŋic hedâmârerâ fahare sawao fembiŋ. Eme no honehape ʒafeŋgâŋ‐jeŋichec mâmâc rambiŋ. Raku Wofuŋ ufuŋ‐ticnere motâc ʒoaŋ wewefunaopec fowec ira domahapie Israere Anutu ere huriri qâreŋzi qizec botâŋ‐jeŋicko sanaŋkerâ domawec.

²⁰Wiac jujune i jaŋe hâcne Israere Anutu ere rurumaŋko Kebara opâo honec‐jopapo, ehuc ʒiŋuc mana tarapo, jaŋe kerubim hâcne.

²¹Jaŋe ru sâc ʒâŋe mai‐jeŋic 4, erâ fafakec‐jeŋic 4 jaha, fafakec‐jeŋic rurumaŋnao ŋicme hawari fowec.

²²Hawari‐jeŋic ine Kebara opâo honec‐jopapo jaŋere sâc. Eme jaŋe buc buc dândâŋnea rafârembiŋ.