Isikiyel 27

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

¹Wal YAWEI det trubala God bin tok,

²“Isikiyel yu garra sing dijan fyunral song blanga Taya, det bigwan taun deibin bildimap wansaid langa solwoda. En deibin oldei selimbat enijing langa najalot kantri wansaid langa solwoda. Yu dalim detlot pipul langa Taya dijan wed brom mi na YAWEI det boswan God. “‘Taya, yubin oldei tok brabli praudbalawei. Yu reken yu brabli purdiwan.

⁴Yu kemp langa solwoda. Ol detlot kapinta bin meigim yu luk laik det bigiswan bout.

⁵Deibin meigimbat yu garram detlot saiprastri brom det bigwan hil gulum Heman, en deibin yusumbat sidatri brom Lebanan blanga meigim det brabli longwan pol blanga yu.

⁶Deibin gajimbat detlot ouktri brom Beishan blanga meigim pedul. Deibin gajimbat detlot paintri brom Saipras blanga meigim det flopat blanga det bout, en deibin meigim im purdiwan garram shainiwan elafen boun gulum aibri.

⁷Deibin yusumbat brabli gudwan matiriyal brom Ijip blanga meigim seil wulijim ebribodi gin luk langa yu. Deibin yusum bluwan en pepulwan matiriyal brom Saipras blanga meigim sheid blanga det flopat.

⁸“‘Detlot men brom Saidan en Abad bin pedulumbat det bout, en yu ronwan wekinmen hu sabi hau blanga lukaftum det bout, bin jidan bos langa det bout.

⁹Detlot men brom Biblos bin oldei fiksimap enijing weya imbin breik, en ola men langa ebri bout bin oldei baiyimbat ola enijing langa detlot shop langa Taya.

¹⁰Ola breibwan solja brom Pesha, Lidiya en Libiya bin oldei wek langa yu bout, en deibin oldei maindimbat yu, en deibin meigimbat yu brabli haibala.

¹¹Ola men brom Abad en Salisha bin lukaftumbat yu, en najalot men brom Gamad bin wotjimbat detlot strongbala haus blanga eni enami blanga yu. Olabat spiya, bigwan naif en erro deibin heingimap langa ol detlot wol, en bin meigim yu jidan brabli purdiwan.

¹²“‘Wal detlot shop menija brom det kantri gulum Tashish bin kaman garram silba en aiyan blanga baiyim ola gudwan ting brom yu.

¹³En detlot pipul brom Gris, Tubal en Mishek bin oldei selimbat ola prisana, en ola ting deibin meigim brom kopa.

¹⁴En detlot pipul brom Bethtogama bin selimbat langa yu detlot dongki en wekin hosis en detlot hosis weya deibin oldei deigim langa wo.

¹⁵Yubin oldei selimbat en baiyimbat brom detlot pipul brom det taun gulum Rouds. En detlot pipul brom najalot kantri hubin jidan wansaid langa solwoda bin baiyim ola enijing garram detlot shainiwan elafen boun gulum aibri, en det brabli gudwan wud blanga meigim enijing.

¹⁶Detlot pipul langa Idam bin oldei selimbat ola purdiwan ston, pepulwan matiriyal en ola najalot gudwan matiriyal.

¹⁷Ola Juda en Isreil pipul bin oldei baiyim ola gudwan ting brom yu garram ola gudwan sid daga en gudwan fig, en shugabeig, oliboil en gudsmelwan medisin.

¹⁸Detlot pipul langa Dameskas bin luk wanim yubin abumbat blanga selimbat, en olabat bin bringimap wain brom Helbon en wul brom Saha blanga selimbat.

¹⁹En detlot pipul brom det kantri gulum Yusal bin bringimap aiyan en gudwan sid daga en ola emtiwan botul blanga det wain.

²⁰Detlot pipul langa Dedan bin bringimap sedul bleingkit.

²¹En detlot pipul brom Areibiya en detlot boswan brom Keda bin selim langa yu ola lilwan en bigwan ship en nenigout.

²²Detlot shop menija brom Shiba en Reiyama bin baiyim ola gudwan ting brom yu garram brabli gudwan sid daga, purdiwan ston en gol.

²³Yubin selimbat en baiyimbat brom detlot pipul brom detlot taun gulum Heran, Keni, Idin, Shiba, Asiriya en Kilmad,

²⁴en deibin bringimap brabli gudwan klos en pepulwan en gudwan matiriyal, en brabli braitwan bleingkit en brabli strongwan roup.

²⁵En detlot bigwan bout bin deigimbek detmatj enijing langa ola difrinwan kantri. “‘Yubin jidan jis laik bigiswan bout bulap garram ola enijing,

²⁶en wen detlot wekinmen bin gowei garram det bout langa det solwoda, det brabli strongbala win bin kaman brom sanraiswei en breigimap yu.

²⁷En enijing yubin abum langa det bout bin ol gon, ola gudwan ebrijing en detlot men hubin oldei lukaftum det bout en ola wekinmen en shop menija en ola solja bin ol binijap.

²⁸En detlot hubin jidan langa det draiwan graun bin irrim ol detlot jinginatbat wen deibin draun langa det solwoda.

²⁹“‘En ol detlot hubin wek langa najalot bout bin libum olabat bout en deibin jandap deya langa det sengraun.

³⁰En deibin kraikraibat soribalawei blanga yu en olabat bin pudumbat das langa olabat hed en deibin ol rolimbat miselp langa eshis.

³¹En deibin sheibumbat miselp hed en olabat bin werrimon sekbeigwan klos wen olabat bin kraikraibat soribalawei.

³²Deibin ol jidan soribalawei en deibin singsingbat dijan fyunral song blanga yu. “‘Taya, yubin brabli bigiswan taun langa dislot najalot taun. Bat yu jidanbat andanith langa det solwoda na.

³³Ol detlot kantri hubin gedimbat detlot gudwan ting brom yu bin oldei jidan gudbinji, en ola king langa ebri kantri bin brabli ritjwan brom baiyimbat ebrijing brom yu.

³⁴Bat yubin binij. Yubin breikap en yu jidanbat andanith langa det solwoda garram ol yu ebrijing, en ol yu wekinmenmob du.

³⁵Ol detlot pipul hu jidan wansaid langa solwoda bin brabli hatjamp wen olabat bin irrim det nyus. En olabat boswan bin sheiksheikbat nomo lilbit, en deibin bradin nomo lilbit du.

³⁶Detlot shop menija brom ola najalot kantri kaan bilib wanim bin hepin. Yubin dai brabli krulbalawei, en yubin binijap olagijawan.’”