1Wofuŋzi ʒiŋuc nazawec: “Ŋicte ɋâric, go Israe tiki mâreŋte findaŋdâŋ muhuc ʒiŋuc âzâcnezemec: O Israe tiki mâreŋ, go Wofuŋte dâŋ manazemec.
2Wofuŋ Anutuzi kecʒiŋuc mukac: Râsi jaŋe gore ʒiŋuc mumbiŋ: ‘Ia, tiki mâreŋ fofo sanaŋ i nâŋere biŋe ekac.’
3Irec hâcne findaŋdâŋ kecʒiŋuc muzemec: Wofuŋ Anutuzi ʒiŋuc mukac: Râsi jaŋe ima bacguhuc sipiricgupie ŋic gâcne jaŋe raucguhuc mu âke sisic egarembiŋ.
4Irec Israe tiki mâreŋ go Wofuŋ Anutu nore dâŋ manazemec. No tiki â mâreŋ facne, opâ sâko â wâneŋ erâ fic hae ima bakicne forakac jaŋe dâŋ jazakopac. Jaŋe hâcne qâpuc guru rârec rârec juraŋgopieŋ jaŋere biŋe ehapie mu ruruc ejareŋgopieŋ.
5Irec Wofuŋ Anutu no kecʒiŋuc mukopac: No aaric sâko manahuc ŋicne ŋicne jaŋeraonec ʒanʒaŋne â Edomŋic jaŋe dâŋ mujarekopac. Jaŋe hâcne mâreŋ‐nane ima bahuc sipirickeniŋte bubiaŋ sâko manahuc mu âke sisic faio ro rauc embiŋ.
6Go irec hâcne Israe mâreŋte findaŋdâŋ muzemec, ehuc tikine facne â opâne opâne erâ wâneŋne wâneŋne dâŋ ʒiŋuc jazazemec: Wofuŋ Anutuzi kecʒiŋuc mukac: Manaŋgopieŋ, qâpuc jaŋe mu âke sisic eŋarembiŋte no kimbeŋ sâko qahuc dâŋ mujarekopac.
7Irec Wofuŋ Anutu no ʒiŋuc mukopac: Ŋic gurune gurune rârec‐ŋopahuc juŋgopieŋ jaŋe mu âke sisic‐jeŋicte okacne ʒâic fâro faio feniŋte mupaŋkekopac.
8“O Israe tiki mâreŋ, go ine fie ruruckerâ Israe ŋicfâc‐nane jaŋerao fâri rarauhec ezemec, jaŋe dameŋ bembeŋne sawa tarame mocwâc risieniŋmu.
9Manakic, no âgo egarehuc mocwâc maicgupemu, ehame go he sarac mocwâc egarezo.
10Eme mupe Israe ŋic sasawa jaŋe fua sawec ehuc fic hae sesuctac‐jeŋic bâpiaŋke‐fârerâ ira ŋec juc enʒepieŋ.
11No mupe gorao ŋic â qowi fuarâ sawe mâririackeniŋmu, ehuc mârâc jaha gorao fusucmarâ fojumbieŋ irec sâc mocwâc fusucmarâ fonʒepieŋ. Ehame mârâc jaha ehâmo‐garepo irec sâc bafehuc ehâmo‐garepemu. Iŋuc fuame, no hâcne Wofuŋ jukopac i mana taraniŋmu.
12No Israe ŋicfâc‐nane jaŋe hâcne ro rauc egarerâ gorao mocwâc ŋec juc eniŋte mana‐jarepemu, ehame goki jaŋere biŋe ehaŋ naru motecfâc‐jeŋic jaŋe gorao juhuc hâmo sipiric mocwâc mi enʒepieŋ.
13‘Go ŋic ki sipiric ejarehuc ŋicfâcge jaŋere naru motec omaec‐jopaekic,’ ŋic jaŋe gore iŋuc mueŋgopieŋte Wofuŋ Anutu no kecʒiŋuc mukopac:
14Go ŋic ki sipiric mocwâc mi ejarezemec â ŋicfâcge jaŋere naru motecfâc mocwâc mi omaec‐jopazemec, Wofuŋ Anutu nore dâŋ iŋuc.
15Eme no ŋicne ŋicne aka hejarepe mu âke sisic mocwâc mi egarenʒepieŋ â ŋic jaŋere mimi busâqoczi gore faio feme mocwâc mi qurutuazemec, Wofuŋ Anutu nore dâŋ iŋuc.”
16Wofuŋte dâŋ norao ʒuhuckerâ ʒiŋuc fuawec:
17“Ŋicte ɋâric, Israe kikefuŋ jaŋe mâreŋ‐jeŋicko juhuc juju â eebapa‐jeŋiczi mâreŋ‐jeŋic bâsâqorembiŋ; eme no juju bapa‐jeŋic honepe ŋokac moc mosa dameŋ‐ticne maickeme wâwânâŋhec eekac irec sâc ewec.
18Jaŋe mâreŋ‐jeŋicko soc hoŋkembiŋte â ɋâŋ qâqâtâc kiŋaŋ qajarehuc mâreŋ‐jeŋic bâsâqorembiŋte no kimbeŋ qajarehuc okacne bazu‐jarepo.
19No ŋicne ŋicne jaŋere ŋondeŋko bâtâtiec‐jopape mâreŋ sâc siŋsaŋ qarâ rambiŋ, no juju â eebapa‐jeŋicte sâcko dâŋ mutara‐jarepo hâcne.
20Jaŋe ŋicguru i me i jaŋerao fisipie ʒiŋuc mujarehuc tiri ʒâŋe‐nane wâwânâŋ ecnembiŋ: ‘Jaŋe Wofuŋte kikefuŋ juipiehapie sifu mâreŋ‐ticnaonec jâpec bâsuec ejarekicne.’
21Eme no Israe kikefuŋ jaŋe ŋicne ŋicne jaŋere ŋondeŋko juhuc tiri ʒâŋe‐nane wâwânâŋ ecnembiŋ irec busâqoc manapo.
22“Irec go Israe kikefuŋ ʒiŋuc jazac: Wofuŋ Anutu e kecʒiŋuc mukac: No wiac ezo ekopac i Israe kikefuŋ ŋoŋere erâ mâcne, i tiri ʒâŋe‐nanere erâ ezo ekopac, ŋoŋe tiri ʒâŋe‐nane qâpuc jaŋere ŋondeŋko juhuc wâwânâŋ ecnembiŋ i hâcne.
23Ŋoŋe qâpuc jaŋerao ʒâŋe‐nane wâwânâŋ ecnekupie wawahane ewec, tiri ʒâŋe‐nane i hâcne mocwâc bafaharepe qâpuc guru jaŋe, no Wofuŋ jukopac i mana taracnuniŋmu, i Wofuŋ noni mukopac. No tiri jukopac irec fuŋne i ŋoŋerao gie bahuc ʒâŋe fai‐jeŋicko bataniŋkepemu.
24Ine ʒiŋuc epemu: Qâpuc jaŋere ŋondeŋkonec rocŋopahuc mâreŋne mâreŋne irec henusuc‐ŋoparâ ŋaŋacne mâreŋko bacŋopa fisipemu.
25Opâ ɋaɋacne tiepe hecŋopahuc wâwânâŋ‐ŋeŋic ʒure‐fâreocmu, ehuc nemuɋâŋte mamakâc i wâc ʒure‐ŋareocmu.
26No buhândâŋ ɋâricne ŋarepemu â Mâro ɋâricne maŋŋeŋicko râepe huocmu. Maŋŋeŋicko busezi buhândâŋ fokac i ro bârâriec ehuc biuczi buhândâŋ moc râe‐ŋarepemu.
27Maŋŋeŋicko Mâro‐nane râehuc eŋarepe dâŋsanaŋ‐naneo ninipenʒepieŋ â mumutâc‐nane reŋkenʒepieŋ.
28Erâ mimiŋnefâc‐ŋeŋic mâreŋ jarepo mâreŋ ira ŋec juc enʒepieŋ, ehuc nore ŋicfâc erâ juhapie noni Anutu‐ŋeŋic jupemu.
29No juju‐ŋeŋic wâwânâŋheckonec batarac‐ŋopapemu, ehuc mupe padi jacgoŋ mâriri sâko fuame ŋoŋerao roroc mocwâc mi fuazejec.
30No mupe gieo jâc fâri rarau sâkohec â giegaŋzi mazuc mâririhec eocmu. Eme ŋoŋe ŋicne ŋicne jaŋere ŋondeŋko juhapie roroc fuame mu âke sisic mocwâc mi eŋarenʒepieŋ.
31Iŋuc fua‐ŋareme ŋoŋe juju â eebapa‐ŋeŋic sâqocne irec manasuhuc ŋaŋacnere â eebapa‐ŋeŋic hehesicne, erâ nemu araŋ bapa‐jare‐ŋeŋicte manapie mamakâcne eocmu.
32Wofuŋ Anutu noni ʒiŋuc mukopac: No ŋoŋere erâ wiac i me i epemu, ŋoŋe iŋuc mana taraniŋ. O Israe kikefuŋ, ŋoŋe eebapa‐ŋeŋicte mimierâ qurutuanʒepieŋ.”
33Wofuŋ Anutuzi kecʒiŋuc mukac: “No hehesic‐ŋeŋic bârâriehuc ʒure ɋaɋac‐ŋopapemu dameŋ ira eŋarepe fic hae‐ŋeŋic ima bakicne i mocwâc bâpiaŋkerâ maŋnao ŋec juc eniŋmu.
34Â mâreŋ niniŋ siarereŋ fuarâ fowec ira mocwâc he sarac enʒepieŋ, ehame ira sicne fotâc eeŋgopieŋ jaŋere maio niniŋ siarereŋ mocwâc mi fozejec.
35Eme jaŋe ʒiŋuc muniŋmu: ‘Mâreŋ ʒi niniŋ siarereŋ fuarâ fowec i Edeŋ jufu gie iŋucne ewec; ehame hae ima bacjopakicne â hetâc qâtâtiec‐jopakicne jaŋe ŋiczi mocwâc basanaŋ‐joparâ ira ŋec juc eeŋgopieŋ.’
36Iŋuc fuame ŋicne ŋicne jaŋeraonec ʒanʒaŋne rârecgurâ jueŋgopieŋ jaŋe ʒiŋuc mana taracnuniŋmu: Wofuŋ eki hâcne hae ima bacjopakicne i bâpiaŋ‐jopawec, erâ mâreŋ niniŋ siarereŋ fowec ira mocwâc hesarac gie bawec. Wofuŋ no hâcne irec findaŋdâŋ mupozi bâfuapemu wâc.”
37Wofuŋ Anutuzi ʒiŋuc mukac: “No Israe kikefuŋ jaŋe sawe mâririackeniŋte numu‐narepie mana‐jarepe lama bulimakao jaŋe iŋucne fua sawec enʒepieŋ.
38Taha bâzire biŋe lama bâwosâec‐jopakicne jaŋe hombaŋ sâkoo Jerusalem hae fusucmaeŋgopieŋ irec sâc jaha ŋic jaŋe hae sesuctac fuarâ ŋerakac i fusucmanʒepieŋ. Iŋuc fuame, no hâcne Wofuŋ jukopac i mana taraniŋmu.”
