Eʒekie 14

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

¹Israe ŋic soŋaŋ gâcne jaŋe norao fisirâ mai‐naneo waha ŋembiŋ.

²Ehame Wofuŋte dâŋ kecʒiŋuc fua‐narewec:

³“O ŋicte ɋâric, ŋic ʒi jaŋe maŋjeŋic nemuɋâŋfâc‐jeŋic jaŋerao râepie foekac, ehuc wiac sâqocnezi eatuc‐jopame waha jopaekac i hâcne honebâckeeŋgopieŋ. Eme ŋic iŋucne jaŋe mu wioc enarepie no dâŋ okacne sâcne bâtikie‐jarepemu me?

⁴Irec go ʒiŋuc muhuc jazazemec: Wofuŋ Anutuzi dâŋ kecʒiŋuc mukac: Israe kikefuŋ ŋoŋeraonec ŋic e me e moczi maŋticne nemuɋâŋfâc‐ticne jaŋerao râeme foekac me wiac sâqocnezi eatuckeme waha qaekac i hâcne honebâckehuc porofeterao raocmu e nemuɋâŋfâc‐ticne jucne‐bipiehapie Wofuŋ noni hâcne dâŋ okacne bâtikiecnepemu.

⁵Iŋuc ecnepe ŋic nemuɋâŋfâc‐jeŋic jaŋerao qohotahuc no râpecnumbiŋ jaŋe fâfârerâ hemâtâc‐jopaocmu.

⁶“Irec hâcne Israe kikefuŋ ʒiŋuc jazazemec: Wofuŋ Anutuzi kecʒiŋuc mukac: Ŋoŋe maŋŋeŋic bârisierâ nemuɋâŋfâc‐ŋeŋic behec‐jopanʒepieŋ, ehuc wiac mamakâcne bacjopa jueŋgopieŋ i râpec‐jopa‐fârenʒepieŋ.

⁷Israe ŋic moczi me jaŋere ŋondeŋko ŋic furune jueŋgopieŋ jaŋeraonec moczi no râpecnurâ maŋticne nemuɋâŋfâc‐ticne jaŋerao râeme fohame me wiac sâqocnezi eatuckeme waha qaekac i hâcne honebâckehuc sifu no mu wioc enareocte porofeterao raocmu ine Wofuŋ no nahac hâcne okacne bâtikiecnepemu.

⁸No ŋic e mu âke sisicte biŋe eocte râsi ecnehuc ŋic jaŋere ma âkendâŋnepe izi uŋsawaŋ‐jeŋic ezejec. Ehuc ŋicfâc‐nane jaŋeraonec bârâriepe, no hâcne Wofuŋ jukopac i mana taranʒepieŋ.

⁹Eme porofete e ŋic jaŋere eatuc dâŋ manarâ okacne bâtikie‐jareocmu ine Wofuŋ noni eatuckepo tinac eocmu. Irec no râsi ecnehuc Israe ŋicfâc‐nane jaŋeraonec bârâriepemu.

¹⁰Eme okacne i porofete â dâŋ mu wioc eekac ŋic i jahere biŋe mâmâc ezejec.

¹¹Iŋuc fuame Israe ŋic jaŋe mocwâc mi râpecnunʒepieŋ me qaqatara bâfuahuc maŋjeŋic mi hegâpârenʒepieŋ, aricne, jaŋe ŋicfâc‐nane juhapie no Anutu‐jeŋic erâ juzepac; Wofuŋ Anutu nore dâŋ iŋuc.”

¹²Wofuŋte dâŋ norao kecʒiŋuc fuawec:

¹³“Ŋicte ɋâric, manakic, mâreŋ moc irec rune jaŋe no qaisocnuhuc râpecnuniŋmu ine râsi ejarehuc nânâ gie‐jeŋic sipirickepemu. Ehuc roroc bâfua‐jarehuc ŋic mecne qowi mecne mâmâc imac‐jopapemu.

¹⁴Ehame Noa, Danie â Hiobe ŋic jahec â moc i jaŋe ira junʒapiŋ muzac tiŋne juju‐jeŋicte erâ jaŋe jaŋacne juju sawa ŋezickenʒapiŋ. Wofuŋ Anutu nore dâŋ iŋuc.

¹⁵No mâreŋ mocko ira mupe qowi mimicnezi fuarâ mâreŋ rune ki sipiric ejarepie omaenʒapiŋ muzac ŋic gâcne jaŋe qowire hâwic‐jopame ira sicne fotâc mi enʒapiŋ.

¹⁶Eme no jujâmbâŋkekopacte ŋic jahec â moc keci jaŋe ira junʒapiŋ muzac naru motecfâc‐jeŋic wâc sâcne mi ŋezic‐jopanʒapiŋ, aricne, jaŋe jaŋacne juju sawa ŋezickehapie mâreŋ i niniŋ siarereŋ fuarâ fozac. Wofuŋ Anutu nore dâŋ iŋuc.

¹⁷Me mâreŋ ira ʒika fuame mupe ʒikazi mâreŋ fotâcnehuc ŋic â qowi kimiziec‐jopame muzac

¹⁸ŋic jahec â moc keci jaŋe no Wofuŋ jukopacte naru motecfâc‐jeŋic sâcne mi ŋezic‐jopanʒapiŋ, aricne, jaŋe jaŋacne juju sawa ŋezickenʒapiŋ. Wofuŋ Anutu nore dâŋ iŋuc.

¹⁹Me mâreŋ ira mupe huc sâqocne fuame muzac me ŋic â qowi sipirickeniŋte aaric mana‐jarehuc ʒika bâfua‐jarezapo muzac ine no Wofuŋ jukopacte

²⁰Noa â Danie erâ Hiobe jaŋe naru motecfâc‐jeŋic wâc sâcne mi ŋezic‐jopanʒapiŋ, aricne, jaŋe tiŋne juju‐jeŋicte erâ jaŋe jaŋacne juju sawa ŋezickenʒapiŋ. Wofuŋ Anutu nore dâŋ iŋuc.”

²¹Wofuŋ Anutuzi kecʒiŋuc hâcne mukac: “No Jerusalem hae okacne bazucnehuc ŋic â qowifâc‐ticne omaeniŋte bâbâtiŋ wiac 4 mupe fuaocmu, ine kecʒiŋuc: Ʒika, roroc, qowi mimicne â huc sâqocne.

²²Erâ sifu ŋic afecne jaŋe naru motecfâc‐jeŋic haeonec jowac‐jopapie wahaniŋte ŋezic‐jopapemu. Eme jaŋe wahapie ŋoŋe juju â eebapa‐jeŋic honerâ buŋeŋic mâteŋkeme ʒiŋuc mananiŋmu: Wofuŋzi Jerusalem haeo wiac hâhâwicne ebac ewec i sâckewec.

²³Ŋoŋe juju â eebapa‐jeŋic honerâ ʒiŋuc mana tarahuc buŋeŋic mâteŋkeocmu: Wofuŋ e wiac ebac ewec i kosa mâcne, fuŋnehec efârewec. Wofuŋ Anutu nore dâŋ iŋuc.”