Eʒekie 40

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

¹Kâpâcwâru ficko ŋehuc juhapene jara 25 fufuŋkenao ʒoaŋ gie bapa namba 10 ewec. Ehame Jerusalem hae ima bapie sesuctac fuarâ foha jara 14 tarawec ʒoaŋ ira jâmbâŋ Wofuŋte tâpirizi norao fua taniŋkewec.

²Iŋuc enareme maŋnane ŋerisieme manape Anutuzi Israe mâreŋko jowacnu rarâ tiki ʒora botâŋnao râecnuwec tinac ewec. Eme no tiki ira domahuc mai‐naneo hae sâko moc ŋeme tinac honepo.

³Erâ ira juhuc ŋic moc sahac hawarine aeŋ bâbâroŋzi bakicne tinac honepo, eme ŋic e sacmotâcko domahuc sâc bapare muc â meda badomawec.

⁴Ehuc ʒiŋuc nazawec: “Ŋicte ɋâric, go wiac gaza gowatuc epemu i hone manac erâ Israe kikefuŋ jaza mutâc ecmurâ ʒira jowacgu warekicne.”

⁵Manaŋgopieŋ, no wiac kecʒiŋuc honepo: Taha ufuŋte hae ʒoŋa i qânâsac moczi râreckehuc fowec. Erâ ŋic sâcmeda badomawec i ʒoricne‐ticnere sâc kubi 6 ewec. Kubi i meda moc 20 inses irec sâc. Eme qânâsac sâc bame otecne‐ticne â hâŋne‐ticne kubi 6 jaha ewec.

⁶Izi sacmotâc ʒoaŋ wewefunaopec fowec irec ririo ferâ motâc fuŋnere sâc bame kubi 6 jaha ewec.

⁷Eme fic maŋne ŋifec â ŋifec forawec irec hâŋne â otecne i kubi 6 jaha â ŋoŋondeŋ‐jeŋicte sawane forawec irec sâc i kubi 5, erâ motâc fuŋne moc hae ʒoŋa tataranao taha ufuŋ maickerâ fowec irec sâc i kubi 6 jaha.

⁸Haesac motâcko hae gâŋgâŋne fowec irec sâc bame kubi 8 ewec,

⁹â wâtuŋfâcne jaŋere sâc bame kubi 2 ewec. Haesac motâcko hae gâŋgâŋne izi ine taha ufuŋ maickehuc fowec.

¹⁰Motâc ʒoaŋ wewefunaopec fowec irec ŋifec â ŋifec fic maŋne jahec â moc fombiŋ jaŋe sâcjeŋic mocjaha erâ ŋifec â ŋifec wâtuŋ‐jeŋic doma rambiŋ jaŋe sâcjeŋic mocjaha sasawa.

¹¹Eme motâcte sawane bembeŋne irec sâc bame kubi 10 â sawane ʒoricne irec sâc bame kubi 13 ewec.

¹²Ŋifec â ŋifec maŋne forawec irec ââketâc fowec wâc; ââketâcte sâc ine kubi 1; â fic maŋne hâŋne â otecne forawec i kubi 6 sasawa.

¹³Hata gâŋgâŋne irec sâc manaocte sâcmeda fic maŋne ŋifeckonec fuŋkerâ râe raku fic maŋne ŋifecko râe tarame kubi 25 ewec.

¹⁴Hae gâŋgâŋne irec sâc bame kubi 20 ewec; hae ʒoŋa ine motâc heririŋko fisiwec.

¹⁵Eme motâc raraʒi irecnec fuŋkerâ raku hae gâŋgâŋne maŋnaopec motâc fowec sawane irec sâc bâfuame kubi 50 ewec.

¹⁶Motâc raraʒi ŋifec â ŋifec i qâqâtâc kataŋ‐ticnehec, erâ qâqâtâc kataŋ i jaŋe hae gâŋgâŋne ŋifecko wâtuŋ doma rambiŋ jaŋeraopec rahuc gâŋgâŋne efârembiŋ. Hae gâŋgâŋne ira wâc ŋifec â ŋifec qâqâtâc kataŋ forambiŋ, erâ wâtuŋko hâmujâcte hawari metâ herakicne.

¹⁷Eme ŋic e jowacnume hae ʒoŋa sâkoo fe fisipo. Erâ ira fic maŋne 30 hae ʒoŋa râreckehuc ŋerame honepo, mâreŋko ine fic heririŋnao qânâ dadapic herakicne.

¹⁸Qânâ i motâc ŋifec â ŋifec herakicne, erâ motâc ʒoricne‐ticnere sâc jâmbâŋ hekicne. Qânâ i hâcne sac fuŋnao herakicne.

¹⁹Eme ŋic e hae ʒoŋa kâcɋenere motâckonec fuŋkerâ sâc râe raku hae ʒoŋa piticnere motâcko râe tarame kubi 100 ewec.

²⁰Eme ŋic e jowacnurâ faic mâreŋkopec motâc fowec ira rawec. Motâc i hae ʒoŋa sâkore motâc jaha. Erâ e motâc irec hâŋne â otecne irec sâc bawec.

²¹Fic maŋne jahec â moc ŋifec â ŋifec forambiŋ, erâ wâtuŋ‐jeŋic â hae gâŋgâŋ‐jeŋic i motâc bâbâni mukicne irec sâc jaha. Ʒoricne‐ticne kubi 50 â bembeŋne‐ticne i kubi 25.

²²Ehame qâqâtâc kataŋ‐ticne â hae gâŋgâŋ‐ticne erâ hâmujâc hawari metâ bakicne jaŋe ʒoaŋ wewefunaopec motâcko domambiŋ irec sâc jaha. Ira riri otecne fofeme 7 ewec; hae gâŋgâŋ‐ticne ine sacmaŋko hae ʒoŋa maickehuc fowec.

²³Motâc faic mâreŋ maickerâ fowec i ʒoaŋ wewefunaopec fowec irec sâc, eme irec ŋifecne hae ʒoŋa piticnaopec motâc fowec ŋondeŋ i ma bame kubi 100 ewec.

²⁴Eme mâreŋ juwicpec jowacnume ira motâc moc mâreŋ juwicpec maickehuc fome honepo. Ehame wâtuŋ‐ticne â hae gâŋgâŋ‐ticnere sâc bame bâbâni jahere sâc jaha ewec.

²⁵Motâc â hae gâŋgâŋte qâqâtâc kataŋ rârec rârec forawec i motâc bâbâni jahere sâc jaha; ʒoricne‐ticnere sâc i kubi 50 â bembeŋne‐ticnere sâc i kubi 25.

²⁶Ehame riri otecne fofeme 7 ewec; hae gâŋgâŋ‐ticne ine sacmaŋko hae ʒoŋa maickehuc fowec. Wâtuŋ‐ticnao ine hâmujâc hawari ŋifec forawec.

²⁷Hae ʒoŋa piticnere motâc juwic mâreŋ maickerâ fowec. Eme ŋic e motâc irecnec hâcne sâc baraku sacmotâc mâreŋ juwicpec fowec ira batarame kubi 100 ewec.

²⁸Eme ʒuhuckerâ jowacnume hae ʒoŋa piticnere motâc juwic mâreŋ maickerâ fowec ira raʒipec. Ehuc motâc irec sâc bame motâc gâcne jaŋere sâc jaha ewec.

²⁹Eme irec maŋne ŋifec â ŋifec forawec â wâtuŋ‐ticne erâ hae gâŋgâŋ‐ticne i iŋuc jaha motâc gâcne jaŋere sâc jaha ewec. Erâ motâc mecne â hae gâŋgâŋ‐ticne mecne i qâqâtâc kataŋhec sasawa. Ʒoricne‐ticnere sâc i kubi 50 â bembeŋne‐ticnere sâc i kubi 25.

³⁰Eme hae gâŋgâŋ‐ticne rârec rârec forawec; ʒoricne‐ticnere sâc i kubi 25 â bembeŋne‐ticnere sâc i kubi 5.

³¹Hae gâŋgâŋ‐ticne i hae ʒoŋa sâko maickehuc fowec, â wâtuŋ‐ticnao hâmujâc hawari forawec; riri‐ticnere otecne ine fofeme 8 ewec.

³²Eme ʒuhuckerâ jowacnume hae ʒoŋa piticne ʒoaŋ wewefunaopec fowec ira rapec. Eme motâc kecirec sâc bame motâc gâcne jaŋere sâc jaha ewec.

³³Eme irec maŋne ŋifec â ŋifec forawec â wâtuŋ‐ticne erâ hae gâŋgâŋ‐ticne i iŋuc jaha motâc gâcne jaŋere sâc jaha ewec. Erâ motâc mecne â hae gâŋgâŋ‐ticne mecne i qâqâtâc kataŋhec sasawa. Ʒoricne‐ticnere sâc i kubi 50 â bembeŋne‐ticnere sâc i kubi 25.

³⁴Hae gâŋgâŋ‐ticne i hae ʒoŋa sâko maickehuc fowec; wâtuŋ‐ticnao hâmujâcte hawari forawec, riri‐ticnere otecne ine fofeme 8 ewec.

³⁵Izi mocwâc jowacnume faic mâreŋkopec motâc fowec irec sâc bame gâcne jaŋere sâc jaha ewec.

³⁶Eme irec maŋne ŋifec â ŋifec forawec â wâtuŋ‐ticne erâ hae gâŋgâŋ‐ticne i iŋuc jaha motâc gâcne jaŋere sâc jaha ewec. Erâ qâqâtâc kataŋ‐ticne râreckehuc forawec. Ʒoricne‐ticne i kubi 50 â bembeŋne‐ticne i kubi 25.

³⁷Hae gâŋgâŋ‐ticne i hae ʒoŋa sâko maickehuc fowec. Wâtuŋ‐ticnao ŋifec â ŋifec hâmujâcte hawari forawec; riri‐ticnere otecne ine fofeme 8 ewec.

³⁸Eme motâc moc irec hae gâŋgâŋnao fic maŋne moc fowec ira bâzi ririkere qowi ʒure jumbieŋ.

³⁹Eme bâzi ririkere qowi erâ sâqocne â kiŋ tatara bâzi irec qowi qa hezuc ejareniŋte motâcte hae gâŋgâŋko ŋifec â ŋifec tebo jajahec jajahec hecjopambiŋ.

⁴⁰Ehame hae gâŋgâŋ râpenao faic mâreŋkopec ŋifec tebo jajahec â ŋifec tebo jajahec iŋuc ŋerambiŋ.

⁴¹Ine hâcne tebo 4 jaŋe maŋnao ŋehapie tebo 4 jaŋe motâc râpenao ŋerambiŋ, tebo 8 ira hâcne bâzi ririkere qowi hezu jumbieŋ.

⁴²Erâ bâzi ririkere qânâzi tebo 4 fasaec‐jopakicne ŋembiŋ jaŋere sâc ʒiŋuc: Hâŋne‐jeŋic kubi 1 â nâfocne, erâ otecne‐jeŋic kubi 1 erâ nâfocne jaha, erâ ʒoricne‐jeŋic kubi 1 sasawa. Tebo ira qowi hehezure wâcwiac forawec.

⁴³Ficmaŋko ira ine rârec rârec ɋeɋetic wiac metapere sâc basanaŋke rakicne. Tebo fainao ine qowi biuc râe jumbieŋ.

⁴⁴Eme motâckonec jowacnume hae ʒoŋa piticnao raʒipec. Erâ ira domahuc fic maŋne jajahec honec‐jofapo. Fic maŋne moc i motâc faic mâreŋkopec fowec, irec heririŋnao ŋehuc juwic mâreŋ maickewec, â moc ine motâc juwic mâreŋkopec fowec irec heririŋko faic mâreŋ maickerâ ŋewec.

⁴⁵Eme eki ʒiŋuc nazawec: Fic maŋne juwic mâreŋ maickerâ ŋekac i taha ufuŋ soŋaŋkeeŋgopieŋ taha bapa i jaŋere biŋe.

⁴⁶Â fic maŋne faic mâreŋ maickerâ ŋekac i ine alatao gie baeŋgopieŋ taha bapa i jaŋere biŋe. Jaŋe Zadoko ere ŋokâfâc hâcne. Lewire ɋâricfâc jaŋeraonec ŋicguru i jaŋe hâcne Wofuŋ maickehuc kiŋaŋ qacneniŋte mana‐jarekicne.

⁴⁷Eme ŋic e hae ʒoŋa piticnere sâc rome hâŋne â otecnere sâc kubi 100 jaha ewec. Alatazi ine taha ufuŋ maickerâ ŋewec.

⁴⁸Eme mocwâc jowacnume taha ufuŋte hae gâŋgâŋko fisipec, fisirâ hae gâŋgâŋte wâtuŋ ŋifec â ŋifec jahere sâc bame kubi 5 jaha epic. Erâ motâc otecne‐ticnere sâc bame kubi 14 ewec, erâ motâc ŋifec â ŋifecnao sâpe fowec i sâc bame kubi 3 jaha epic.

⁴⁹Hae gâŋgâŋ ʒoricne‐ticnere sâc i kubi 20 â bembeŋne‐ticnere sâc i kubi 12. Ehame ririre otecne fofeme 10 ewec, erâ wâtuŋ qanaŋ mukicne jahere heririŋko wâtuŋ jajaheczi ŋifec â ŋifec domapic.