1BOEIPA ol te kai taengla ha pawk tih,
2Nang hlang capa Tyre ham rhahlung phueih pah laeh.
3Tyre te thui pah. Tuipuei khotlak kah khosa, khosa neh sanglak tom kah pilnam thimpom rhoek aw, ka Boeipa Yahovah loh he ni a thui. Tyre nang loh, “Kai tah sakthen boeih ni,” na ti.
4Tuipuei tuilung kah na thoh na khorhi loh na sakthen a soep sak.
5Namah ham te Senir lamkah hmaical neh na sak tih, na cungkui la saii ham te Lebanon lamkah lamphai thingphael ni boeih a loh uh.
6Bashan lamkah thingnu na lawngkaih la a saii uh tih, na longlaeng khaw Kittim sanglak lamkah ta-aw vueino ni a saii uh.
7Egypt lamkah rhaekva neh hnitang na hniyan la om. Hni thim te nang ham rholik la om tih Elishah sanglak lamkah daidi te na dakda la om.
8Sidon neh Arvad khosa rhoek te nang aka tinghil puei la om uh. Tyre nang kah hlangcueih rhoek te nang soah na sangphoboei la om uh.
9Gebal patong neh a hlangcueih khaw nang sokah na puut aka bing la om uh. Tuipuei sangpho boeih neh a sangphobibi rhoek khaw na thimpomhno dongah rhikhang ham nang taengah om uh.
10Persia, Lud neh Put na caem la om uh. Na caemtloek hlang rhoek loh nang dongah photling neh lumuek a bang uh tih na rhuepomnah te a paek uh.
11Arvad neh Helekh hlang rhoek loh na kaepvai kah na vongtung dongah, na rhaltoengim khuiah aka om Gammadim loh a photling te na vongtung dongah a bang uh tih a kaepvai ah na sakthen neh a soep sak.
12Boeirhaeng boeih neh cak khaw, thi khaw samphae neh kawnlawk khaw na kum dongah ah Tarshish loh nang taengah thimpom tih na kawn te a thung uh.
13Javan, Tubal neh Meshek loh nang taengah hlang kah hinglu neh thimpom uh tih na thimpomhno te rhohum hnopai neh a thung uh.
14Togarmah imkhui lamkah marhang neh marhang caem khaw, muli-marhang khaw na kawn neh a thung uh.
15Dedan hlang rhoek khaw nang taengah thimpom uh. Na kut dongkah hnoyoih neh sanglak tom loh maeh ki vueino khaw, rhining thing khaw na kutdoe la ham mael uh.
16Na bibi khaw a cung dongah Aram khaw nang taengah thimpom tih khocillung neh daidi khaw, rhaekva neh baibok khaw, maerhuhlung neh aithilung khaw na kawn neh a thung uh.
17Judah neh Israel khohmuen khaw nang taengah thimpom uh tih, Minnith cang neh cangtha khaw, khoitui neh situi, thingpi khaw na thimpomhno neh a thung uh.
18Na kutngo khaw cung tih Helbon misurtui neh tumul a bok dongkah boeirhaeng boeih khaw a khawk dongah Damasku khaw nang taengah thimpom coeng.
19Vedan neh Uzal lamkah Javan loh thi met te na kawn la ha khuen uh tih valaeng neh singkaek khaw na thimpomhno la a om sak.
20Dedan loh leng dongkah baidok himbai neh nang taengah thimpom coeng.
21Arabia neh amih Kedar khoboei boeih loh na kut dongah thimpom uh. A khuiah tuca neh tutal neh kikong neh uh nang taengah thimpom uh.
22Aka thimpom Sheba neh Raamah khaw nang taengah thimpom uh. Thenkoek botui boeih neh lung vang boeih khaw sui khaw na kawn la m'paek uh.
23Haran neh Kanneh neh Eden kah aka thimpom Sheba, Assyria neh Kilmad khaw na thimpom.
24Amih loh nang himbai then neh, hni-awn a thim, rhaekva neh, pangcik hniphaih rhuihet a hlin neh na hnoyoihhmuen ah a kuehluek la n'thimpom uh.
25Tarshish sangpho nang na thimpomhno yiin vaengah, na khawk coeng tih tuipuei tuilung ah muep n'thangpom.
26Nang aka kaih loh nang te tui len khuila m'pawk puei dae khothoeng yilh loh tuipuei tuilung ah nang n'rhek sak.
27Na boeirhaeng neh na kawn khaw, na thimpomhno, na sangphobibi neh na sangphoboei khaw, na puut aka bing neh na thimpomhno rhi aka khang khaw, namah khuikah na caemtloek hlang boeih khaw, na laklung kah na hlangping boeih khaw na cungkunah khohnin ah tah tuipuei tuilung ah cungku uh ni.
28Na sangphoboei kah pang ol ah na khocaak rhoek khaw hinghuen uh ni.
29Lawngkaih aka pom sangphobibi boeih khaw a sangpho lamloh suntla uh vetih tuipuei sangphoboei boeih khaw lan ah pai uh ni.
30Nang te a ol neh n'yaak sak uh vetih bungbung pang ni. Laipi a lu soah a phul vetih hmaiphu dongah bol uh ni.
31Nang kongah lungawng la kuet uh vetih tlamhni a yil uh ni. Hinglu kah khahing loh khahing rhaengsaelung neh nang soah rhap uh ni.
32Nang soah amih kah rhahlung rhaengsaenah a phueih uh vetih nang te, 'Tyre bang neh tuipuei tuilung ah aka rhawp bang he unim?' tila rhaengsae uh ni.
33Na kawn te tuipuei lamloh na khuen tih pilnam khaw muep cung sak. Na boeirhaeng kah cangpai, na thimpomhno neh diklai manghai na boei sak.
34Tuipuei loh na thimpomhno neh tui dung ah n'khah coeng tih na khui kah na hlangping khaw boeih cungku uh.
35Sanglak kah khosa boeih nang soah hal uh tih a manghai rhoek khaw hlithae kah a yawn bangla maelhmai tal uh.
36Mueirhih la na om dongah pilnam taengkah aka thimpom nang te n'hlip thil tih kumhal duela na phoe voel mahpawh,” a ti.
