1Wofuŋte dâŋ norao ʒuhuckerâ ʒiŋuc fuawec:
2“Ŋicte ɋâric, go soc hoŋkeekac hae irec dâŋ mutarazemec. Ehuc eebapa‐ticne mamakâcne i mutaniŋkecne‐fâretec fuŋne‐ticne mana tarazejec.
3Ehuc muzemec: Wofuŋ Anutuzi kecʒiŋuc mukac: Jei, hae e dameŋ‐ticne maickeocte jahaczia ŋicfâc‐ticne jaŋere soc hoŋkeekac â wâwânâŋhec eocte ɋâŋ qâqâtâc bâfuaekac.
4Go soc hoŋkehuc kiŋ huremeŋ, erâ ɋâŋ qâqâtâc bâfuahuc wâwânâŋhec emeŋ; iŋuc ehuc jara dameŋge mukicne i bâmbeŋkemeŋ hâcne. Eme no irec mupe ŋicne ŋicne mu âke sisic egarehapie mâreŋ sâc ira mu ruruc egareniŋmu.
5Ʒâŋe biŋege wâwânâŋ ecnekicnere â haege bâbâsifuczi fusucmarâ fokacte ŋic ʒorickonec â bembeŋkonec jaŋe mu âke sisic egareniŋmu hâcne.
6“Manaŋgopieŋ, Israe ŋic fekicne ŋondeŋ‐ŋeŋicko jueŋgopieŋ jaŋe tâpiri‐jeŋicko roweckehuc soc hoŋkeeŋgopieŋ.
7Neŋgoc mamacfâc‐ŋeŋic qaisoc‐jopaeŋgopieŋ â ŋic jabane hae‐ŋeŋicko jueŋgopieŋ jaŋe bâʒâic‐jopaeŋgopieŋ, erâ hozec bekâ jaŋe dope hutuŋ moc mi ejareeŋgopieŋ.
8Wiac‐nane bâtirikicne i qikiŋneeŋgopieŋ â sabata hombaŋ‐nane qâsuaeŋgopieŋ.
9Ŋondeŋ‐ŋeŋicko ŋic tucne jaŋe eeatuc ehuc soc hoŋkeeŋgopieŋ â tucne jaŋe tikitoŋko tiwâ bâzi nâ bac eeŋgopieŋ, erâ tucne jaŋe wiac sindaŋne gâcne eeŋgopieŋ.
10Ŋic guru moc jaŋe mamacfâc‐jeŋic jaŋere gec qoruc firuepie biuctac foeŋgopieŋ, â guru moc jaŋe ŋokac mosa dameŋ‐jeŋicko bâsâqorec‐jopaeŋgopieŋ.
11Moc e âgo‐ticnere ŋokac bâsâqoreekac, â moc e joŋao‐ticne bâsâqoreekac, eha moc e seŋ ʒocŋifec‐ticne bâsâqoreekac jaha.
12Ŋicfâc‐ŋeŋic gâcne jaŋe furi roniŋte erâ soc hoŋkeeŋgopieŋ. Ŋoŋe âgofâc‐ŋeŋic moneŋ hotâ jarembiŋ irec ʒare boc bafehuc bârisie‐ŋareniŋte ʒoɋac ejareeŋgopieŋ, ŋoŋe nore nikec‐ŋopawec hâcne. Wofuŋ Anutu nore dâŋ iŋuc.
13“Manaŋgopieŋ, moneŋ‐jeŋic kâŋgâc jowac rombiŋ, â ŋondeŋ‐ŋeŋicko soc hoŋkembiŋ irec erâ menane fotarie‐ŋarepemu.
14No ŋoŋehec dâŋgie bapemu dameŋ ira hâbi‐ŋeŋic sâcne foocmu, me meŋeŋic sâcne sanaŋkeocmu me? Wofuŋ noni hâcne mukopacte ejâmbâŋkepemu.
15No ŋicne ŋicne jaŋere ŋondeŋko bâtâtiec‐ŋopape mâreŋ sâc râwiŋ qârâwiŋ eniŋmu, iŋuc eŋarehuc wâwânâŋ‐ŋeŋic ʒure‐fârepemu.
16Ehame ŋoŋe ŋaŋacne kiŋte erâ ʒâŋe biŋe‐ŋeŋic ŋicne ŋicne jaŋere maio wawahane eocmu. Wiac iŋuc fua‐ŋareme no hâcne Wofuŋ jukopac i mana taraniŋmu.”
17Eme Wofuŋte dâŋ norao ʒiŋuc fuawec:
18“O ŋicte ɋâric, manakic, Israe kikefuŋ jaŋe nore maio jawa efârembiŋ, jaŋe ŋiczi aeŋ bâbâroŋ â bol â aeŋ erâ led ʒocko rike wosâc eeŋgopieŋ irec sâc ehuc siliwa jawane iŋucne embiŋ hâcne.
19Irec Wofuŋ Anutu no kecʒiŋuc mukopac: Manaŋgopieŋ, ŋoŋe sasawa jawa embiŋte no Jerusalem haeo qânusuc‐ŋopapemu.
20Ŋic jaŋe siliwa me aeŋ bâbâroŋ me aeŋ me bol ʒocko rikepie ʒahuc opâ eekac irec sâc jaha noni kimbeŋ aaric‐nanere ʒocko râec‐ŋopape ʒacŋopaha wosâeniŋmu.
21No Jerusalem haeo qâzuc‐ŋopahuc iŋuc hâcne eŋarepe wosâe‐fâreniŋmu.
22Ine hâcne siliwazi ʒocko ʒahuc opâ eekac irec sâc ŋoŋe ira wosâehuc, Wofuŋ noni hâcne kimbeŋ‐nane faic‐ŋeŋicko râepe fewec i mana taraniŋmu.”
23Eme Wofuŋte dâŋ norao ʒiŋuc fuawec:
24“O ŋicte ɋâric, go Jerusalem hae rune ʒiŋuc jazazemec: ‘Ŋoŋe nore kimbeŋ dameŋko hoezi mâreŋ ʒure bâgunuc moc mi ewec irec sâc eŋgopieŋ.’
25Manakic, ŋic fekicnefâc‐jeŋic jaŋe laioŋzi qowi kisuc qâsuckehuc owackeekac irec sâc, jaŋe ŋic jaŋere moneŋ mafa wiac‐jeŋic jowac roniŋte qâhâmoc‐jopambiŋ, iŋuc epie hae maŋnao hozec bocjaha fuambiŋ.
26Taha bapafâc‐jeŋic jaŋe sâcmutâc dâŋnane musifuckehuc wiac bâtirikicne i wâwânâŋ ecnembiŋ. Jaŋe wiac bâtirikicne â omane i mi bâtâc bacjofambiŋ, erâ wiac mamakâcne â ɋaɋacne irec fuŋne ŋic jaza qazuc wâc mi embiŋ, jaŋe sabata hombaŋ‐nane qâsuahuc Tiri rune no ʒaubac enarembiŋ.
27Fekicnefâc‐jeŋic jaŋe kâte qâtozi qowi jopa nâc ehuc soc hoŋkeeŋgopieŋ jaŋere sâc, jaŋe moneŋ mafa kâŋgâc jowac roniŋte ŋic sipiric‐jopambiŋ.
28Porofetefâc‐jeŋic jaŋe maŋko fuac â findaŋdâŋ burecne muhuc ŋic jaŋere sâqocne forârâŋnembiŋ. Ehuc Wofuŋ no dâŋ moc mi mufua‐jarehape sifu burec ehuc ʒiŋuc mumbiŋ: ‘Wofuŋzi dâŋ kecʒiŋuc mukac.’
29Mâreŋ irec ŋic jaŋe bâbâʒâic gie bahuc fiuc serereŋ embiŋ, jaŋe ŋic hapetac â qarâ suriŋne ro waha âte ejarembiŋ, ehuc ŋic jabane fuŋne tâmiricko bâʒâic‐jopambiŋ.
30Eme no hae i bâsirowezipore ŋeŋezic ŋic moc fuarâ sac bahuc nore maio sacfozic domaocte babasa gie bakupe moc mi fuawec.
31Irec no kimbeŋ aaric‐nane fai‐jeŋicko râepo; ehame kimbeŋ‐nanere ʒoczi ʒâtâmirec‐jopawec. No eebapa‐jeŋicte okacne bazu‐jarepo hâcne. Wofuŋ Anutu nore dâŋ iŋuc.”
