Eʒekie 21

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

¹Wofuŋte dâŋ norao ʒiŋuc fuawec:

²“Ŋicte ɋâric, go Jerusalem hae maickehuc tiri ufuŋte uŋsawaŋ dâŋ muzemec, erâ Israe mâreŋte findaŋdâŋ muzemec.

³Ehuc mâreŋ rune ʒiŋuc jazazemec: Wofuŋzi kecʒiŋuc mukac: Manakic, no râsi eŋarehuc ʒika‐nane becsahackonec unuckerâ ŋondeŋ‐ŋeŋicko ŋic tiŋne â hehesicne jopa‐fârepemu.

⁴No iŋuc eŋarepemure ʒika‐nane unuckerâ juwic mâreŋte ŋic mecne, â faic mâreŋte ŋic mecne mâmâc jopa‐fârepemu.

⁵Iŋuc ejarepe ŋic jaŋe sasawa ʒiŋuc mana taracnunʒepieŋ: Wofuŋ e becsahackonec ʒika unuckeweczi mocwâc mi esorieocmu.

⁶O ŋicte ɋâric, go irec hâcne kio huse ezemec, go ʒâic busâqoc sâko manahuc jaŋere maio kio mamakuc ezemec.

⁷Eme ‘Wemocte kio mamakuc ekomec,’ iŋuc wio‐garepie ʒiŋuc jazazemec: ‘No biŋedâŋ manapo irec, biŋedâŋ izi fârinehec eme maŋŋeŋic gâcke‐fâreha meŋeŋic ɋaŋa‐fâreocmu. Erâ hâbi‐ŋeŋic goroŋke‐fâreha dieŋ‐ŋeŋic ŋetara‐fâreocmu. Manaŋgopieŋ, biŋedâŋ i fârio qafâreocmu.’” Wofuŋ Anuture dâŋ iŋuc.

⁸Eme Wofuŋte dâŋ norao ʒiŋuc fuawec:

⁹“Ŋicte ɋâric, go findaŋdâŋ muhuc ʒiŋuc muc: Wofuŋzi kecʒiŋuc mukac: Ʒika i ʒâmukicne â wokemaŋ ruacnekicne.

¹⁰Ŋic jopazore ʒâmu taeŋkekicne, erâ bâricneocte manasuhuc wokemaŋ ruacnekicne hâcne! Irec wemocko bubiaŋ moc manazo? O ŋokâ‐nane, go bâbâtiŋte kâcbiŋ qaisocke‐fâremeŋ.

¹¹Irec ʒika i wokemaŋ ruacneniŋte biac râekicne, ʒika qaqa ŋic ere meo feocte biac ʒâmukicne â wokemaŋ ruacnekicne.

¹²O ŋicte ɋâric, ʒika izi ŋicfâc‐nane sipiric‐jopaocmu, ehuc Israe ŋic fekicne sasawa jaŋe ŋicfâc‐nane jaŋehec kimiziec‐jopaocmu wâc, irec kio wâuŋa ec. Go irec busâqoc manarâ mesahacge qânʒiŋkezemec.

¹³Eesâiczi maic‐ŋopakac, eme ŋoŋe sifu bâbâtiŋte kâcbiŋ qaisockepie eesâiczi sawa mâcne, wiac faic mukicne izi maic‐ŋopa‐fâreocmu hâcne.” Wofuŋ Anutu ere dâŋ iŋuc.

¹⁴“Ŋicte ɋâric, go findaŋdâŋ muc, ehuc me qatec ʒikazi arecne arecne gie bazejec; ʒika i ima sâko bapare ʒika, irec ŋic rârec‐jopahuc imac‐jopazejec.

¹⁵Eme maŋŋeŋic gâckeha ŋic bocjaha waha jopazejec. No ʒika izi sacmotâc‐jeŋic sâc ima bacjopaocte manacnepo. Jei, ʒika i bâricneocte ruacnekicne â sisipiric gie baocte ʒâmu taeŋkekicne.

¹⁶Fâreopec â qanaopec foc fotikic ehuc nâtâcnezejec.

¹⁷Eme no iŋuc jaha me qahuc juhape aaric‐nane tarazejec. Wofuŋ noni hâcne iŋuc mukopac.”

¹⁸Wofuŋte dâŋ norao harierâ ʒiŋuc fuawec:

¹⁹“Ŋicte ɋâric, go Babe ŋicwofuŋte ʒikazi wareocte hata jajahec bacjofazemec, ehame jahe mâmâc jaha mâreŋ mocjahaonec ware fisizepirec. Erâ hata haeopec fuŋkerâ rakacko ira hatare mumutâc ma âkendâŋnezemec.

²⁰Ʒikazi ŋifec Amoŋŋic jaŋere hae qizec Raba â ŋifec ine Juda mâreŋko â Jerusalem hae sanaŋko fisiocte iŋuc hâcne ezemec.

²¹Babe ŋicwofuŋ e hata sosohoc ekopirecko hatare fuŋne manaocte ɋâsâi qaocmu, ehuc tepe motec hehesac‐jopaocmu, â ɋâŋ qâqâtâc mu wioc ejarehuc qowi bugâpâcne honeocmu.

²²Eme mefârenao ɋâsâi irec seroŋ wiac foocmu izi Jerusalem hae maickerâ foocmu; e ira hâcne ojowa sâko qahuc aŋara heocte â sac ââke mârâŋ tuŋ râeocte â somâ bapare ʒae wiac â mâreŋ toŋne baocte wiac iŋuc fuaocmu.

²³Mâc Israe ŋic jaŋe ine mumupaŋ dâŋ sanaŋne mumbiŋte findaŋdâŋ irec manapie burecne ewec. Anutu eki ine kiŋjeŋicte manasuhuc râsi jaŋere meo feniŋte mutaraocmu.

²⁴“No Wofuŋ Anutuzi dâŋ kecʒiŋuc mukopac: Ŋoŋe fenarehuc eebapa hehesicnere manasu‐narembiŋ, â sâqocne‐ŋeŋic i eebapa‐ŋeŋicko fua taniŋkewec. Ŋoŋe juju‐ŋeŋic hehesicnere manasu‐narembiŋte râsi jaŋere meo fefâreniŋmu.

²⁵O Israe ŋic fekicne, miti tâmiric â ŋic sindaŋne gore dameŋ taraha bâbâtiŋzi maicgukac hâcne.

²⁶Wofuŋ Anutu no gore ʒiŋuc mukopac: Go du kakambu â eri hendiŋge hetarazemec; wiac ʒiŋuczia fokac i juku iŋucnea mi foocmu. Wiac waharâ fokac i juku bafaharezo, â wiac ferâ fokac i juku bawahazo.

²⁷No wiac ima samaki bape foha irec rune jâmbâŋ fuazejec; fuame wiac sasawa e râcne‐fârepemu.

²⁸“O ŋicte ɋâric, go findaŋdâŋ muhuc ʒiŋuc muzemec: Wofuŋ Anutuzi Amoŋŋic mu âke sisic‐jeŋicte manasuhuc ʒiŋuc mukac: Jei, ʒika i sisipiric gie baocte becsahackonec unuckekicne, erâ bâbâric iŋucne bâricneocte wokemaŋ ruacnekicne.

²⁹Ehame ŋic jaŋe maŋko fuac dâŋzi eatucguhuc findaŋdâŋ burecne gazambiŋ. Eme ʒika i ŋic miti tâmiric â sindaŋne bâbâtiŋ dameŋ‐jeŋic maickekacte jaŋere upeo feme taraocmu.

³⁰Irec ʒika i mocwâc fofo‐ticnao esoriec. Eme fuameŋ mâreŋ ira hâcne dâŋge mutarapemu.

³¹Ehuc no aaric‐nanere ʒoc i faigao ficnepe ʒaocmu, erâ ŋic sindaŋne sisipiric gie bajâmbâŋkeeŋgopieŋ jaŋere meo râecgupemu.

³²Go ʒocte biŋe ezemec, ehame socge i mâreŋgaoa wahazejec; eme ŋiczi go mocwâc mi manasucgunʒepieŋ. Wofuŋ noni hâcne iŋuc mukopac.”