Eʒekie 37

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

¹Wofuŋ e nohec juwecte Mâro‐ticnezi jowacnurâ wâneŋ ʒâʒâŋiŋko ŋicsiec fusucmarâ fowecko ira râecnuwec.

²Ehuc enareme ŋondeŋ‐jeŋicko rac warec ehuc ʒiŋuc hone‐fârepo: Jaŋe siec kereŋ seŋseŋnezi wâneŋ i sâcke‐fârerâ forambiŋ.

³Eme Wofuŋzi ʒiŋuc nazawec: “Ŋicte ɋâric, siec keci jaŋe jujuhec sâcne eniŋmu me?” Mume mupo: “O Wofuŋ Anutu, i goki mana‐fârekic.”

⁴Eme harierâ ʒiŋuc nazawec: “Go siec wiac keci jaŋe findaŋdâŋ jazahuc ʒiŋuc muzemec: O siec kereŋ seŋseŋne, ŋoŋe Wofuŋte dâŋ mananiŋ.

⁵Wofuŋ Anutu e siec ŋoŋe dâŋ ʒiŋuc ŋazakac hâcne: Manaŋgopieŋ, no Mâro ficne‐ŋarepe maŋŋeŋicko hume ɋârerâ juniŋmu.

⁶Eme no mupe rua â sahac biuchec ehapie Mâro ficne‐ŋarepe ɋârerâ junʒepieŋ, ehuc no hâcne Wofuŋ jukopac i mana taranʒepieŋ.”

⁷Eme mutâcne‐narekicne irec sâcko findaŋdâŋ mupo. Muhape izia mi siec jaŋe qiriŋ qarâ fânâŋkehuc iitic enʒepieŋ i!

⁸Eme no honec‐jopahape jaha rua â sahac biuchec efârembiŋ, mâc nokafe ine mi hembiŋ.

⁹Iŋuc fuame Wofuŋzi ʒiŋuc nazawec: “O ŋicte ɋâric, go nokafe e findaŋdâŋ âzâcnehuc ʒiŋuc muzemec: Wofuŋ Anutuzi kecʒiŋuc mukac: O nokafe, go mâreŋ faic â juwic erâ ŋifec â ŋifec irecnec fisirâ ŋic qâhâmoc‐jopakicne jaŋere maŋko hutec juju fua‐jarezejec.”

¹⁰Eme no mutâcne‐narewec irec sâc findaŋdâŋ mupe nokafe fisi raʒime juju fua‐jareme fahare domambiŋ. I ŋic guru sâkozi iŋuc embiŋ.

¹¹Eme Wofuŋzi dâŋ kecʒiŋuc nazawec: “Ŋicte ɋâric, siec wiac ʒi i Israe kikefuŋte sâc ekac. Manakic, jaŋe ʒiŋuc mueŋgopieŋ: ‘Siec wiac‐nâŋec i kereŋ seŋseŋke‐fârewec â woworic‐nâŋec i fârimâc efârewec, nâŋe ʒeŋgoma omae‐fârembeŋ.’

¹²Go irec hâcne findaŋdâŋ muhuc kecʒiŋuc jazazemec: Wofuŋ Anutuzi kecʒiŋuc mukac: O ŋicfâc‐nane, manaŋgopieŋ, no bâɋârec‐ŋopape ʒâŋeruŋkonec wefupie Israe mâreŋ‐ŋeŋicko râec‐ŋopapemu.

¹³O ŋicfâc‐nane, no bâɋârec‐ŋopape ʒâŋeruŋkonec wefurâ no hâcne Wofuŋ jukopac i mana taraniŋmu.

¹⁴Eme no Mâro‐nane maŋŋeŋicko râepe hume juju fua‐ŋareme ŋaŋacne hae mâreŋko râec‐ŋopapemu. Iŋuc fuame, Wofuŋ no hâcne irec findaŋdâŋ mupozi fârine bâfuakopac i mana taraniŋmu. Wofuŋ nore dâŋ iŋuc.”

¹⁵Wofuŋte dâŋ ʒuhuckerâ norao ʒiŋuc fuawec:

¹⁶“Ŋicte ɋâric, go huti moc rorâ fainao ʒiŋuc qâreŋkec: Juda â Israe ŋic mamaŋ eeŋgopieŋ jaŋere biŋe. Iŋuc erâ huti moc rorâ fainao ʒiŋuc qâreŋkec: Josefe (Eferaim ŋic jaŋere huti hâcne) â Israe ŋic mamaŋ eeŋgopieŋ jaŋere biŋe.

¹⁷Erâ go ʒuhucke itic etecne huti jajaheczi mocjaha erâ megao fozejec.

¹⁸Ehame ŋicfâcge jaŋe ʒiŋuc wio‐gareniŋmu: ‘Go wiac keci irec fuŋne sâcne mi nâzâcmu me?’

¹⁹Iŋuc wio‐garepie ʒiŋuc jazazemec: Wofuŋ Anutuzi kecʒiŋuc mukac: Manaŋgopieŋ, no Josefe â Israe ŋic mamaŋ eeŋgopieŋ jaŋere huti (Eferaim ŋic jaŋere meo fokac i) â Judare huti jahe ʒuhuc‐jofape jajaheczi menaneo huti mocjaha ezepirec.

²⁰Eme huti qâreŋkecmu i hâcne ʒâŋe fai‐jeŋicko megao fozejec.

²¹Ehame ŋic ʒiŋuc jazazemec: Wofuŋ Anutuzi kecʒiŋuc mukac: Manaŋgopieŋ, no Israe ŋicguru ŋicne ŋicne jaŋere ŋondeŋko jueŋgopieŋ irecnec qânusuc‐joparâ jaŋe jaŋacne mâreŋko bârisiec‐jopapemu.

²²No Israe tiki mâreŋko qânusuc‐jopape ŋicguru mocjaha erâ junʒepieŋ; ehame ŋicwofuŋ mocjahazi soŋaŋ‐jopazejec. Jaŋe guru jajahec erâ mocwâc mi junʒepieŋ, erâ ŋicwofuŋ jajaheczi mocwâc mi jujarezepirec.

²³Jaŋe ɋâŋ qâqâtâc bajuhuc me wiac mamakâcne â qaqatara i ebac ehuc maŋ sahac‐jeŋic mocwâc mi hegâpârenʒepieŋ; ehame no hata qâsoriembiŋkonec rocjoparâ ʒure ɋaɋac‐jopapemu. Eme jaŋe ŋicfâc‐nane erâ juhapie no Anutu‐jeŋic jupemu.

²⁴“Kiŋaŋŋic‐nane Dawidi eki ŋicwofuŋ jujarehuc soŋaŋ‐jeŋic mocsâkoa erâ juzejec, ehame jaŋe dâŋsanaŋ‐nane bâjâpehuc mumutâc dâŋnane mana rereŋ enʒepieŋ.

²⁵No kiŋaŋŋic‐nane Jakobo mâreŋ râcnepe mamacfâc‐ŋeŋic ŋec juc embiŋ mâreŋ ira hâcne junʒepieŋ. Jaŋe jaŋacne â ɋâricfâc‐jeŋic jaŋe mâreŋ ira mimiŋzi ɋâric juraʒihuc junʒepieŋ, ehame kiŋaŋŋic‐nane Dawidi eki fekicne‐jeŋic erâ juhuc juzejec.

²⁶Eme no jaŋehec wamao jujure ʒâʒâfic fofo sanaŋ moc epemu, ehuc jambuŋ‐jopape sawe mâririackehapie ŋondeŋ‐jeŋicko tiri ufuŋ‐nane râepe ŋesanaŋkezejec.

²⁷Ehame no ŋondeŋ‐jeŋicko ŋeŋe juju epemu, ehuc Anutu‐jeŋic juhape jaŋe ŋicfâc‐nane erâ junʒepieŋ.

²⁸Eme tiri ufuŋ‐nane ŋondeŋ‐jeŋicko ŋesanaŋkeha ŋicne ŋicne jaŋe, Wofuŋ noni hâcne Israe ŋic jaŋe nore biŋe erâ juniŋte bâtiric‐jopakopac i mana taranʒepieŋ.”