1Eme eki ʒiŋuc nazawec: “Ŋicte ɋâric, go maigao wiac fokac i nâzemec, papia foforiekicne ʒi hâcne nârâ ra Israe ŋic jaŋe dâŋ jazazemec.”
2Iŋuc mume micnane aŋkepe papia nâpemurâ narewec.
3Ehuc ʒuhuckerâ ʒiŋuc nazawec: “Ŋicte ɋâric, go papia i nârâ gapecguzejec.” Iŋuc mume nâpo; eme micnaneo baŋac iŋucne aŋacnehec ewec.
4Eme ʒiŋuc nazawec: “Ŋicte ɋâric, go Israe kikefuŋ jaŋerao rarâ dâŋnane jazazemec.
5Go ŋicguru dâŋmarac‐jeŋic furune â ŋemâcne jaŋerao mâcne, Israe kikefuŋ jaŋerao sorecgukopac hâcne.
6Manakic, no ŋicguru bocjaha dâŋmarac‐jeŋic furune â ŋemâcne, erâ goki mi mamana tarane iŋucne jaŋerao mi sorecgukopac. Iŋucne jaŋerao sorecgupe muzac dâŋge mananʒapiŋ.
7Israe kikefuŋ jaŋe nore dâŋ mi manaeŋgopieŋte gore dâŋ wâc mi mananiŋmu, jaŋe ŋic repicne â maŋrâŋgeŋhec irec.
8Manakic, jaŋe ŋifec maŋsanaŋ â maŋrâŋgeŋ eŋgopieŋte go ŋifec iŋuc jaha ecmurâ basanaŋgupo.
9Go qânâ furi sâkozi sanaŋ qaŋqaŋne irec sâc ecmurâ basanaŋgupo, irec râsi ʒâŋe honecgupie mi hâwicguzejec, jaŋe kikefuŋ qaqatarahec hâcne.”
10Erâ ʒuhuckerâ ʒiŋuc nazawec: “Ŋicte ɋâric, go dâŋ sasawa gazakopac i mana maŋ ezemec.
11Ehuc Judaŋic qomâfâcge kâpâcwâru ficko ŋeŋgopieŋ jaŋerao razemec. Eme jaŋe mananiŋmu me qikiŋneniŋmu, go sifu ʒiŋuc jazazemec: ‘Dâŋ ŋazakopac i Wofuŋ Anuture dâŋ.’”
12Dâŋ iŋuc mume tarame Mârozi baafecnuwac. Ehame Wofuŋte huriri qâreŋzi faharerâ feme râpefuŋ‐naneo fânâŋ sâko moc fuame manapo.
13Wiac jujune jaŋere fafakeczi bâbâfuac embiŋ â ʒafeŋgâŋ jaŋe heririŋ‐jeŋicko gasackepie fânâŋ sâko iŋucne fuawec hâcne.
14Mârozi baafecnuhuc jowa qataŋ enareme rapo. Ehuc Wofuŋte mezi bâmâcnuhuc esocnume buʒâic faio rapo hâcne.
15Raku kâpâcwâru ŋic Kebara opâo Telabibi hae jumbiŋ jaŋerao fisipo. Ehuc nânâŋguŋne enareme jaŋere ŋondeŋko ʒoaŋ gie bapa 7 dâŋemâc jupo.
16Eme ʒoaŋ gie bapa 7 i tarame Wofuŋte dâŋ kecʒiŋuc fua‐narewec:
17“Ŋicte ɋâric go manac, no Israe kikefuŋ jaŋere ruc bapa ŋic râecgukopac; irec go nore mickonec dâŋ manacmu sâc nore micte erâ hazec qâuŋ jazahuc juzemec.
18No ŋic hehesicne ʒiŋuc âzâcnepemu: ‘Go hâmo‐jâmbâŋkecmu,’ dâŋ iŋuc âzâcnepe go uŋdâŋ mi âzâcnecmuo â hata‐ticne hehesicnaonec risierâ juju‐ticne asao roocte mi esockecmuo ine ŋic e sâqocne‐ticnehec hâmome ere kiŋzi gore faio feocmu.
19Mâc ŋic hehesicne e uŋ sawaŋ ecne‐bipiehaŋ sifu hata‐ticne hehesicne â sindaŋ‐ticne mi beherâ juku sâqocne‐ticnere okacne hâmoocmu, goki ine jujuge asao rokomecte jucmu.
20Erâ ŋic tiŋne moc e tiŋne juju‐ticne râpeckerâ sâqocne bame no hata‐ticnao oc hecnepe âke hâmoocmu, ine goki uŋdâŋ mi âzâcnemecte sâqocne‐ticnere okacne hâmoocmu hâcne, juwicnao wiac biaŋne ewec irec mi muzo, eme honepe goki qakomec ekacte ere kiŋzi gore faio feocmu.
21Me ŋic e sâqocne mi baocte uŋ sawaŋ ecnetec dâŋge mana ʒakierâ sâqocne mi baocmuo ine jujâmbâŋkeocmu, ehame go wâc jujuge asao rokomecte jucmu.”
22Eme no ira juhape Wofuŋ e meticnezi basanaŋnuhuc dâŋ kecʒiŋuc nazawec: “Ajoc, go faharerâ wâneŋko rac, eme no ira dâŋ gazapemu.”
23Iŋuc nazame faharerâ wâneŋko rapo; rarâ mi Wofuŋte huriri qâreŋ Kebara opâo honepo iŋucnea fuame honezepac i! Honerâ mâreŋko hetutuckerâ fopo.
24Ehame Mârozi maŋnaneo hurâ baafecnume fahare domapo, eme ʒiŋuc muhuc nazawec: “Go ficgao ferâ motâc ki barâ ŋezemec.
25O ŋicte qâric, manakic, jaŋe niŋgiŋguhuc muczi basanaŋgupie ŋic jaŋere ŋondeŋko sâcne hurâ mi jucmu.
26Jaŋe kikefuŋ qaqatarahec juŋgopieŋte no nameŋge ŋaŋaracgao bohotape nâŋguŋ erâ uŋdâŋ mocwâc mi jazazemec.
27Mâc no gohec dâŋehuc micge baafeckepe dâŋ ʒiŋuc fuŋkerâ jazazemec, ‘Wofuŋ Anutuzi ʒiŋuc mukac.’ Eme moc e dâŋ i manazo murâ manazejec â moc e qikiŋnezo murâ qikiŋnezejec; jaŋe kikefuŋ qaqatarahec hâcne.
