Zakali 2

1

2

3

4

5

6

7

8

9

10

11

12

13

14

¹Gè ɠaazuwuzeɠeni, gè minɛ naanigɔ ɠaani kulakɛlɛmai taɠili su.

²Gè ɠɛni geezuɠeelai ma, é ɠɛni ɓɔɛzu pɔ̀: «Minɛi niiti ta ga leeni?» É gòoɠaaʋoteni, é ɠɛ mà: «Minɛi niiti ka ti Zuda zuvazagai, naa ʋɛɛ Izelayɛle ta Zeeluzalɛme ʋa.»

³Ɠɔoɠɔ GALAGI ɠain bo nu naanigɔ lɛɛni ga ze.

⁴Gè ɠɛni ma: «Leeni ɠa ti ʋaazu kɛɛzu?» É gòoɠaaʋoteni, é ɠɛ mà: «Ɠain bo nui niiti paaʋɛ ga ti zii ɠiligi naati kpɔlɔ, ti ti-minɛiti suɠale, tɛigiti ti-minɛiti buzeɠeai Zuda yooi laalɔɠɔma ga ti su nuɓusɛiti suvaza. Minɛiti ka ti Zuda ta Zeeluzalɛme nuɓusɛiti suvazagai ga kɛʋele ɲɔu, nu nɔpɛ ge la mɔ ɠɛa zoosu unbuzeɠezu.»

⁵Gè ɠaazuwuzeɠeni, gè zunu ɠila ka, kɔɠɔ galui zoni zea.

⁶Gè ɠɛ ma: «Mini ɠa è liizu ná?» É ɠɛ mà: «Nà liizu Zeeluzalɛme ɠɔɠɔsu, gè sakpai, ta kogi ɠwɛɛ.»

⁷Geezuɠeelai nii é ɠɛni ɓɔɛzu pɔ̀, naa maaɓuɠani geezuɠeelai taɠili ba, nii é ɠɛni daaɠomisu.

⁸É ɠɛni naa ma: «Ɓizɛ, è ɓɔɛ zunu loungoi nu ʋɔ, è ɠɛ ma: ‹Zeeluzalɛme ɠa ɠɛɛzu ga taai, siɠi nɔpɛ ge la mɔ ɠɛa ma, tɔɔzei nuɓusɛiti ta toganiiti mɔin ʋelei ʋa, niiti ti ɠɛɛzu ná.›

⁹Ɠɔoɠɔ GALAGI wooi ɠana: ‹Nà ɓɔɠɔi ɠa gè ɠɛɛzu maaɠoolii zu eɠɛ abu ziɠigi, gè ɠɛ ma taazuʋɛ ga ná-lɛbiyai.› »

¹⁰Ee! Ee! À ʋela! Wo ɠula lɛkpɛma ʋelei nu ɠɔʋɛzuʋɛ yooi tɛi ba ga suvilɛ! Ɠɔoɠɔ GALAGI wooi ɠana. Mazɔlɔɔ gè wo zuvazagɛ geeɠɔlɔgi wu ʋepema naanigɔi pɛ, Ɠɔoɠɔ GALAGI wooi ɠana.

¹¹Ee, Siyɔn nuɓusɛiti, à ʋela, wɔi wo zeini Ɓaɓilɔne taazuʋɛ.

¹²Mazɔlɔɔ Ɠɔoɠɔ GALAGI Fai-Pɛ-Maliɠii wooi ɠaa: Tɛigi é tèʋegai ga ná-zobogi, zooi naati daalɔɠɔma niiti ti loai wo ma, é ɠɛ ma: «Zɔi nɔpɛ é vɔɔɠuzu wo ʋa, naama nui vɔɔɠua gàazuleegi ʋa.

¹³Wɛlɛ, nà yeewuzeɠezu zooi naati daalɔɠɔma, ta latisu ti ɠɛ ga ta-luɔiti zeezu ani.» Wa kwɛɛ naazu ga Ɠɔoɠɔ GALAGI Fai-Pɛ-Maliɠii tèʋegɛ.

¹⁴«Wa ʋe de, Siyɔn nuɓusɛiti, à ɠoozunɛ! Wo wooɠula ga koozunɛɛi, mazɔlɔɔ nà ga ʋa gè zei wo zaama, Ɠɔoɠɔ GALAGI wooi ɠana.

¹⁵Naama volo ná, zii ɠiligi ma mɔinmɔin ka ʋa, ti ɠili Ɠɔoɠɔ GALAGI ʋa. Ta ɠɛ ga nà-nuɓusɛiti, nà zei wo zaama.» Wa kwɛɛ naazu ga Ɠɔoɠɔ GALAGI Fai-Pɛ-Maliɠii ɠa é tèʋegai wo ma.

¹⁶Ɠɔoɠɔ GALAGI ɠa Zuda zeɠe ʋolu ga nɔnɔi, zou ɲadegai zu. É yiimazeɠe ʋolu ga Zeeluzalɛme.

¹⁷Eteai pɛ ge maaɠɛ kpɔ mu Ɠɔoɠɔ GALAGI ɠaazu! Mazɔlɔɔ toɠa na ɠula ga suvilɛ sei ʋɛlɛ ɲadegai wu.