Ʒekaria 2

1

2

3

4

5

6

7

8

9

10

11

12

13

14

¹Eme no ʒâŋe fipe feme mi ŋic moczi mucsâc badomahame honezepac i!

²Iŋuc honerâ mupo: “Go wena rakomec?” Eme eki ʒiŋuc nazawec: “No Jerusalem haeo mucsâc fârehuc hâŋne â otecnere fuŋne manapemurâ rakopac.”

³Eme aŋelo nohec dâŋewec e mai fuarâ domaha aŋelo moczi fuacnerâ ʒiŋuc âzâcnewec:

⁴“Ajoc, go ŋicmotec erao gasacke rarâ ʒiŋuc âzâcnec: ‘Jerusalem maŋnao ŋic â qowi bocjaha juŋgopieŋte hae i sac tâmiric ŋezejec.

⁵Ehame no nahac ʒoc iŋucne sac erâ râreckepemu, erâ ŋondeŋ‐jeŋicko juhuc tatamac‐nanezi batamaec‐jopapemu, Wofuŋte dâŋ iŋuc.’”

⁶Wofuŋzi ʒiŋuc mukac: “Ajoc, ŋoŋe faic mâreŋkonec risieniŋ, noni hâcne mâreŋ tuturuŋne 4 ira bâtâtiec‐ŋopapo”; Wofuŋte dâŋ iŋuc.

⁷Ajoc, Babe mâreŋko juŋgopieŋ ŋoŋe risierâ Zioŋko wareniŋ.

⁸Anutu Tâpiri Ɋuŋɋasaŋ Wofuŋ e ŋicne ŋicne jaŋe wiac ŋowac rofârembiŋ jaŋerao sorecnuhuc kecʒiŋuc muwec: “Moc e ba bâuac eŋareocmuzi bunaneo baocmu hâcne.

⁹Manaŋgopieŋ, no râsi ejarehuc jopapemu, eme kiŋaŋ qaqafâc‐jeŋic jaŋere meo feniŋmu. Iŋuc fuame ŋoŋe nore ʒiŋuc mana taranʒepieŋ: Anutu Tâpiri Ɋuŋɋasaŋ Wofuŋ eki sorewec.

¹⁰O Zioŋte otâ, go ʒeri bari ec! Manakic, no fârâ gore ŋondeŋko ŋeŋe juju epemu, Wofuŋzi iŋuc mukac.

¹¹Iŋuc fuame ŋicguru bocjaha jaŋe dameŋ ira Wofuŋ norao qohotahuc ŋicfâc‐nane erâ juhapie no ŋondeŋ‐ŋeŋicko ŋeŋe juju epemu.

¹²Eme ŋoŋe porofete nore ʒiŋuc mana taranʒepieŋ, Anutu Tâpiri Ɋuŋɋasaŋ Wofuŋ eki soreme nâŋerao warekac. Eme Wofuŋ e Judaŋic tiri mâreŋ ira fuŋfuŋfâc‐ticne bacjopahuc Jerusalem hae mocwâc bâwosâeocmu.”

¹³Wofuŋ e tiri ufuŋ‐ticnaonec faharerâ wahakacte ŋicne ŋicne jaŋe ere maio niniŋke‐fârenʒepieŋ.