Sɑkɑri 2

1

2

3

4

5

6

7

8

9

10

11

12

13

14

¹Sɑkɑri u nɔni seeyɑ mɑ u mɑɑ kɔbi nnɛ wɑ.

²Mɑ u gɔrɑdo wi u kɑ nùn gɑri mɔ̀ bikiɑ u nɛɛ, kɔbi yirɑ̀ mini. Mɑ u nùn wisɑ u nɛɛ, kɔbi yi yi Yudɑbɑ kɑ Isirelibɑ kɑ Yerusɑlɛmugibu yɑrinɑsiɑwɑ mi.

³Yen biru, Yinni Gusunɔ u mɑɑ nùn sekobu nnɛ sɔ̃ɔsi.

⁴Mɑ u nùn bikiɑ u nɛɛ, mbɑ seko be, bɑ kobu nɑ. Mɑ u nùn wisɑ u nɛɛ, bɑ nɑwɑ bu kɑ kɔbi yi tɔ̃yɑ ko, kpɑ bu yi bɔɔku yi, yi yi Yudɑn tem wɔri yi mɛn tɔmbu yɑrinɑsiɑ sere ben goo kun kpĩɑ u kɑ tii yinɑ.

⁵Ye Sɑkɑri u mɑɑ mɛɛrɑ, yerɑ u durɔ goo wɑ u wɛ̃ɛ yĩirutii nɛni.

⁶Mɑ u nùn bikiɑ u nɛɛ, mɑnɑ ɑ dɔɔ. Mɑ u wisɑ u nɛɛ, nɑ dɔɔwɑ n Yerusɑlɛmu yĩire n kɑ yen dɛ̃ɛbu kɑ yen yɑsum wɑ.

⁷Sɑnɑm mɛ Gusunɔn gɔrɑdo wi u kɑ nùn gɑri mɔ̀, u susim wee, yerɑ gɔrɑdo goo u mɑɑ nɑ u kɑ wiɔnɔ yinnɑ.

⁸Mɑ u nùn sɔ̃ɔwɑ u nɛɛ, ɑ dukɑ doo ɑ ɑluwɑɑsi wi sɔ̃ ɑ nɛɛ, Yerusɑlɛmu yɑ koo ko wuu gè bɑ ǹ mɑɑ gbɑ̃rɑru toosimɔ. Domi gen tɔmbu kɑ gen yɑɑ sɑbenu koo dɑbiɑ.

⁹Yinni Gusunɔ u mɑɑ nɛɛ, u ko n sɑ̃ɑ nge gbɑ̃rɑ dɔ̃ɔgiru Yerusɑlɛmu yen sɔ̃. Mɛyɑ u ko n mɑɑ sɑ̃ɑ yen bɛɛrɛ.

¹⁰Sɑkɑri u nɛɛ, Yinni Gusunɔ u geruɑ u nɛɛ, bɛɛ be u rɑɑ yɑrinɑsiɑ hɑnduniɑn goonu nnɛ ye sɔɔ, i wurɑmɑ. I seemɑ i wurɑmɑ sɑɑ sɔ̃ɔ yɛ̃sɑn nɔm geu giɑn di.

¹¹Bɛɛ Yerusɑlɛmugibu, bɛɛ be i yoru dimɔ Bɑbiloniɔ, i kisirɑmɑ.

¹²Domi wi, Gusunɔ wɔllu kɑ tem Yinni u nɛɛ, yenibɑn biru, Yerusɑlɛmun bɛɛrɛ yɑ koo wurɑmɑ. Wee u mɑn gɔriɔ bwese ni nu bɛɛn yɑ̃nu gurɑn mi. U nɛɛ, nù n mɑɑ bɛɛ bɑbɑ, yɑ sɑ̃ɑwɑ nge win tiin nɔniyɑ nu bɑbɑ.

¹³Wee u koo nu nɔmɑ doke kpɑ nu gɔsiɑ bɛɛn yobu. Sɑɑ ye sɔɔrɑ nu koo giɑ mɑ Gusunɔ, wɔllu kɑ tem Yinniwɑ u mɑn gɔrimɑ.

¹⁴Wiyɑ u nɛɛ, bɛɛ Yerusɑlɛmugibu, i nuku dobun kuuki koowo. Domi u koo nɑ u n kɑ bɛɛ wɑ̃ɑ.

¹⁵Bwese dɑbinɑ nu koo wurɑ wi, Yinni Gusunɔn mi giɑ yen tɔ̃ɔ te, kpɑ nu ko win tɔmbu, kpɑ u n wɑ̃ɑ kɑ be. Sɑɑ ye sɔɔrɑ i ko i giɑ mɑ wi, Gusunɔ wɔllu kɑ tem Yinniwɑ u mɑn gɔrimɑ.

¹⁶U ko n mɑɑ Yudɑ mɔ tem dɛɛrɑm mɛ sɔɔ. U koo mɑɑ Yerusɑlɛmu gɔsi.

¹⁷Bɑɑwure u koo nɔɔ mɑri Yinni Gusunɔn wuswɑɑɔ. Domi u koo seemɑ win wɑ̃ɑ yee dɛɛrɑrun di.