1Tomuren e biney me mel’eg Somol yugu boch e girdi’ ni medlip i ragag nge l’agruw i pumo’on me l’oegrad ngranod ni yad lal’agruw, ni ngar m’onod rok ngranod ngalan urngin e binaw nge yungi n’en ni be n’en ni nge yan ngay.
2Me ga’ar ngorad, “Woldug e ba ga’ ni ba ga’ yang, machane pi’in girdi’en e maruwel ni nge kunuy nge tay nga naun e ba lich. Ere mmeybilgad ngak e en ni ir e suwon e woldug ngki pi’ boch girdi’en e maruwel ngar muruwliyed e re woldug rok nem nge af nga naun.
3Mmarod! Ya kug gol’oegmed ni ngam marod ni bod rogon pifak e saf ni yan nga fithik’ e wolf.
4Dab mu feked tafen e salpiy, ara tutuw nma fek e pi’in nma man ban’en, ara sus; ma dab mu talgad ni ngam fingichiyed be’ u daken e kanawo’.
5Ma ngiyal’ ni gimed ra yan riy ngalan reb e naun, e som’on e nge lungumed, Nge yib e gapas ngak girdi’en e re naun ney.
6Ya fa’anra bay be’ riy nib t’uf e gapas rok, mi gimed pag e gapas ni kamogned nge par u daken; ma fa’anra dariy, mi gimed fulweg murung’agen e gapas ni kamogned.
7Mi gimed par u lan e re naun nem, ngu’um ked e ggan ma gimed be garbod ko tin ni yad be pi’ ngomed; ya be’ ni girdi’en e maruwel e susun e ngan pi’ puluwon e maruwel rok ngak. Dab um marod u reb e tabinaw nga reb.
8Fa’an gimed ra yan ngalan reb e binaw ni yi ba’adag ni ngan ayuwegmed riy, mi gimed kay e tin ni kan tay nga p’eowchemed ni ngam ked,
9mi gimed golnag e pi’in nib m’ar u lan e re binaw nem, me lungumed ngak e girdi’ riy, Gagiyeg rok Got e ba chugur ngomed.
10Machane fa’an gimed ra yan nga reb e binaw ndabun e girdi’ riy ni kam marod ngay, mi gimed yan nga daken e kanawo’ riy me lungumed,
11Mus ko fiyath ko re binaw romed ney nike gabal ko rifrif u aymad e nggu chuweged nib togopluw ngomed; machane mu ted fanmediyan ko re bugithin ney, ni Gagiyeg rok Got e ba chugur ngomed!
12Nggog ngomed ni Chirofen nra pufthinnag Got e girdi’ riy e ka ba ga’ e runguy nra tay ngak yu Sodom ko runguy nra tay ngak e re binaw nem!”
13“Rib ga’ ba gafgow ni bay mu ted yu Korazin! Rib ga’ ba gafgow ni bay kum ted yu Bethsaida! Ya fapi maang’ang ni kan ngongliy u wur e fa’an mang e ni ngongliy u lan yu Tyre nge yu Sidon, ma girdi’ riy e kafram e kar pired nga but’ ka ron’ed e tutuw ni mad ma kar thiygad ko awat ni nge mang pow riy ni kar pi’ed keru’rad ko denen ni yad be ngongliy!
14Ka ba ga’ e runguy nra tay Got ngak yu Tyre nge yu Sidon ko runguy nra tay ngomed ko Chirofen nra pufthinnag e girdi’ riy.
15Me gur yu Kapernaum! E ga ba’adag ni ngam tolang nigem ngam tun ko tharmiy? Bay non’em nga but’ nga fithik’ e nifiy ni dabi math bi’id!”
16Me ga’ar ngak pi gachalpen, “En nra motoyil ngomed, e ke motoyil ngog; ma en nra dabuymed e ke dabuyeg; ma en nra dabuyeg e ke dabuy e cha’ ni ir e ke l’oegeg ku gub.”
17Me sul fa medlip i ragag nge l’agruw i girdi’ ngak ni kar felan’gad me lungurad, “Somol, i mus ko pi mo’onyan’ miyad fol romad ni fa’ani gogned ngorad u fithingam e tin ni ngar rin’ed!”
18Me fulweg Jesus ngorad ni ga’ar, “Kug guy Satan nike mul u lanelang ni bod e uluch.
19Mu telmed! Kug pi’ mat’awmed nge gelngimed, ni fan e nge yag ni umot’ed e porchoyog nge skorpion mi gimed gel nga gelngin fa’anem ni ir e To’ogor, ma dariy ban’en nra maad’ad ngomed.
20Dabi felan’med ni fan e be fol e pi mo’onyan’ romed; machane nge felan’med ni fan e kan yoloy fithingmed nga babyor u tharmiy.”
21Ma ku errogon e re ngiyal’nem ni suguy e Kan Nthothup Jesus ko felfelan’ me ga’ar, “Chitamag ni gur e Somol u tharmiy ngu but’! Kari mmagaer ya kam dag ngak e pi’in ndar sukulgad e n’en ni kam mithag rok e pi’in yad ba llowan’ nge pi’in yad ba sukul. Chitamag, i gur e mu turguy ni nge yodoro’ nrogon nib m’agan’um ngay.
22“Chitamag e ke pi’ urngin ban’en ngog. Dariy be’ ni manang ko mini’ e en ni Fak, ya kemus ni en ni Chitamangiy e manang, ma dariy be’ ni manang ko mini’ e en ni Chitamangiy, ya kemus ni en ni Fak e manang, nge pi’in ba’adag e en ni Fak nem ni ngar nanged e Chitamngin.”
23Me cheal Jesus nge sap ngak pi gachalpen me non ngorad nde rung’ag be’ ni ga’ar, “Kari mfelan’gad ni kam guyed e pin’en ni kam guyed!
24Ya nggog ngomed ni bo’or e profet nge pilung ni ur m’ad ni bochan ni ngar guyed e n’en ni gimed be guy, machane de yag, ma ku ur m’ad ni bochan ni ngar rung’aged e n’en ni gimed be rung’ag, machane dar rung’aged.”
25Me yib be’ ni ir reb e tamchib ko Motochiyel ngak Jesus me guy rogon ni nge ning e kanawo’ ngak Jesus ko thin. Me fith ni ga’ar, “Tamchib, mang e thingar gu rin’ me yag ngog e yafos ndariy n’umngin nap’an?”
26Me fulweg Jesus ngak ni ga’ar, “Mang e keyog e babyor nib thothup? Bu uw rogon ni kam be’eg?”
27Me fulweg fare mo’on ni ga’ar, “Thangri t’uf rom Somol ni ir e Got rom u polo’ i gum’ircha’em, ngu polo’ i lanin’um, ngu polo’ i gelngim, ngu polo’ i leam rom; ma gin’en ni ga bay riy e thangri t’uf rom e en ni ir e mmigid ngom ni gowe gur.”
28Me fulweg Jesus ni ga’ar, “Tin ni kam fulweg ngog e ba puluw; ere mu rin’ ma ga fos.”
29Machane fare tamchib ko Motochiyel e ba’adag ni nge yan i par ni ir be’ nib mat’aw, ma aram me fith ngak Jesus ni ga’ar, “Mini’ e en ni ir e mmigid ngog?”
30Me fulweg Jesus ni ga’ar, “Be’ nib mo’on e log u Jerusalem i yan nga Jeriko, me yib i og bogi moro’ro’ ngak ngar lufed e mad rok, miyad pirdi’iy, nge mu’ miyad pag nike chugur ni nge yim’.
31Ma bay ba prist ni be yan nga pe’ning u daken e re pa’ i kanawo’ nem; ma fa’ani guy fare mo’on me liyeg rok u baraba’ e kanawo’ nge yan.
32Ma ku aram rogon be’ ni ir reb e Levite ni ki yib ko gin’em, me yan ko gin ni bay fare mo’on riy nge yan i guy me liyeg rok u baraba’ e kanawo’ nge yan.
33Machane be’ u Samaria ni be sor i yan ko gin’em e yib i pir’eg, ma fa’ani guy fare mo’on me taganan’ ngak.
34Me yan ko gin ni bay riy, nge pu’og e gapgep nge wayin ko yungi n’en nike maad’ad u downgin me m’ag e mad ngay; nge mu’ me fek fare mo’on nge tay nga daken fare gamanman rok me fek i yan nga ba naun ntafen e milekag mi i ayuweg.
35Me yan ni reb e rran riy me fek l’agruw e salpiy ni silber, nge pi’ ngak e en ni ir e bmil suwon fare naun ntafen e milekag ngak. Me ga’ar ngak, ‘Mu ayuweg e cha’ney ya bay gu sul mu gu fulweg ngom e salpiy ni kam n’ag nga puluwon.’”
36Me ga’ar Jesus, “Ere mini’ e arorad e dalip i girdi’ nem e ga be finey ni ir e kemang e cha’ nib migid ngak fa’anem ni yib e moro’ro’ i pirdi’iy?”
37Me fulweg fa en ni tamchib ko Motochiyel ni ga’ar, “Fa’anem ni runguy nge ayuweg.” Me fulweg Jesus ngak ni ga’ar, “Ere mman ma ga rin’ ni aram rogon.”
38Ma nap’an ni be yan Jesus nge pi gachalpen, me yib nga reb e binaw ni bay be’ ni bpin riy ni Martha fithingan, ni pining Jesus nga tafen nge ayuweg.
39Ma bay be’ ni bpin ni walagen ni Maria fithingan, ni yib i par nga but’ u to’oben e rifrif u ay Somol ngi i motoyil ko machib rok.
40Ma ke magafan’ Martha nga urngin e maruwel ni bay ni ngan rin’; ma aram me yib i ga’ar, “Somol, dariyfan u wun’um nike pag walageg urngin e maruwel ngog ni nggu rin’ ni go’ gag? Mog ngak nge yib nge ayuwegneg ko maruwel!”
41Me fulweg Somol ngak ni ga’ar, “Martha, Martha! Bo’or bogi ban’en ni be magafan’um ngay,
42machane ri ta’reb e ir e dabisiy ni nge yag. Me Maria e ke mel’eg e bin ni ir, ma dab ni fek rok.”
